Geneva-A Jail Tan Thu
Hmanni khan kan zin dawnah ka mobile ka ti ruak vek a. Silai leh chempui, chemte, hruihrual, fatu bungrua etc. pictures a awm nual si a.
Geneva to Paris thlawh dawnah ka hand bag ah chemte, ka zin apianga booking-a ka ken tel ṭhin a lo awm ta kauh a, kan buai zo ta, an han teh thul. Phal loh tawp, weapon keng charge-in min charge ta a. Ukil leh doctor ka mamawh loh thu ka sawi a, insulin leh sugar test-na kan nu bag- ami ka la a, kan nu chu hotel-a let leh turin a inbuatsaih a. A ṭhiannu Zurich-a mi a call bawk a. Kei chu min man chu a ni ta reng mai a.
AirPort ah darkar 2 vel min hreng a, statement tam tak, ninawm khawpa tam min la a. Geneva police station-ah kutkawl nen tang motor changkang fahranin min phur ta vang vang a. Ka thla an la, ka ka an hawlh thul (DNA), ka kut zungṭang leh ka kutphah print an la a. Jail tang dik tak ka ni ta.
Tlai thim dawnah court-ah min hruai a, sapṭawng an thiam tih ka hre reng mai si a, khunkhan em emin procecutor chuan an ṭawngin rorelna thu a puang a, ka bula ṭhu; sawrkar advocate khan sap ṭawngin a let a. Intentionally-a crime khawih tum ni lo, weapon lo pai ve ngawt- crime thubuai min awrhtir ta a. Indian embassy emaw kan ram (Mizoram hi ram dang emaw an ti tlat a, Government of Mizoram tih chuang documents ka keng nual bawk nen) hrilh kher an tum loh thu min hrilh a, ni 10 chhunga ka appeal theih tur thu nuisang chungin min hrilh leh a. Case erawh chu kum 5 chhung a dam tur thu min hrilh leh thlap a. Kan inchibai a, ka zalen ta. Court proceedings leh Record kha film-a kan lo hmuh fo ṭhin ang hian negro nulain computer-ah rang em emin a chhu zawih zawih a, a tawpah procecutor chuan a copy min hlan a, ukil nen chuan pawi an tih thu sawi mawlh mawlh chungin min chibai leh a. Negro nu pawh chu ka pan a, ka va chibai ve leh hram a. An polite ngawt mai.
Ka bag nen jail/police station chu ka chhuahsan dawn ta a, police-ho chu ka bye bye hman ṭep a, police sek zetin remote control hmangin gate pui a’n hawng mai chuh. Keimah chauhin gate lian em em mai, thlawhna thuhrukna gate ni mai awma lianah chuan ka chhuak ta a, ka thawl mang e.
Ka phone ka on vat a, kan nu ka call nghal a, ani pawh chu Hotel-a let lovin AirPort chhuatah muthmun a lo siam et a. Ka thleng a, airport restaurant-ah ka inhnawh puar a. Hawh, rail-in Paris pan mai ang ka ti a, hlim em emin kan inak chhuak leh dawr dawr a. Rail chu zan reiah an lo tlan lo mauh mai a, airport-ah bawk kan phei leh a. Paris thawhna hmasa ber ticket kan la a, a hma nia min hrengtu airport police-ho kha an lo duty tawh bik lo va, an fair hrim hrim a, kan haw hran lo.
Sum chu kan khawhral phian a, mahse pawi kan ti lem lo, kha experience kha sum tam taka kan lei phak loh thil a ni. Europe zin hun a awm leh a nih pawhin fimkhur a ngai zual ta, ka case kha kum 5, DNA hmangin min chhinchhiah tlat mai a.
- Dr PC Lalramenga, MD