Doctor leh Nurse-te u

Kan damlo a, hreawm kan ti a. Damdawi lama thiamna nei lo ta ngang chuan kan nat chhan tur awmang kan ngaihtuah a, ṭul hlei loah kan taksa pengte chu kan hmetin kan zut kual vak vak a; natna rapthlak takin min hmuak ang tih hlau reng rengin kan rilru kan sawrbing a. Ngaih a ṭha lo a; mang a ang a, ṭul hauh lo ngaihtuah lâwk chung leh en ngai en tlawk tlawk chungin in hnen kan lo thleng ṭhin.

Ho têa in ngaih leh sawi ṭul lo anga in ngaih, "A hlauh-awm lo a nia" tih ṭawngkam ringawt pawh ni se, in hnen aṭanga dawn ringawt pawh hi kan tan damdawi ropui a va ni tehlul em! A dik tak chuan nangmahni dawrtu mipuite hian lu a nata nachhawkna ei leh a chhehvel chhetê bak hriat kan nei miah lo.

Uluk taka in damdawi min chawhte chu kan dampui a, kan hlim pui ṭhin. Theih ni se kan lawmthu sawina atan engemaw rawn hum vete hi kan châk a, kan neihin a tlin si lo. In hnena lokalte hi Bible-in mi hausa leh rethei a tihte kha kan ni.

In damdawiin inkaihhruai-na leh awmdan mawi, in duh zawng leh kan hmachhawn dan tur che u hi kan hriat loh a leiah hauh ngai te pawh kan ni a, a awm e. Chutiang karah chuan chetsual zauh chang in nei ang tih hi kan ring.

Mi neinung zawkte in enkawlna kiangah damdawi leina pawh nei lo, damlo na si, ner reng maite chu in hmuh hmaih lo a. Mi mangang leh harsa, damdawi man pawh nei lote chu damdawi leina tur pawisa in pe ṭhin tihte hi hriat nuam a va ni tehlul em!

Heng in thil ṭha tihte hi sawi chhuah châk châng awm mah se, hmingṭhat khel loa rawngbawlnaa ngaia in tih a nih miau avangin a ṭhente phei chuan sawi chhuah pawh in la duh lo fo a, Mizo nih in ti nuam a ni. Heng thu te hi in beng bula sawi mai aia zaua sawi hi a phu tih kan hria a, kan sawi chhuak ve a nih hi.

- Lalnuntawma Fanai