UPSC CSE EXAM 2023 RESULT A CHHUAK TA

Kum 2023 Session-a Union Public Service Commission (UPSC) Civil Service Exam result chu nimin 16.4.24 khan a chhuak ta. India hmar chhak aṭangin hlawhtling 20 an awm a – Manipui aṭangin 10, Assam aṭangin 6 leh Nagaland aṭangin 4; Hmar chhak aṭanga tling awm lohna 'NIL' te chu Arunachal Pradesh, Meghalaya, Mizoram leh Sikkim te kan ni.

Nagaland aṭanga tling 4 zinga 2 hi hmeichhia an niin a lang a; Manipur Zofate aṭanga 5 tling zinga 3-te pawh hi hmeichhia an ni a, mipate aiin an sang vek a ni: Carolyn Chingthianmawi AIR 543-na, Chinzoukim AIR 768-na, H.Haukip AIR 898-na, Ch. Aimol 921-na leh Domonic Haokip AIR 994-na te an ni, an chhuanawm hle.

Kan hriat ṭheuh angin nikum May thla aṭanga tun thlenga buaina rapthlak takin a chìm mek karah, hetiang zat kan Mizopuite an la tling thei hi Pathian khawngaihna te, an tuar chhelna leh tum ruhna vang te a ni ngei ang; kan lawmpui tak meuh e.

UPSC hian a hranpain 1979 aṭang khan IAS Exam, IPS Exam, adt tih ang hi a buatsaih ngai tawh lo va, 1979 aṭang khan CS Exam hnuaia Service hrang hrang, All India Service (IAS, IPS (Police), adt leh Central Services Gr. 'A' te IAAS, IRS, ICAS, IDAS, adt, a vaiin 20 chuang zette chu vawi khatah exam a ni ṭhin; kum 45 liam hnuah pawh heng service zawng zawng a hlawma sawi nana Mizoram chhunga ṭawngkama 'Central Service' tia kan vai hmer vek zel leh, IAS Exam tia kan la sawi fo hi chu sim a ṭha tawh ngawt mai. Heta ṭang hian CSE Exam chungchanga a mi nawlpui rilru put hmang pawh a lang ruak thei a ni; inelna rilru (Competitive Exam spirit) dik tak kan nei tawk lo tihna pawh a ni thei ang.

Tunah chuan Mizoram Sawrkar hnuaia thawk mek zingah hian UPSC CSE Exam aṭanga tling IAS pakhat mah kan awm tawh lo; ṭawng thu chhe lovah, tuna Mizorama thawk mek Indian Administrative Service (IAS) leh Indian Police Service (IPS) kan neihho hi promoted IAS/IPS vek an ni; Mizoram pawnah UPSC CSE direct recruitee IAS 4 chauh an awm bawk a, hetianga Indian Federation awptu Mizorama piang leh sei lian, direct recruitee IAS 4 chauh kan nei ta hi a lungchhiatthlak tak zet a ni. Service sang berte – IAS, IFS, IPS mai bakah Central Service Group A leh B pakhat mah tling thei kan awm ta lo hi chu Pathian ṭih chungin, kan 'tlakchham' zawn chhuah a, kan ṭhalai an inziah tlin leh theih nana thapui chhuah a ngai tawh hle.

Mizorama la thleng ngai lo, UPSC CSE-a direct recruit-a inziak tling ngat, a Pathian ṭihna vang te, a tawn hriat ngah bik vang te, mi harsa khawngaihtu a nih vang te, ram a hmangaih êm vanga a tuar rei leh tuar a chhel vangtea mi tam takin 'Super Chief Minister' tia a hming an sak kan nei mêk a, Ministry dang angin term kum 15 emaw kum 22 emaw te ministry han chelh ve se la kan ziaawm deuh turah ngai ila; Pathiana rinna nghat chungin beiseinain ṭhalaite an rawn inziah tlin tik ni hi inher chhuak leh turin, rinna leh beiseina mitin kan thlir a ni. A hnam pum anga UPSC CSE-a NIL reng mai hi zawng, kan hnam hmakhua thlirin a hrehawm tak zet a ni.

- Dr J.T.Vanlalngheta