HRINGNUN HI...

Ṭum khat chu Durtlang Damdawi­inah khian kan nau dam lo ka riahpui a, kan piah lawkah tlangval, ke dinglam hek huam hi a nu hian a riahpui bawk a, khawngaihthlak tak a ni. Tisa pangngai nei leh tur chuan hun rei tak a duh ngei pawhin a rinawm. Nimahsela, a nu chuan chu damlo awmna room chu boruak nuam takah a siam thei tlat thung; a hmel hmuh a nuamin a ṭawngkam a zangkhai hle.

Kan ngaina ta thuai a, a fapa damlo din­hmun aṭanga ka ngaihtuah phei chuan mak ka ti hial zawk a: harsa ve tak chhung­kua aṭanga rawn awm ve bawk an ni.

Nimin thil thleng avangin vawiin ka lawmin ka hlim a, naktukah enge thleng leh dawn kan hre chuang hauh lo a, a ṭhen chu mittui nen hun an hmang a, a ṭhenin beng thleng thlengin bawp an khai bawk a. Nimahsela chutiang thil chu a ngai rengin a thleng bik lo a, nimina hlim te kha vawiinah chuan an lungngai a, nimina ṭap te kha vawiinah chuan an nui leh bawk thung a, hlim reng tum mah ila a theih chuang loh a, lungngaih reng pawh tum ila a theih chuang hek lo.

Chutiangah chuan engtinnge nang leh kei hian hun leh nun hi kan hman zel ang a, engtin nge kan inbuatsaih dawn? Har­satna hrang hrang bakah thihna hial pawh kan hmaah hian a awm tih hre rengin dawng sawng reng thei tura kan inbuatsaih a ngai a, a lo thlen hunah pawh chiai mai lo a kan awm theihna turin kan inpeih reng a ngai a ni.

Durtlang Hospitala damlo na tak tuar tlangval kha na hle mahsela a kianga awm reng, amah enkawltu a nu thinlung erawh entawn tlakin a awm tlat thung a, hmeichhe awm nem te mah nisela a thinlung chu a hausain a ropui tlat a, patling tam tak tluk loh a nih avang chuan damlo khuma awm reng tur te chuan thei leh thei loin an pan a, a kiangah hlim takin hun an hmang fo thung si a ni.

Lehkhabu pakhat ka chhiar chu, ‘Ropuina Dik Tak’ tih thupuia hmanga hmeichhe naupang ziak hi a ni a, chu chu hei hi a ni. Ropuina dik tak chu neih tum avanga neih mai theih a ni lo. I zawn loh hunah chiah i nei thei a ni. Thawmhnaw ṭha tak tak te hi a ṭha khawp mai. Thawmhnaw ṭha tak tak han inbel hi chuan tuihnai tak anga lan a awl hle. Mahse ropuina tak tak i hmuh duh chuan thawmhnaw chhe tak inbel chung pawha thawmhnaw ṭha inbel ang maia khawsa thei hi en mai rawh.

Vawi khat chu ka nu naupai laiin an inah sava pakhat, ‘bill’ an tih chu an khawi a. Bill chuan a ke a ti tliak hlauh mai a, a thih mai te pawh an ring a, a nih loh leh tihhlum mai pawh ṭha zawkah an ngai hman a ni. Nimahsela, a tuk khua a lo var chuan a ke ṭha lam hmang chuan awn ang tei tawi hian a lo ding hram hram a, a lo zai vet vet mai a, chu chu ‘Ropuina Dik Tak’ chu a ni.

- Mahmuaka Chhakchhuak