Inner Line Permit (ILP) Kan Rohlu

Tunlai chu sawi neuh neuh a tam riau a, tlem han thai lang teh ang. “A hmelin ILP a support teh lul nen, mahse sumdawnna a rawn bun; tuemaw chhawr thin a nia; a awmna a rei tawh em a kan ruai ve tawp; kan chhawr-a hian a nupui fanaute a zuk hruai a; enge an tih le an tei suau suau ringawt a”. Kan chianglo ruai mai.

Hmanni chu Zonulo hmel, ngo lam deuh hi ka hmu a, tuemaw chhawrlai ILP kan hman tlanglawn ber hmanga rawn awm mek nupui hi a lo ni a. ILP inkaihhruaina hnuaiah a hranpa ngata a nupui chu lakluh ve tho ngai a ni a, a pasal rawn luh vangin a rawn lut ve ngawt theilo.

Tute mai pawh hi Mizoram leilung rawn rap turin ILP a ngai han ti phawt teh ang. Amaherawhchu, India Constitution kan hman hmaa Mizoram-a lo cheng tawh emaw an thlah kalzelte emaw dân dangin a phal te tan ILP a ngailo.

Kan hman tlanglawn chi hnih han sawi ta ila: Temporary ILP (T-ILP) hi ni 15 chhung a dam a, ni 15 dang a pawhsei/renew theih. Regular ILP (R-ILP) hi thla 6 chhung a dam a, ILP petu District huam chhung a chhuahsan loh chuan tum hnih ngawt thlaruk chhung ve ve a pawhsei/renew theih.

T-ILP hnuaiah hian min rawn tlawhtu (visitor), khualzin (tourist), sumdawnna lama thil buaipuitu (business representatives) leh labour tur te sponsor theih an ni. R-ILP dil zui tam ber chu Labour tur atana T-ILP nei ho an ni.

Vawiina min chenchilhtu tam ber leh kan ration buhfai khulbâng it em em thinte chu cement lam hnathawk te, thirchhe zawng te, dawr ak te, thingpui siam leh vaipa mix bawm pu kual thin te hi an ni tlangpui a. An awm rei thin em avangin R-ILP nei tura ngaih an ni bawk.

Amaherawhchu, an tam ta lutuk hi kan buaina a ni tan ta a. ILP kaihhruaina hnuaiah chuan Sponsor theituin a sponsor anga, an in sponsor nachhan a zawh tawh chuan thuneitute hnenah ILP a kir (surrender) leh ang, pawi an khawih a nih pawhin Court hmaah mawhphurhna an la bawk tur a ni. Vawiina ILP keng reng chunga vak nuaih nuaih te laka mawhphurtu chu sponsor-tu te an ni. ILP hrim hrim an neilo a nih chuan vak nuaih nuaih hote mawh chu a ni ta a, a tul anga hmalak tur a ni.

Chipchiar takin chip ta hrihlo ila, ILP hmang dik leh diklo lanna ho-te pakhat chu an ILP ah khan Purpose of Stay (an awm chhan) leh an thil tih mek a inmil em tih a ni a, chutah tak chuan ILP kengtu leh a Sponsor-tu kha mawhphurtu an ni ang. Mi sponsor lai lo pawhpên hi thil dik a ni lo.

Humhalh ngai kan nih avangin mi hmasa ten ILP hmangin min humhalh a, tunah chuan humhalh ngai leh humhalh ngai te zingah kan thu a inhmulo fo ta a. Kan chet duh dan pawh a inang lo fo thin. ILP hi vîn taka kalpui ai chuan India Constitution nena kan kal rual tir thiam a pawimawh.

Ram leh Hnam nghawng thei thilah chuan kan fimkhur a ngai em em a. ILP hi chutiang nghawng thei thil chu a ni a, kan tanruala kan hman thiam a ngai a ni. Kan mamawh loh pui pui chawlut lo ila, hmelhriatte an nih avangin diklote chu chhan lo ila, dik tak zelin i kal ang u.

Zalenna kawng hi a bumboh a, a man a to a, neih a harsa. ILP hmansual hian kan zalenna hi a suam mek em tih lo in ngaihtuah chiang la. Tunah i harh loh chuan engtikah nge?

- Francis Lianmawia,
Chawnpui, Aizawl