Pavalai Infiamna Kutpui (Veteran/Senior League)

Mizo hnam kal zel dan tur thlir phak aṭanga zualko thu chhiar thiam tawh phawt chuan, ṭhalai leh pavalai thih nasat zia hi manganthlak an tih zia thusawi leh ziak a tam ngei mai. 'Hnam Thawnthu' tih ziaktu Armed veng pa, B. Lalrinhlua chuan Mizo pian dan leh thih dan hi a lehkhabuah hian chipchiar taka chhût leh chhuiin, 'Mipa pian tam hi mipa thih tamin a zui zat chuan, thil manganthlak tak a ni," tih a tarlang. He tih mek lai hian, BCM 'Kristian Chhungkaw Chawlhkar' thu zir ziaktu, Rev. L. Vanlalsânga chuan, 'mipa thi aṭanga enin pavalai leh ṭhalai thi kan la tam thu leh, hriselna ngaih pawimawh a ṭul zia' a lo tlangaupui ve mek bawk. Zep leh phat theih rual lohin ruihhlo behbawm hrang hrang avangin Mizo mipa kan ṭil ar ar a; ruihhlo chim buai phak loh mi tam tak lah, taksa insawizawi ngai lo leh vawn uluk tawk loh' avanga natna hrang hrangin a bawh buai kan kuh ṭul – 'cancer leh natna ṭihbaiawm tak takin a bawm nasat ber State kan ni' ti zawnga mi beng hniam rawih khawpa ṭawngkam hriam lek reng lah, haider har khawpin hmang nawn awn awn duh an awm reng tho – a chinfelna leh a damdawi lam hi ngaihtuah zawk awm tak a ni!

# Danglamna Duhawm – Nilenga hnathawk, zinga insawizawi hman bawk si lo chu dul a kiar a, taksa a ngur chuai a – thiamna leh finna pawh bawrhsawmnain a buan thluk chuan ṭangkaina a pan tawh ṭhin.

Zan lama pan theih Gym a pung a, Mizo lawm zawng tak Futsal chu man chawia hawh theih ground an han awm meuh chuan, Malsawm Yard (Futsal ground, Durtlang) neitu pa chuan – zanlai thlenga inkhel peih an awm thu zu han sawi nia! Hriselna lamtluang khawpui mipuiin kan zawh chhoh huknaah hian, Aizawl leh a chhehvela futsal ground hi hipkhawmtu hmanraw hmatheh a ni chiang.

Futsal ground hrang hranga awl hman lo va, zanriah ei kham ruala mut hmun pan nghal mai ṭhin leh zana insawizawi ngai eih lo ṭhahnem féten inthurualin, thlantui luang zawih zawihin infiamna hmun an luah khat a – hripui khan min dang bet zui ta em zawk a nih kha.

# Veteran/Senior League – Futsal hrinchhuah ṭhenrual ṭha insuihkhawmten mahni tuina zawng infiamna huangah, heng pavalai rual phur tak takte hian inelna (league/tourney) hmanga tih tak takna a hringchhuak – zan reh leh rei hnua sports dress famkim nena inthuam thlan tla zawih zawih an pung tial tial a – "Hriselna lam thil a ni. Inkungkaihna leh inlaichinna ṭha a siam bawk," tiin pavalai rualin sports item hrang hranga Veteran League an khelh ṭhin chungchang chu Pu Tetea Hmar, Senior Basketball League khelh tuma inbuatsaih mek chuan a sawi.

A ni ngawt asin, hnam zakzum leh inhmaizah pe na tak tak ṭhinte hi hmel ka'n inhmuh a, ka'n inkuahkhawm tel tel hi chuan boruak ṭha tak hi kan nei mai zel a. Social media lama kan indiriam vak vak chhan bulpui pakhat – taksa leh rilru hrisel loh hnehna duhawm chu infiamna hmanga inpawlhona kan neih ṭhin hi uar deuh deuh chi a ni. "Ina tawm reng lovin, khel che, insawizawi che – ka la dam, ka la dam," tih Kolasib Valtea (basketballer) sawi hi ril deuh a nia aw.

# Senior Basketball League – MFA lamin Veteran League hmawrbawkna an neih chhoh mek laiin; team 12 zet inelna tur, Chawnpui Veng Basketball Court-a kum 35 chung lamin, May ni 21 aṭang hian Sr. Basketball League khelin an inel dawn a. Hemi chungchangah hian, "Organiser lam hi MBBA ni lo mah ila, Mizo basketball ṭhan zelna atana thluak fîm tak hmangtu, ṭum 3 zet tourney huaihawt thei Pu Lalrengpuia Sailo, Zarkawt hi mimal leh MBBA ang pawhin kan thlawp tak zet. Ani ṭhahnemngaihna hi Aizawl mai bakah Champhai leh Kolasib lam thlengin, pavalai rualin tourney ṭan hma aṭangin hlep kan chhiar der tawh. Practice vawi tam kan nei theite hi a hlawkna chhiar sen a ni lo," tiin MBBA Secy., Pu Zomuanpuia, Mission Veng chuan duhthawh takin a sawi.

"He championship-a kan tel ve thei tur hi kan lawm hle. Kan rawn tel chhan ber pakhat chu – Tlangmi te ṭhian kan nih ang a, tlangmite leh Zoram Mipuite nêna inkungkaihna ṭha lehzual zâwk kan neih theih nân a ni e," tiin Brigedier, Girish Upadhya SM-II VSM Commander, Headquarter, 23 Sector Assam Rifles Khatla chuan Senior Basketball League chungchanga team an neih tur chhan hi a sawi a ni. MBBA-in AR lam kawng tam taka a thawhpui rah hi Mizo ṭhalaiin an zar zo ngei teh se.

# Pavalai Thu leh Hla – "Infiammite chetla entu leh thlirtu niin, kum 10 chuang Aizawl pawna hna avanga hun ka hman lai khan ka awm a. Hei Aizawlah ka rawn let a, pavalai rual hriselna ngai pawimawha inkhel suau suau ka hmuh hian min tiphur tak zet," tiin Senior Basketball League atana inbuatsaih mek, Young Guns Basketball Club manager/player - Sangsanga chuan a sawi bawk. 'Hriselna lam thil a ni' tih sawitu thusawi khi a takin tisaah a chang mek – 'Tho la, khel ta che!'

- Ṭpa Bunghai.