Mizote Leh Chanchinbu Hmasa Ṭhenkhatte
Kum 1898 aṭang khan Mizoramin chanchinbu kan nei tan a. Mizoramin chanchinbu kan neih hmasak ber hming chu LAISUIH tih a ni. He chanchinbu hi kut ziaka chhuah niin sawrkar chhuah a ni awm e. Mizoramin chanchinbu kan neih hmasak berah hian thingtlang khaw chanchin leh leh sawrkar thupekte hi chhuah deuh ber a ni. He chanchinbu hi Copy eng zat nge an chhuah a, eng tikah nge an tihtawp tak tih hi hriat theih a ni ta lo a ni.
Mizoramin chanchinbu kan neih pahnihna chu MIZO LEH VAI chanchinbu tih niin, kum 1902 khan Aizawl Bawrhsap Office aṭanga chhuah a ni. He chanchinbu chhutna hmun hi Dina Press Syhlet tih a ni. Kum 1941 khan he chanchinbu hi tihtawp a lo ni leh ta a ni. He chanchinbuah hian ram dang chanchin te, hriselna lam te, infuihna lam te, Mizo chanchin te, Mizo thawnthu te, sikul zirlai te, exam result te, Mizoram pawna zin thu te, Mizo hmeichhia chawikan duhna te, Mizo tih dan ṭha lo hnawl chungchang te, tih dan ṭhate chu chíng zui tura inngenna te, sawrkar thupek leh Lal ho tih tur chenin chhuah ṭhin niin, he chanchinbuah hian khawvel chanchin hrang hrang an zep hnem hle bawk a ni awm e.
Kum 1911 khan Krista Tlangau chanchinbu (a hnua Kristian Tlangau ni ta) chu chhuah a lo ni leh ta a. He chanchinbua Editor hmasa ber chu Upa R.Dala niin a ṭhian ṭhenkhatten he chanchinbu buaipui chungchangah hian an pui bawk a ni. He chanchinbu chhutna hmun chu Dr.P.Freser Hand Press niin, a tirah chuan he chanchinbu hi Copy 300 chauh sem chhuah niin, chanchinbu man hi kum khat atan siki thum a ni. Kristian Tlangau chanchinbu hi Mizorama chanchinbuah chuan a upa ber a ni. Kristian Tlangau chanchinbuah hian hemi hun lai hian sermon te, sap ram chanchin te, infuihna lam thu te, Kohhran inkaihhruaina lam te, zawhna leh chhannate hi chhuah a ni deuh ber a, hun a lo kal zel a, he chanchinbu pawh hian hma a lo sawn ve zelin thu chhuah chungchangah pawh tih danglam a lo ni ve zel bawk a ni.
Kristian nun puitling nei tura ringtute kaihruai thei chanchinbu Mizoramin kan nei hi a lawmawm tak zet a ni.
- George L.Ralte, Vaivakawn