Zo nun ze mawi par chhuahtirtu Kawnpui khuain chawimawi an phu; Kawnpui dai accident 1981 Part-II

Hun hmasa lamah khan Kawnpui dai accident rapthlak tiin ka rawn ziak tawh a, tunah hian Kawnpui dai accident 1981 Part-II ka rawn ziak leh e.

Khatia July ni 7, 1981 chawhma lam dar 11 rîk hma deuha kan accident khan khualzin kal lai ṭhenkhat fak phu tak tak leh sipai kal velte’n accident tawkte ruang leh hliam tuarte min han bawihsâwm dan mawlhte kha a va Mizoin Zo nun ze mawi par chhuahtirtu an va ni chiang kher em!

Kan bus chuanna ZRX-82 kha Kawnpui dai chhuk zual kan a pêl ṭêp tawh tihah khan a brake ṭhat tawh loh avangin (?) kawng kawi lai pawh ni lovah chhak deuh aṭangin kawng thlanga dai tawh rêng a. Driver-in cut lêt a’n tum pawh khan kawng thlang lamah kan tawlh liam ta kha a ni ber; a pawi zo ta. Kan tawlh liam ta a, ṭawngṭaia Pathian au chêl chûl rîte chu bengah a la ri fo mai.

Kan lumna hi a thui lem lo hle a. Khati taka thi leh hliam kan tam êm êm nachhan ni a lang chu–kan bus kha râl leh lam mual rawn inkhawh thlaah a va insawh vak a, bus pawh a phel phawk mai a, a chhuat chu a hranin a awm daih a. Kei pawh a chhuatah chuan mi eng emaw zat nen hliampui tuarin kan let reng kha a ni a. Bus a han insawh vakah khan mi tam tak chu kawrte tui tlinna, li lian vak lovah an tla khawm vak a, an indelh nûlh a, ṭhiante thisen leh tui hâka boral ta maite pawh an awm rêng a ni. Kei pawh hliampui tuara bus chhuata ka leh reng lai chuan ka ṭhianpa pakhatin thei leh thei lovin, “U Chhung, min han ṭawngṭaisak the,” a ti a. Ka bul maia nu pakhat a lu vunpui hîk huau mai, la thi si lovin “Thing, min chiltu hi min han tihsawnsak the,” a rawn ti bawk a. Thei leh thei lovin a delhtu thing chu ka va tlawh sawn thei hrâm a. “Awi, ka va lawm tak êm,” a tih zawh hnu lawka a thi ta maite kha rilru mitthlaah a châm reng mai. Hliam tuar rûm rî leh ‘Min chhan rû’ tih chu thâwm kan hriat awm chhun a ni ber mai. A rapthlak teh mai asin aw.

Chhanchhuaktu hmel duhawm Kawnpui khaw mipui an lo lang ta. Pa pakhat a rawn au lauh lauh a, “Hliam tuar zingah chhanchhuah theih âwmte kha bedding-a puan awm ang ang kha la chhuak u la, kawngpuiah zawn chho thuai thuai rawh u,” a rawn ti a. A va ngaihnawm em! Kei hi engtikah nge min rawn lak ve ang tih leh chhanchhuah theih âwm zingah ka tel ve rêng em tih chu ka rilrua zawhna awm a ni.

Kawnpui khaw mipui leh khualzin, kawnga rawn nangtute khan hmangaih takin, dimdâwi takin kawngpui lamah min thiar chho ta a nih kha. Kawnpui khaw mipuite u, in fakawm, Zo nun ze mawi par chhuahtirtu in va ni chiang tehlul êm. Kum 43 lai lo ni tawh mah se, ‘Chawimawina Nopui’ ka hlan thar leh a che u. Accident-na hmun aṭanga Kawnpui Damdawi In, Kawnpui aṭanga Aizawl Civil Hospital, a inkar khua mite’n khaw tinah ruang leh hliam tuarte min lo hmuah dante kha chu sawi sên a ni. Vanduaina lo thleng avangin a hun takah Zo nun ze mawi a lo par chhuak hlerh hlerh a ni ber e.

Shillong Fire Brigade Field aṭanga kan chhuah khan full tak kan ni. Ka hriat reng dan chuan mi 63 lai kan ni a, ATS-ah zirlai ṭhenkhat kan lam chho leh bawk; a zat chiah sawi harsain ka hria. Eng pawh ni se, kha Mizoram State Transport bus ZRX-82 kha AMPGSU (All Mizoram Post Graduate Student Union)-in MA zirlai previous exam zo hawna atana Mizoram sawrkara kan dil a ni a. Hemi hunah hian PG zirlai mai ni lo, sumdawng leh college admission tifel, class ṭan leh hmaa Mizoram haw leh rihte an ni ber.

Kawnpui khuain a tawp thlengin Zo nun ze mawi an par chhuahtir. Hliam tuar leh mitthi sawngbawlnaah an fakawm tawh tehlul nen, Mizo nuna bet tlat, thinlung chhungril ber pawha kan ngaihhlut, hriatrengna lung an han phunte deuh deuh khu an va entawn tlak ngai ve le. Thi tate an ui thu leh an chhungte an tawrhpui thu mai ni lovin, mitthi hming, kum, khuate ziakin sum tam tak sênga lungphun an han buatsaih, a inte nen lama zahawm taka an cheibawlte khu a va ropui êm. 21.10.1982-ah YMA Kawnpuiin lung an phun hlu leh ropui tak chu 6.7.2019-ah a dik tawk lote siamṭhain mawi leh fel nalh takin lung an lo phun belh leh a. He lungphunah hian ‘Renovated by Help Kawnpui Committee & Joint YMA, Kawnpui 06.07.2019’ tiin a inziak a. Hriatrengna lungphun chu thlalak hi a ni. (THLALAK)

He ka thuziak tawitê hi khatih hun laia Kawnpui doctor Dr. Zoramthanga, khawngaihna ngah leh mi tlawmngai, chatuan ram pan ta pualin ka hlan e.

Thubelh: Kawnpui dai accident-a la dam kan inhriat theih nan phone number-ah hian WhatsApp-in hming, kum, present address rawn thawn turin kan inngen e. 9436146067 / 9436151017

- Vanlalchhunga, Serchhip