RAWNGBAWL HIAN ENG CHEN NGE A HUAM LE?

Mizote hi Pathian thu duh mi tak leh Pathian thuah pawha kal nasa tak hnam kan ni a. Biakin inkhawm leh kohhran thil tih kawngah pawh khawvelah pawh hian han thlir ila, a ti ṭha pawl tak chu kan ni ngei ang. Zai lamah lah kan tui a, zaithiam lah kan ngah hle bawk. Rawngbawlna lamah pawh hian tuiin rawngbawltu kan ngah a, thusawi theia pui lah kan hnam tlem ang ai chuan kan hausa hle. Kohhran hrang leh Para church-ten missionary lah kan tir hnem a, kan state pawn lam mai ni lovin, India ram pawn lam hla tak thlengin missionary pawh kan tirchhuak hnem bawk a ni. Khawvel pum han thlir pawh hian kohhran chet velna leh rawngbawlna kawng hrang hranga kan ram state tereuhte hi a ti ṭha pawl tak kan ni hial awm asin. Inkhawm lah kan ngah a, zan tin deuhthaw hian inkhawm a awm tih theih tur a ni a, kohhrana inhmang tak tan phei chuan zan awl hi a awm meuh lo a ni. Chutih rual erawh chuan kohhrana kan chet phung leh pawn lama kan chet dan hi a inthlau deuh ni hian mi ṭhenkhatah chuan an ngai thei a. Kohhran leh vantlang nun hi hrang hlakin kan dah emaw tih mai tur ni hian a lang.

Ni tin kan hnathawhna sorkar office leh hmun danga kan thawhna leh, kohhrana kan awm dan inthlau fe fe pawh sawi tur an awm ṭhin. A eng ber hi nge Pathian rawngbawlna kan tih a, eng chen hi nge kan huamtir tih lai hi kan thlir thiam lo em ni ang? Kohhrana inhmang leh fel tak tak nia lang si, ni tin office hmuna a dawrtu tana biak hrehawm tak, ṭhenawm khawvengte tan pawha hrawn nuam lo takte pawh hi sawi tur kan awm nawk ṭhin a ni. Hengte hi kan pianthar tawk loh vang nge ni ang a, rawngbawlna kalphung hi kan man lo tihna zawk nge ni ang? Piangthar lo han inti ila chuan kan haw hle hlawm awm si a. Evangelist nia thu hrilte, kohhrana nihna neia inhman leh sunday school-a zirtirtu nih te, kohhrana thuhriltu han nih te, missionary chawm nana pawisa han thawhte leh a dangte pawh, hengte hi em ni rawngbawlna nia kan sawi deuh ber tih hi zir tham tak a awm a ni. Pathian hian kan thlarau chauh a chhandam lo va, kan rilru leh taksa thlengin min chhandam a. Kan chenna turin khawvel min pe bawk. Kan nun khawchhuah theih nan ei leh in tur leh khawsakna min pe bawk a.

Rawngbawlna hian a nihna takah chuan a huam zau asin; ni tin mi dangte nena kan khawsak honate, kan ni tin hnathawhte hi a nihna takah chuan rawngbawlna vek a ni. Politicste, sumdawnnate thleng hian rawngbawlna a ni vek mai. A nihna takah chuan kohhran chauh hi rawngbawlnaa kan ngaih avangin ni tina hna kan thawh leh, sumdawnna thleng hian mahni hlawkna um reng reng hian kan phé a, a mawi leh mawi lo ngaihtuah miah lovin kan duham a, kohhran pawn lamah chuan pawisak vak kan nei lo ni ber hian a lang ṭhin a ni. Pathianin min din danah hian mahni tan chauha hlawkna uma phe tur ni lovin, mi dangte tana malsawmna ni turin min din a ni. Biakin pawn lama rawngbawlna hi a pawimawhin a thawk hlawk hle a, mahni kohhran leh kohhran chhung maia rawngbawlnate hi chu a huam a zau lo zawk a ni. Thufing pakhat chuan, “Damchhung nun, Nunna lallukhum leh ropuina chu nungchang hi a ni a, mihring thil neih hlu ber a ni,” a lo ti a. Biakin pawn lama kan nungchang awm dan, ni tina kan hnathawhna hmuna kan awm dante hi a va pawimawh em!

A bik takin hnathawhah rau rau pawh damdawi lama thawkte hi mi dangte tan an pawimawh lehzual, ti ila kan sawi sual tam pui lo vang. Mi dangte tana damna leh thihna thuah mawhphurhna sang tak an nei a ni. Tunlai huna kan rama Damdawi lam thawkte sawisel an hlawh fo mai hi a lungchhiatthlak hle a. Damdawi lama thawkte an hna pawimawhzia hi an inhre lo emaw ni ka ti ṭhin. Mite kan hmachhawn danah hmelhriat leh hriat loh, mi lian leh rethei deuhte inkar zau lutukte hi kan dah bo a hun tawh. Kan ram kristianna nen hian a inhmeh thlawt lo. Damlo mi mangangte tana dawr hrehawm lutukte, thlamuanpuiawm loh lutukte hi a hriat a hrehawm hle mai. Damdawi lam thilah pawha mahni hlawkna kan um lutukte hi kan bansan va hun em! Mi lian leh mi te emaw, hmelhriat leh hriat loh thliar lo va, min mamawhtute tana theihtawp chhuaha mahni hlawkna um hauh lova kan dinchhuah hi a Pathian thuin, a Kristian nun em em a ni tih hi I hre thar teh ang u. Damlote tana hriat hrehawm tak; awka vin leh bakhlak maite han hriatte hian natna hi a tizual thei zawk hial a ni. Damlote tana dam sawng sawngna tura ṭawngkam hawihawm leh nem kan hman ṭhinte hian damlote tan dam sawng sawngna a thlen thung ṭhin asin. Private clinic-a inentirna man sang ta lutukte pawh hi mi retheite tan chuan phurrit a ni tawh.

Mizorama kan damdawi company hman ṭhinte leh phai lam mite hman hi a company a inang hauh lo maite hi mak tak a ni. Damdawiah pawh hian company ṭha leh rintlak chauh hi kan lei ṭhin a pawimawh hle a. Vawikhat chu ka damdawi ei ṭhin ang tho hi a aia man tlawm zawk company dang ka dawr a. A man a tlawm zawk fe a, damdawi lam thiamten a inang tho, a company a hrang mai mai an tih avangin ka leiin ka ei ta a, mahse, ka sim chiang hle. A man a tlawm tih avanga lei ngawtte hi thil tihchi a ni mai lo tih ka hriat phah. A pawimawh ber chu vantlang tana hnathawk leh mipui dawr ṭhinte kan nih hi Pathian rawngbawlna pawimawh tih hria a, mi dangte tana ding kan nih inhriatchian hi a ni. Mi tu pawh hi inmamawh tawn hun nei vek kan ni a. Tuna dinhmun chhe tak pawh dinhmun ṭhaa a rawn dinchhuah hun a awm a, tuna dinhmun sang tak pawh dinhmun chhe taka a din hun a awm bawk. Mi tu mah hi inbe chhe thei leh inhmusit tur kan ni lo. Pathianin min din danah hian mahni tan chauha nung tur ni lovin, mi dangte nena nungho va, inṭanpuitawn a, intihlim tlang turin khawvela cheng tura siam kan ni tlat a ni.

- Reuben Lalnunthar Hnamte