Hnam dang Bawngsa zuar

Mizo Bawngsa Zuar Association chuan Mizorama hnam dang Bawngsa zuar an ngaihmawh thu an auchhuahpui ta a, May 13,2024 thleng hun an pe a, an insaseng loh chuan an chungah engpawh thleng se an mawh a ni ang, an ti ta rup mai.

A ni tak a, Aizawl khawpuiah hian hnam dang Bawngsa zuar an awm ta nual mai a, Pathianniah pawh an talh a, lei tur a awm ta fur mai. Heng hnam dang Bawngsa sata zuartute hian ILP an nei ngei ang a, mahse an permit ah chuan Bawngsa zawrh a tel kher loh a rinawm. A tam zawk chu cement mistiri te an ni fur ang. Chutianga phalna nei loa sa lo zawrh chu an tan dan kalh a ni a, an insaseng pawh a ṭul viau a ni.

Mizo sazuarte chuan May 13 hnu lama an tilui a nih ngat chuan an chem sen an lek duh ngeiin a rinawm a. Thisen chhuahna leh tualthahna hial pawh thleng thei a ni. Chumi thleng lo tur chuan sorkar pawh a chet a /ul ngei ang.

Mizo zingah hnam dang sumdawng hum duh tlat te, an hminga hnam dang sumdawntir an tam em em a, sazuar chang pawh an ni lo. Bungraw engkim mai hi Mizo hminga hnam dangin an zawrh a tam ta em em mai hi a ngaihmawhawm takzet a ni. Chutih rualin a haw haw zawnga hmalak erawh a ṭha lo ang. A ruk deuha hmalak te, dan kengkawhtute kuta dahte a ṭhat a rinawm.

Hetih lai hian Mizo Bawngsa zuarte pawh an inenfiah a ngai hle mai. Mizo aia hnam dang dawr an nawm miau chuan tu nge dawr lo lém ang le. Hnam dang dawr chu a nuam fe zawk si.

Vaiho sa sah chu duh lai lai a lei theih laiin, Mizo sa sah chu thinrim urhin kan indawr fo mai. Mizo sa zawrh lei chu duhlai kawhna sir/bul chiah chiahte min han pe tlat a. A rukin a sa chhia an ṭham tel thiam em em mai lehnghal. Inah han enfiah ila, kg khat kan leiah pava khat deuhthaw paih ngai a ni fo a ni.

Mizo sa zuarten hnam dang an ngaimawh a nih dawn chuan anmahni inenfiah hmasa se a ṭhat a rinawm. Mizo sa zuar dawr bakah thil huphurhawm hi a vang viau ang. A ti hlang rate a awm a, a thin rate a awm hrang a, a ruh pawh a hrangin rate an siam a. A ti kan han leite hian a thau chhia an telh lui tlat te, a thin leiin a thin lo thil dang an buk telh ṭalh maite hian lungawi a har hle.

Chuvangin hnam dang Bawngsa zuar an ngaihmawh a, an hun tiam a ral hma hian anmahni inenfiah hmasa se, mipui lungawina anga an sa zawrh min leitir theih hunah hetiang hmalakna hi mipuiin kan thlawp ngei ang. A nih loha a pawnga puia tihtawp ringawt hi a dik bik lo ang.

- Lal Rinmawia