Ui seh tih reng mai hi

Zonet Zing Daifim ah hospital leh police station hrang hrang report kan hmuh ṭhin. A bikin Civil hospital Aizawlah tuk tin darkar 24 chhung report tarlan danin, "Ui seh" report a tel ziah hi a pawi hle.

Ui hi a vulhtute tan chuan ran ngaihnatawm ber a ni a, chhungkaw member ang chiaha en an hlawh a, duat pawh kan duat hle a ni. Ui hi ran zingah mihring min tihlimtu ber a ni a, hlim lai leh thinrim lai, chhungkaw innghirngho lai pawhin an rilru puthmang a danglam ve ngai lo. An ngainawtawm a ni.

Chhungkaw tam tak chuan chuti khawpa ran ngainawtawm chu duat pawh an duat hle. An chettlatna chin pawh an hria a, engtiklai pawhin an vil ṭha em em ṭhin. Khawlaiah pawh an tel lo chuan an chhuahtir mai mai ngai lo. An chhuahpui a nih pawhin an zun dawn pawhin mi tana hnawksak lo hmun an panpui hram ṭhin. An ek pawhin an thiarna tur lehkha emaw an keng ziah ṭhin.

Chhungkaw tam tak erawh chu ui vulh leh duat ve si, tladah taka khawi ta mai mai pawh an awm ve leh thung. Hengho hi chuan zingah pawna an inthiar nan hun an pe a, an chhuah mawl tawp a. Kawngah emaw, min gate bul leh mi compound-ah emaw an e fo ṭhin. An hnawksak em em a ni.

Ui hi vulh khapna em chu sorkarin a chhuah lo a, mahse khawlaiah chhuahtir lo tur chuan thupek a siam fo ṭhin. Khawlaia chhuah phal loh ni mah se ngaihsak lo pawh an tam hle. Mi kut palh pawh an tuar fo bawk.

Veng tam takah chuan khawlaiah ui vak rawlai an awm mang lo. Veng mipuiin Local Council leh VC thu an awih em em a ni. Sawi tawh angin mi tam tak chuan ui an chhuahpui pawhin an ek thiarna tur nen an inring ṭhin.

Ui seh tam lutuk hi engtia tih ziaawm tur nge ni ang. Ni tin ui seh vanga hospital pan an awm reng si. Chhungkaw ṭhenkhat chuan an ui tladah takin an vahtir mai mai vang te, an ina lengte laka an ui an khuahkhirh ṭhat loh vanga seh ta mai mai an ni chawk.

Ui vulhtute hian an ui chu natna hri danna jection emaw an ti ngei ngei tur a ni a, an tih loh chuan mi a sehin natna hrang hrang an kai thei tih hriat a ṭha. Ui kan vulh duh a nih chuan Dan zawm mai tur a ni.

Khawlaiah ui a chhuak a, a neitu tan chuan duhawmin ngainawtawm viau mah se, a neitu lo tan chuan tenawm tak, hlauhawm tak an ni duh. Chuvangin ui kan vulh a nih pawhin ṭhenawm khawveng tana hnawksak loa kan enkawl hi kan tih makmawh a ni.

- Lalkhirhvela