Meta AI bihchianna

META AI HI ENG NGE NI?

Meta AI awmzia chu Metaverse Artificial Intelligence a ni. Awlsam leh rang taka kan zawhna chhang thei tur leh kan mamawh hrang hrang tihtir thei tura general-purpose AI assistant software a ni. Meta AI siamtu leh neitu chu Facebook inc. a ni. Facebook's AI research director, deep learning thiam tak leh New York University-a professor ni bawk 'Godfathers of AI' tih hiala an vuah, Yann LeCun-a duan chhuah a ni. A hming hmasa chu Facebook Artificial Intelligence Research (FAIR) a ni a, Facebook company-in kum 2021 October thlaa an hming Meta(Metaverse) Platforms Inc. tia an thlak khan Meta AI tiin an thlak a ni.

META AI PIAN CHHUAH DAN

Kum 2020 khan inbiak theihna Dialog Agent AI Model an siam a. Kum 2021 khan mihring anga thil hrethiam thei tur AI model thar CAIR (Cognitive Architectures for Reasoning) an siam leh a. Kum 2022 khan tuna WhatsApp-a kan hmuh ang zawhna chhang thei AI assistant chi khat, computer leh mihring inbiak tawn theihna Conversational AI model an siam leh a. February 24, 2023 khan dik leh ṭha zawka zawhna chhang thei AI model thar Large Language Model Meta (Llama) an siam leh a. Kumin April 2024 khan version thar ber Llama 3 an release a, Meta AI Virtual Assitant hi Website (https://www.meta.ai/), Facebook leh WhatsApp-ah an dah nghal bawk. Kumin June 24, 2024 khan India ramah Facebook, Instagram, WhatsApp leh Messenger hmangtute tan an rawn tlangzarh ve ta a, tunah chuan Mizo mipui pawhin kan lo hmang ve thei ta a nih hi.

FEATURE LANGSAR ZUAL

Ṭawng hrang hrang–English, Hindi, German, Chinese, Japanese etc. sawm paruk a hrethiam a, heng hmang hian awlsam takin kan hriat duh zawng an zawt thei. Mihring ang maiin creative capabilities a nei a, thawnthu a ziak thei a, hla a phuah thei a, essay leh article a ziak thei bawk. Inkaihhruaina mumal tak Ethical Guidelines a nei a, kan tana him lo tur ang chi min chhang duh lo. Zawhna hrang hrang chhang thei turin internet aṭangin dataset lian tak a nei a, chumi hmang chuan training uluk taka pek reng a ni. Eng lai pawhin a hmangtute zawhna pek leh feedback hmangin amah a inzir fing zel thei bawk.

SOFTWARE TOOLS & TECHNOLOGY

Meta AI hi advanced technology changkang tak tak mihring ṭawng hriatthiam theihna (natural language processing), data aṭanga thil nihna zirchianna (machine learning) leh database lian tak aṭanga information dik thei ang bera siam chhuahna (knowledge graph) hmanga siam a ni. Inbiak tawnna (conversational) atan transformer-based architecture, supervised leh reinforcement learning algorithms a hmang bawk. High-performance GPU infrastructure a nei a, deep neural network atan PyTorch program an hmang bawk. Parameter billion (tlunglekdingawn) 15 lai support thei turin Llama 3 hmangin language model lian tak siam a ni a, advanced Natural Language Processing (NLP) nen internet platform hrang hrang aṭanga data tam tham tak, 15 trillion token hmanga training pek reng a ni.

AI model, algorithm leh application hautak zet siam nan leh implement nan Python, Java leh C++ programming language an hmang a. AI Training model atan machine learning library–scikit-learn, TensorFlow leh Keras PyTorch open-source machine learning framework an hmang bawk. Natural language process nan leh text generation atan transformers neural network architecture an hmang a. AI application a ṭul anga siam rem zung zung nan leh information pek chhuah nan Kubernetes open-source system, Docker Tools, Cloud Computing pahnih Amazon Web Services (AWS) leh Google Cloud Platform (GCP) an hmang. Kan zawhna leh a chhanna dah khawm nan database management system hrang hrang MySQL, PostgreSQL, MongoDB a hmang bawk. Heng technical software tool leh technology-te hmang hian Meta AI chuan mihring ang maiin kan zawhna hrang hrang rang takin a chhang zung zung thei ta a ni.

A HNATHAWH DAN

Meta AI Virtual Assistant textbox hmangin zawhna emaw, hnathawh tur kan chhu lut a. Kan zawhna type luhte chu thumal awmze nei tawi te te (word or phrase)-ah a ṭhensawm phawt a. Word/phrase kaihnawih information-te chu Meta AI database lian takah a zawng a, information a lak khawm hmangin kan zawhna chhanna tur a siam ṭhin. Chhanna dik leh rintlak min pek theih nan a siam rem leh vek a, duh tawka a siam hnuah database-ah fel takin a dahṭha leh phawt a. Tichuan, kan zawhna emaw, hnathawh tur kan pek apiang chhannate chu a rawn tilang ta a ni. Heng hna hrang hrangte hi second rei lo te chhungin a tifel vek ṭhin.

META AI HMAN ṬANGKAINA

Kan mamawh dan azirin Meta AI hi ṭangkai takin a hman theih a, a langsar zual tlem han tarlang ila.

Zirna lamah:

Zirlaite'n topic hrilhfiah nan leh example pek nan, diagram ziah nan, computer program ziah nan, study resource, real world application, projects, etc. atan ṭangkai takin a hman theih. Zirtirtute'n lesson plan, student assessment, classroom activity, virtual lab. siam nan, education research, parent-teacher communication, curriculum development, quiz, etc. siam nan a hman theih bawk. Entir nan, Create a quiz on English grammer tih han type la, English grammer MCQ a rawn siam mai ang. Find teaching resources for Biology for class 10 tih hi han type la, class 10 biology study material a rawn hrilh ang che.

Sports leh music:

Sport leh music lamah pawh a ṭangkai hle. Sport lama tui mite tan sports news, player statistics, game prediction, player comparison, score update, coaching advice, schedule information, etc hriat nana a hman theih. Compare Messi and Ronaldo tih hi type la, an dinhmun khaikhinna a rawn lang ang. Music lamah lyric writing, instrumental composition, genre analysis, music history, music creation, etc atan a hman theih. Masi hla i phuah duh chuan 'Write lyrics about Christmas song' tih type la, masi hla nalh tak a rawn phuah ang a, i duh angin Mizo ṭawngin i letling tawh mai dawn a ni.

Graphics and multimedia:

Image generation, image editing, graphic design (logo, icon, and infographic), video editing, animation, multimedia presentation, image recognition, etc atan ṭangkai takin a hman theih. 'Generate an image of Taj Mahal,' 'Create a logo for fashion store,' 'Make a video with AI' tih thute hi han type chhin teh le.

LIMITATION

Meta AI hian kan zawhna hrang hrang dik taka chhang thei turin data a la nei kim tawk lo hle a, zawhna tam tak chhanna min pek tam tak pawh hi a dik lo ve thin bawk. A bikin real-time information tam tak a chhang dik lo ṭhin. Meta AI hi cyber criminal lakah a him reng bik lo a, fake news, phishing attack, financial fraud leh information dik lo thehdarh nan an la hmang ang. Kan suangtuahna angin milem leh video a tak tak anga siam theih a nih avangin graphics leh video hmanga intihderna/ imbumna tam thei hle dawn bawk. Entirnan: 'Imagine Taj Mahal filled with fire' tih hi han type la, Taj Mahal kâng hluah hluah lai a rawn lang mai ang. Hetianga mipui rilru chawk buai thei thehdarhtute hi pawisa chawi leh jail tàn thlenga hrem theih an ni. Fimkhur taka hman a ṭul.

HRIAT TUR PAWIMAWH

Mi dang password, credit card number, sensitive health information, sensitive personal information, dan phal loh thil tih nan te, hurherhna lam thil tarlan nante leh damdawi inchawh nana hman loh tur a ni. Mi dang chanchin kan zawhna leh chhanna social media vawrh darh phei hi chu pawisa tam tak chawi leh lung-in tàn theihna a ni.

Meta AI hian zawhna maktaduai chuang ni tin a chhang ṭhin. Thla khat chhungin zawhna tluklehdingawn khat zet a dawng a, zawhna a chhan tawh zawng zawng hi maktaduai 100 a tling tawh. Chhanna dik leh rintlak zawk min pek theih nan zawhna kan type luh leh comment aṭang te, internet-a data thar ber ber hmanga upgrade reng a ni. Kan mithiamte'n language processing lamah ṭan han la chho zel se, engtik ni-ah emaw chuan Mizo ṭawngin kan duh zawng kan zawt ang a, Mizo ṭawng ngei hmangin min la rawn chhang thei ang. Mizote hian kan hman dan azirin kan la ṭangkaipui chho zel ang.

- Er. Chhungpuia Renthlei, Senior Technical Officer, NIELIT, Aizawl