THLARAU THIANGHLIM A THUAM KAN NI TAWH EM?

"Nimahsela Thlarau Thianghlim chu in chunga a lo thlen hunah thiltihtheihna in la nei ang; tichuan Jerusalem khuaah te, Judai leh Samari ram khaw tinahte, kawlkil thleng pawhin ka thuhretute in ni ang," (Tirhkohte 1:8) a ti a. Lal Isua hian Thlarau Thianghlim hi a dah chungnung hle mai a. Amah aia pawha chungnung zawk ni hial awmin Isua hian a sawi a ni. Thlarau Thianghlim chu Paa chhuak a ni tih a sawi a, Amah a kalbo dawn tawh avangin a aiawhin kan hnena min awmchilha min kaihruai a, kawng min kawhmuhtu ni turin Pain a rawn tir dawn a ti a ni. Keini Trinity ringtute chuan Pa leh fapa leh Thlarau Thianghlim chu thil intluk tlang vek, ṭhenhran theih loh, lan dan hrang mai a ni tih kan Thurin innghahna a ni a. Amah phatsantu Petera a ṭhiante ho khan huaisenna leh thiltitheihnaa thuam an nih hma chuan, chu Thlarau Thianghlim thiltihtheihna chu nghaka chang ngei turin a duh a. Isua chu an hria a, amah pawh an zui, a bulah an awm reng; mahse, huaisenna an nei lo va, anmahniin thiltihtheihna an nei bawk hek lo. Isua an hre fiah tawk lova, Pathian a nihna leh fapa anga lo kal a nihna lah an hre chiang bawk lo. Chung thil engkim hre fiah a, thiltihtheihna leh huaisennaa thuam an nihna tur chuan Thlarau Thianghlim an chan ngei a ngai a ni.

Tunlai ringtu intite zingah pawh hian Kohhrana inhmang, piangthar inti tho si, chakna leh thiltihtheihna nei si lo, mi te hmuh lova sual khawih hreh chuang lo; simna tak nei si lo kan va tam em! Thlarau Thianghlim chang tur inpekna leh dawhtheihna kan neih lohna hian kan nunah Thlarau thiltihtheihna hmuh tur a awm ṭhin si lo. Kohhran leh Biakin lama inla mi tak viau, pawn lama han lem hlek emaw, hmeichhiat mipatna lam kalsan si lo, sum leh pai duhamna leh mahni hmasialnaa khat si kan tam em em mai a ni. Huaisenna kan nei lo va, thiltihtheihna lah kan nei hek lo, setana thlem hranpa pawh ngai lo, thlemthluksa hi kan tam viau awm asin.

Thlarau Thianghlima thuam tur hian mahni inpekna, theihtawpa Lalpa au va, kan thinlung pindan chhungrilte atana pe tura khawvel laka kan inkharkhip tlat hi a ṭul a ni. Thlarau Thianghlim thiltihtheihnaa thuam kan nih hma chuan he pindan chhungril Jerulalem hi chhuahsan lo va, pawn lama dakchhuak miah lo turin Lalpa'n mi duh a ni. Kan dakchhuak hma lutuk ṭhin a, kan nghak peih lo va, kan pindan chhungril Jerusalem hi chhuahsan vat vat hi kan duh ṭhin a, chu vang chuan Thlarau Thianghlim thuamna famkim kan chang thei ṭhin lo.

Thlarau Thianghlim thiltihtheihna kan chan chuan hengte hi kan nei ang:

Huaisenna : Petera meuh pawh Isua phatsantu ni mah se la, Thlarauva thuam an nih meuh chuan a dawihzepna chu huaisennain a rawn thlak a, hlauh reng a nei tawh lo. Pharisai leh Juda mipuiho hmaah huaisen takin Isua chanchin a tlangaupui ta pawp pawp mai a ni. Man a hlau lo va, tihhlum a hlau tawh hek lo; chu chu a ni Thlarau Thianghlima thuamte awm dan chu. Keini zawngin mi mitmei veng reng reng, nalh loh hlau reng reng, mi sawisel hlau reng rengin rawng ka bawl kan inti a, thlarau bo pawh Isua hnenah kan hruai thei lo vang. Pathian hian rawngbawltu, ringtu dawihzep tak hi a duh lo va, Ama tan chuan huaisen taka engkim chân huama A tana thawk tur hi a duh a ni.

Engkim an hrefiah ṭhin : Zirtirte pawh kha Thlarauvin an thuam zet chuan engkim an hre fiah uarh uarh a, an thlarau mit tihvarin a awm a, Pathian thil tumte, Isua chung changte, engkim an hre fiah ta a. Thlarau Thianghlim chuan engkim min hrilhfiah a, rinna kawngte leh a dangte mitvarnaa thuamin an awm ṭhin. Anania leh Saphirte nupa thiltih dik lo pawh kha Petera khan engkim a lo hre vek a nih kha. Pathian Thlarauva thuamte chu finnna leh hriatna thiamin an awm ṭhin. Lal Solomona pawh khan Pathian hnenah finna a dil a, Lalpan a thuam zet kha chuan a finna thu ngaithla turin khawvel ram hrang hrang aṭangin an lo kal a ni.

Thiltihtheihnaa thuamin an awm : Ringtute, Lal Isua tana rawngbawltute tana pawimawh ber pakhat chu thiltihtheihna a thuama awm hi a ni. Lalpa rawngbawltute chu a ṭul hunah chuan damlo tihdam theihnate, ramhuai hnawhchhuah theihna te, thilmak tihtheihnatein a ṭul anga thuamin an awm ṭhin. Ramhuai pawhin a hlauh loh ringtu, thiltihtheihna engmah nei lo rawngbawltu nih hi a va hlauhawm em! Khawvela thila mitvar hle ringawt ringtu, rawngbawltu nih hi a hlauhawm khawp mai. Mahni hamṭhatna tura a chuhhelh helh, mi dang tuarna tur pawh pawisa lo rawngbawltu leh ringtu intih hi thil hlauhawm tak a ni.

Nang ringtu leh rawngbawltu : Lalpa Thlarau chuan thuam che a, chakna pek che a, huaisenna leh thiltihtheihnaa thuam che a duh a ni. Kohhrana inhmang a, inkhawma thawhlawm thawh ringawtah khan lungawi mai suh; Thlarau Thianghlimin a thuam theihna tur chein I thinlung chhungril Jerusalem kha chhuahsan lovin Pathian Thlarauvin a thuamna tur chea ṭawngṭaiin, tihtakzetin lo ngak rawh. Lalpa Thlarauvin a thuam che chuan I nun chu hmuh theihin a lo danglam ang a, Lalpa tana pasalṭha huaisen leh thiltihtheinaa thiamin i lo awm tawh dawn a ni. I nun ringawt pawh kha mi dang tana malsawmna chhiar theih a lo ni tawh ang a, nagmah kal tlangin mi dangin Lal Isua an lo hmu ang a, Pathian an fak tawh zawk dawn a ni. Amen!

- Reuben Lalnunthara Hnamte