ANTI DEFECTION LAW (ADL) LEH POLITICS BUAINA

Tuna India rama dan kan hman mek zingah hian inhnialna leh buaina thlentu an awm nual mai a. 

Chung zingah chuan hman aṭang tawha buaipui leh chai hlawh rawn tak pakhat chu Anti Defection Law hi a ni. Thla hnih/ thum liam ta vel aṭang khan keini state ngei pawhin anti-defection chungchang hi kan chai chho laih laih a nih kha. 

Kan thupui Anti Defection Law tlinlohna lai leh chu a tlin tawklohna lai avanga buaina lamah lut chho mai ila. He dan famkim tawklohna hi mahni sahmim tihpuarna atan hmang an lo awm ṭhin avanga Supreme Court (SC) hial, dan siam ṭha zel chunga a lo inrawlh tawhna leh thuthlukna a lo siam tawh ṭhenkhat chauh han tarlang hmasa teh ang. 

1) Kihoto Hollohan vs Zachillhu & Others 1992 -

He buaina chingfel tur hian SC chuan ADL chungchanga thuneihna tawp neitu chu Speaker a ni tih a nemngheh rualin, dik lo taka thuthlukna siam a awm a nih chuan chu thuthlukna chu Court-in ennawn theihna dan (judicial review) a nei tih a sawi bawk. (Note: Judicial Review hi Speaker-in procedure a hman ennawnna atan ni lovin, a thuthlukna, Principle of Natural Justice leh a dangte ennawnna atan hman a ni ṭhin). 

2) Keisham Meghachandra Singh vs Speaker of Manipur & Others 2020 -

He thubuaiah hian SC chuan, ADL hnuaia buaina a awmin Speaker-in thuthlukna thla 3 chhungin a siam ang a ti. A chhan chu Court-in thuthlukna ennawn theihna dan a neih hi Speaker-in thuthlukna a siam phawt hnua-a kenkawh ve theih chauh vang a ni. A hma kha chuan buaina chingfel turin hun tiam a awm lova. Chu hun tiam awm lo chu Speaker ten an MLA/ MP duhsak zawng humna hun atan an lo hmang tawh ṭhin.

3) Jagjit Singh vs State of Haryana & Others 2006 -

He thubuaiah hian SC chuan Independent candidate-te tlinlohna/uirena chu mipuiten an thlantlinna constituency aṭanga Independent a nihna nungchang leh chetzia aṭanga teh tur a nih thu a sawi. 

Nimahsela, SC hian pawn lama a narana party dang zawm anga lanna chu thutlinga pawm tur a nih loh thu a sawi ve bawk. Chutianga puhna a awm chuan finfiahna sawiselbo a awm tur a ni tiin a sawi leh a ni. 

Jagjit Singh thubuai aṭanga SC thuthlukna hi tuna thubuai puluttute ṭanchhan a ni a. Documentary Proof pawh Speaker hnenah an thlen nghe nghe. Chutihrualin, Independent a nihna ziarang petu a bial awp mipuite aṭang hian defection thubuai thehluttu tur zawng dawn ta ila, tumah Pu Duhawma tlinlohna hriaa huai taka rawn dingchhuak duh an awm a rinawm chiah lo (mipuiten thubuai thehluh theihna dan an neih hi Speaker of Odisha Assembly vs Utkal Keshari Parida case aṭanga SC pek a ni). 

Tuna kan state politics inhnialna hring chhuaktu ADL kan hman danah hian tunge dik/dik lo zawk sawi mai a harsa khawp mai. ADL avanga buaina awm tawhah chuan a chingchivet kawi kual ber a la ni awm e. Hetiang ang thil ni thei/ thei lo dinhmun (win-win situation)-ah hi chuan rorelna fawng chelh mektute lam buk a rit deuh zawk lo thei lo. A chhan chu Speaker zahawm takte hian lawmluh an nih dawnah awn lam nei lo turin thu han tiam ve ṭhin mah se, an rilru erawhin an awmna party an duhsak lo thei lo ṭhin (NS Reddy, India President pawh lo ni tawh khan Lok Sabha Speaker hna a chelh dawnin ama thahnemngaihnain a party awmna a chhuahsan hmiah...! A hnu-ah khatiang thil ti kha an awm leh tawh ngai lo. A fakawm ngawt mai).

ANTI DEFECTION LAW (ADL) LEH POLITICS BUAINA

Petition thehluttute hian Tenth Schedule Para 2 sub-para 2 vek hmangin Pu Duhawma hi an hek thla chu a ni phawt mai a. Kan hriat ṭheuh angin ZPM hi inthlan hma daih aṭanga heng party - ZNP, MPC, Zoram Exodus Movement leh party dangte kalkhawmin an din a ni a. Election Commission aṭanga party registration an dawn theih ni chu ni 3, July 2019 a ni. Tenth Schedule Para 4 sub para 1-ah chuan political party insuihkhawmte'n, an kalkhawm hun/ni la lain political party thar an siam tak thu leh chutiang thlen theihna tur chuan an party hlui legislative member hmun 2/3 (91st Constitutional amemdment act-in  1/3 aṭangin 2/3 ah a thlak) remtihna a ngaih thu, Para 4 sub para 2-ah kan hmu leh bawk. Kan hriat atana ṭha chu 2/3 dana hremna pumpelh tur chuan heng member-te hi a ṭobul neitu zawk/national level   party an nih a ngai. Tin, Para 4 sub para 1 leh 2 ten MLA/MP te fihlim theihna a sawi avangin ZPM lam tan ṭanchhan awm theih deuhna nia lang lai a awm ve a. A chhan chu party hrang kalkhawmte'n party thar siam tura an kalkhawm ni/hun chu election neih hma nge a hnu lam tih he dan hian a sawi lang lem lova. Amaherawhchu, kan hriat leh atana ṭha chu election hmaa party insuihkhawm reng reng hi political party an ni lem lova. Pre-poll electoral fronts tih an ni mai ṭhin. Law Commission (170th report) chuan heng pre-poll electoral front-te hi political party anga chhiar turin rawtna a lo thehlut tawh thung a ni.

He buainaa a kaikuang ni ta bera lang chu ZPM-in election neih hmaa Election Commission hnen aṭanga registration nei tura hun remchang a nei thei lo leh election hnua registration a hmu leh ta si hi a ni awm e. He hun hi Election Commission buai lai a ni ve bawk nen, inthlan hun a lo thlen meuh chuan independent-in an ding lo thei ta lova (Hriat sual a nih loh chuan hei hi Election Commission thurawn anga tih a ni). Tin, inthlan hnu thla riatnaa party registration an neih theih hnuah pawh thubuai puluttute mit aṭang chuan independent candidate an nihna chuan a la phuar ta reng a. Independent-a ding mai tura thu rawntu Election Commission lahin ADL chungchangah thuneihna a nei tawh der bawk si lo (Election Commission vek hian house member-te disqualify tura thuneihna chu President/ Governor hnuaia awm tur leh thutawp chu amah EC vek rawn chunga siam turin rawtna a lo thehlut ve tawh bawk). He hun remchang hi chuhin politics uirena thubuai thehluttute lam hian chet an la ta niin a lang.*

Tenth Schedule hnuaia an puhna hi para 2 sub para 2-ah ziakin chuang mah se, petition puluttute hian hmuhhmaih an nei lian ve viau lawi si...! He danin a tum ber rorelna In ngelnghet (stable gov't) nei thei lo tura MLA/MP helna lo thleng thei lo danchah leh roreltu member-te zingah hleprukna, thamna leh eirukna awm lo tura mipui rawngbawlsaknate hi an chet lak dan hian a kawk hlawl lo. Entirna'n, Pu Duhawma hian house-ah No Confidence motion lo pu lut ni ta ang se, tuna an chetlakna hi a demawm kher lovang. Tin, Pu Duhawma hian mawhphurhna a lakna mipuite a phatsanin a lang bawk hek lo.

Anti Defection Law hian MLA/MP te chu an tlinna chhan party symbol leh manisfesto hnuaia kun chungin, chu symbol neitu party thil tum leh thupuite chu zah turin a beisei a. Dan ang taka party phuahkhawm duh chung a; an hun tawnin a zir tak loh em avang zawka Independent-a ding ta Pu Duhawma hian, a tlinna chhan party symbol hnuaia hun a lo va hmang zauh zauh pawh hi a awm lo hran lo. Inthlan hma khan Speaker zahawm takin ZPM ṭangkhawm kha dan hnuaiah a lo pawm tawh a. Chumi-in a entir chu an symbol leh manifesto pawh a pawm tel tih hi tarlang ve leh hram bawk ila.

Chuti ahnu eng vangin nge ZPM leh a member-te che vel hi, registration an neih tak hnuah an khel an khel leh si? ZPM party-in registration a hmu hi he chetlakna tiphurtu pakhat mai a lo ni ta zawk niin a lang. Chuvangin, MLA aṭanga bantir a nihna hian Anti Defection Law thil tum tak a phawkchhuak pha chiah lovin a lang.

 Speaker zahawm takin Principle of Natural Justice zawm a tumzia leh a theihtawpa a zawm ve zia bakah, hnialthlatu tur member 3 awmsana privilege committee-ah thubuai a hlanchhawng ta lo mai niin a sawi tih kan hmu a. Tuna dan ding lai angah hi chuan a thiam lohna han sawi tur em em pawh a awm hran lo. Amaherawhchu, tuna kan dan hman lai tifamkim tur leh awnsa lam nei lova Principle of Natural Justice kenkawh a nih theihna turin SC chuan Meghachandra Case 2020-ah khan Permanent Tribunal din turin ram rorelna Inte thurawn a lo pe tawh a. He tribunal hi SC Judge hlui emaw HC Chief Justice hlui emaw-in a ho ang tih a ni.

Kan ram politics kalphungah hian eptu party-te hi chuangtlai taka rorelna In-a ṭhu mai mai tur an ni lova. Sawrkar khalh ngil tura ram rorelna thlithlaitu turte an ni. Tin, covid hri avanga hun khirh kan tawn chhoh mek lai phei hi chuan kan ram hruaitute hi ṭangrual deuh turin mipuite hian kan beisei zawk che u. Ram rorelna a chhuanchhe zawnga lo kalpui hi, chhan ṭha tawk tak a awmte a nih loh phei chuan emaw party hlawm khat chauh hlawkna ngaihtuah ang hrima lo kalpui a nih phei chuan, a hun loin a ṭul lo tak zet bawk.

Mihringin mawhphurhna hrang hrang kan neihte tihlawhtling tura kan siam; heng dante tifamkimtu chu a hmangtute chhia leh ṭha hriatna a ni tih hi kan theihnghilh tur a ni lo. Dante hi an huamchhung chin ni si-ah kawi deuh taka han chhiar talh te, kan mamawh lai chang chiah han lak vung vakte hi thil awm thei a ni a. Chutah tak chuan a ni chung dante famkim lohna tifamkim tura mahni chhia leh ṭha hriatna fim taka kan hman ve a ngaih ṭhin ni. Chhia leh ṭha hriatna chuan danin a tum bulpui ber a chhui fuh thiam bawk tur a ni.