CBI hi general consent ni lovin conditional consent zawk a ni kan pêk
Mizoram sorkar chuan Delhi Special Police establishment Act, 1946 hnenah Mizorama bawhchhiatna (offence) awmte CBI chhui a remtihna (consent) a pe a. He remtihna erawh a vaia pe pumpuhlûm (generally) ngawt lovin, tiamkam/khuahkhirhna (condition) awmin a pe. CBI hi conditional consent chauh pêk an ni tihna a ni.
CBI CONSENT PEK HMASAK
Mizoramah CBI hi general consent pek an lo ni tawh a, kum 2015 khan hnuhkir (withdraw) a ni. India ram state pasarih velin CBI hnena an duhthua state thuneihna lak ngai lova chhui theihna general consent an pek chu an hnukkir leh vek tawh.
Tun sorkar hian 28.12.2023 khan CBI hi Mizorama investigation ti thei turin phalna consent a lo pe tawh a. He consent an pêk hi general consent chu a tih theih meuh loh thung. Corruption case ni lo, a dang zawng chu lo consent pawh ni ta ila, general consent chu a ni thei lo.
CONSENT PEK LEH
India ramah Bharatiya Nyaya Sanhita (BNS) hman ṭan a ni a, BNS hian Indian Penal Code (IPC) a thlak. IPC hnuaia section-te kha BNS hman takah chuan a lo inmil lo ta nuai a, chumi behchhana list thar siam a ni mai e.
BNS hman a nih takah chuan CBI chungchangah notification thar hi siam a ngaih phah a, a hmaa mi kha July 1, 2024 aṭang chuan a nung tawh lo. Hemi chungchang hi Mizoram Chief Secretary hnenah Director CBI chuan June 20, 2024 khan lehkha a thawnin a hriattir. CBI hnena 'conditional consent' nen inzawmna a neihna hriat a ni lem lo.
Mizoram sorkar chuan Mizoram Gazette-ah 1.7.2024 khan CBI hnena consent pêk a nih thu Notification a chhuah nawn leh ta a. Hetah tak hian CBI-in an duh duha consent an neih lohna tur, a huam tel loh chin conditional consent a nihna chu chiang taka ziak a ni.
Kan sawi ropui viau ang hu chu a ni ta hauh lo mai. The Mizoram Gazette Extraordinary Published by the Authority RNI No. 27009/1973-ah chiang takin tuna Mizorama CBI dinhmun puanzar a ni. Mizoram sorkarin CBI-te thuneihna a pekna thar berah hian 'Section 3 of the Act' hnuaia sorkar laipui kaihhnawiha hnathawk te, public undertakings, mimal leh an hnathawhna adt. chhui theihna consent pek an ni.
Mizoram state sorkar hnuaia hnathawkte chu state sorkarin ziaka remtihna/phalna a pe a nih loh chuan CBI hian an chhui phal a ni lo. Hei hi conditional consent dik tak chu a ni e. General consent hi a pumpuhlumin pek a ni lo tih chiang takin a hriat theih.
Nepnawi pawimawh
* BNS vang hian Mizoram ACB Manual siamṭhat ve a ngai dawn.
* CBI tih si, ti nge Delhi Special Police establishment Act 1946 a intih daih tih hian min tihawihai ṭhin a, mahse, CBI hi hemi hnuaia function an ni tih kan hriat a pawimawh.
CBI hnena consent pek hrim hrim hi a ṭha e. Phal zau lutuk loh pawh hi tuna Modi leh Amit Shah te khawsa zia en chuan a ṭha zawk mah mah mai thei. Conditional consent pek hi a la tâwk rih chauh thei bawk.
- Zoa Tlau, Buannel Cabin