KA VEI ÊM MAI ('PASAL LAKA AWMDAN ṬHA' HI)!

Ka vei êm mai ka'n sawi duah teh ang!

Group pakhat-a post pakhat ka hmuh (ka chhiar zo ta lo, khatiang kha ziak chi hrang hrang tum inang pût kha ka hmu tam tawh em mai! Ka chhiar thuak tho a nia) khan ka rilru hi a luah tlat a, hmeichhe tan 'Pasal laka awmdan ṭha' (point 30 zet) tih kha. Pa ho khan an pawmpui liam liam khawp mai! An rawn kutzungpui pir tliar tliar mai nia! An rilrem zawng tak kha a lo nia (ni lo thei nang tiraw?). A engpawh chu ni se, 'a ṭha lo e' te phei chu kan tihsak lo ang a, a ziaktu kha chuan ziak ṭha a inti hlarh hlarh viau hian ka ring ngawt a (a ṭha em alawm:)) mahse ka han ti teh ang, Mipa tan hmeichhe laka awmdan ṭha, Nupuite laka awmdan, Mipa ṭha leh fel awmdan, Pasal ṭha tak nih dan, etc. hengte hmanga thuziak thehdarh hi ka la hmu ngai lem lo a, pahnih khat awm kan lo hmu lo te a nih chuan thuhran ni sê, a tam lo tih erawh ka sawi ngam viau he 'Patriarchal society' (mipate chungnunna ram)-ah hian!

Hmeichhia/Nupuite awmdan ṭha kan zirtir a, kan ziah kur duah lai hian, mipate hi pasal tlak ni tur te, mipa fel leh ṭha ni tur te, mipa zahawm/zahtlak ni tura awm turte hian kan zirtir tam tawk em? "Mipa chu mipa an nia, zah tur an ni," kan ti ringawt ṭhin te, "Hmeichhe lu chu mipa a ni," tih changvawn kan changchawi êm êm a, kan Sahuai thing vawn ṭun fo hi chu sim a ṭha viau hian ka ring ṭhin. Mipate hian an lu Krista chu an vuan ve chiah em? (ngaihtuah fê tham!) Mipa nih vanga zah phu ta viau nia inhriat tlatnate hi sim a ṭul ta viau a. Rui bung bung, nupui te vaw reng mai, thatchhe em em, phunchiar satliah, hmeichhe hmusit mite hian zah an phu hian ka hre thei mawlh lo, kei hmeichhe lungmawl in tih fo hian! Pasal/Chhungkaw pa tam tak nupui fanaute rîkrâp a, in chhungkhur chauha pa, mipa mahni inrin zawh tawk loh avanga a ngam tawk hmeichhe laka inhrosa ṭhin, nupuite hmangaih leh ngaihsak nachang reng reng hre lo, thlamuanpuiawm lo, thlamuanpui lam ai maha râpawm, ṭihbaiawm, hlauhawm, tawhkhirh bawk si, nupuite chawm zo lo, nupuitea innghat thui em em, mahni inluling bawk si an tamzia ka ngaihtuah hian, 'hmeichhe awm dan tur' ti reng ringawt lo hian mipate pawh hian he zirtirna hi chu kan mamawh ta viau niin a lang.

Engkima hmeichhe dem tum, hmeichhiate zaidam leh zawldawh bik tura beiseina khawtlang leh ramah hian kan hriat loh fo chu, 'i phu tawk ang zelin i hmu ang' tih hi a ni.

Heti zawng hian ti ila, mipate hian hmeichhiate hmangaih thiamin, an kawppui/nupui an nih ang hian han zah thiam ve mai se! Heng 'Pasalte laka awmdan ṭha', 'Hmeichhe fel awmdan', 'Mo awmdan tur' etc. kan tih châmchi mai ziah kur duah reng ngai lo hian mipate hian in dawngin in hmu hian ka ring tlat.

Mipate'n hmeichhe fel leh ṭha, hmangaihna ngah mi, pasalte zah thiam in duh ang tho hian hmeichhiate pawh hian pasal innghahna tlak, pasal thlamuanpuiawm, pasal hmangaihna nei mi, pasal zaidam leh zawldawh, nupuite zah thiam takte hi kan duh ve tho a. Engpawh chu ni se, mihringte hi mihring kan nih ang hian naupang, upa, a hmei a pa hian inzah tawn leh inhmangaihna hi chu kan duhin, kan lawm vek a, chu duhna chu inhrethiam tawn takin, inzah derin, inhmangaih tlang ta mai ila, mipa emaw hmeichhia, upa emaw naupang kan nih vang ni loin. Tunlaia ziak themthiamna kan hmanna tam tak hi kan mamawh lo mai thei asin!

Aaaa! A sawi tur a va tam tak, mahse duhtawk phawt ang.

Kha'ng zawng zawng kan sawi hnu khan, a tlipna atan heti hian;

"Mihring chu mihring a nihna angin a mihringpuite zah dan zirtir la, mihring ngainatawm, zahtlak leh chhawrtlakah a chhuak ang."

Lu chauhin taksa a siam lo a, ke chauhin taksa a siam lo ang bawk hian hmeichhe fel ringawt hian chhungkaw nuam a siam lo a, chutiang bawkin mipa fel ringawtin chhungkaw nuam a siam lo bawk. Nupa chu, nupaa an insiam ni la la khan Pathian leh a mihringpuite hriatpuiin pumkhat an ni si a.

Nupui pasal inneihna hi, inhmangaih tawnna te, inhriatthiamna leh, indawh tawnnate tel lo chuan lungawi lohna, inhauhna, induh tawk lohna, leh inṭhennate hial a thlen ṭhin reng a ni! Chuvangin, i nupui ringawt zaidam leh fel turin beisei lo la, enkawl/duat/zah i duh dan ang tak khan i nupui chu enkawl/duat/zah thiam ve chhin la, i beisei ang chu i dawng let ngei ang. Tichuan nupa hlim, inlungrual in ni mai ni loin chhungkaw hlim, lungrual, entawntlak tak i nei ngei ngei ang!

- Lucy Bawitlung