TUI I RENCHEN ANG U LE! MAHSE…

Mithiam ten an sawi danin tuna kan chenna planet-ah hian Tui hian hmun 3-a ṭhena hmun hnih lai a khuh/luah a, khawmual mihring chen theihna chin chu hmun khat chauh a ni e, an ti a. Kan chenna khawmualah hian Tui hi 97.5 % lai mai chu Tui ei tlak loh leh ei theih loh Tui al a niin, mihringte tana tui ei tlak chu 2.5 % chauh a ni e, an tih chu maw le! Mizoram bikah Ṭhal kan lo hmabak leh ta reng mai le! kum kal tate ang bawkin Tui lam enkawltu Sawrkar PHE Deptt. lam aṭangin mipuite hnena ngenna – kumin chu Tlawng luiah tui a tlem avangin kum danga kan tui pump chhuah ṭhin ang Tui pump chhuah tur a awm lo, 200000 gallon bak nikhatah kan pump thei lo emaw; Power supply a awm ṭhat loh avangin duh angin tui kan pump thei lo emaw, Tlawng aṭanga kan tui pump chhohna pipe Lawipu bulah a chhia a, siamṭhat mek a ni. Chuvang chuan mipui lamten tui kan ren a ngai tih thawm pawh kan hre leh hnai tawh turah ngai ta ila.

Aizawl Greater Water Supply hi a tira mipui chawm tura hisap aia a leta mipui kan lo pun ve tak avang pawh a ni ang e, Aizawl khawpui bikah hian tui indaih lohna hi a nasa ta hle mai. Deptt. lamin min ngen kher loh pawhin kan ni tin nunah hian kan mamawhna phuhru tho siin mipui lam hian tui hi kan ren thei reng, a nachang kan hriat loh vang leh kan tum loh vang mai niin a lang!

Brig. T.Sailova chanchin an sawi ṭhin pakhatah chuan a inbualin Tui balṭin ( litres 10 dawng ) bak a hmang ngai lo an ti ṭhin, a tak tak a nih ka ring (Hmeichhia biakah chuan an lu suk nan a ngaih hnem deuh avangin a theih ve kher lo mai thei e). Tui hi a ren theih a ni, entir nan tap-ah hmai ka phih dawn a, tap kha ka on reng chuan tui kha hman lovin a liam thlawn mai mai a ni, chu ai chuan tap aṭangin noah dawh ta ila, tap-a ka hmai phihna chanve aia tlemin fai takin hmai kan phih theih tho hmel! Chutiang zelin kan inthiara commode kha flush kher lovin, noin bucket-a tui awm khan commode kha tleuh ta ila, fai tho siin tui chu kan hmang tlem zawk ngeiin a rinawm deuh.

Aizawl khawpui khawi vengah mah hian Tuikhur tui ei atana hmang kan awm ta meuh lo, Sawrkar PHE tui kan ring ta vek a nih hi! Congress Sawrkar lai ( 2008-2013) PHE Minister khan a tiṭha khawp mai a, karkhatah tui vawi 2 an sem mai bakah khan tui lo haw dawn khan consumer-ten tui sem tur message-in min hrilh ṭhin a, mahse khatiang kha chu a awm thei leh ta rinhlo chu a nih tak hi. Tin, mipui lam lahin kan Tuiputen tui an rawn semin an tuisem liam pur pur khawpin tui kan hawtir fo mai! Tui renna chang hria leh han off mai nachang hria kan tam lo tlat ṭhin hi a pawi a ni. Tlawng aṭanga kan tui pump chhuah hi PHE Deptt. hian mihring eitlak turin damdawi hmangin an tithianghlim ṭhin a, ei tur atana tih a ni nachung hian Motor silna atan leh pangpar tui pek atan mai mai kan hmang tho mai te hi, sim ṭheuh thei ila a ṭha khawp ang le.

PHE Deptt. lama kan hotute min hrilh danin Tlawng aṭangin Tuikhuahtlang thleng, Tui pump chhoh nana kan sum senso hi Tui litre khat zelah paise 7 a ngai an ti a. Chutih laiin mipui lamin tui mana kan chawi chu litre khatah 4 paise chauh a ni thung a, a awmzia chu litre khatah paise 3 zel hlauhsain mipui min leitir tihna a nih chu. PHE Deptt. in an tui pump chhuah thawktu hlawh (Service charge) tel miah lo pawhin tui litre 5000 kan dawn chinah chuan, a tlem berah Rs 350/- tal kan chawi a ngai dawn tihna a ni. PHE Deptt. tui sem han hman zawh chiaha tui han lei hian kan tui man atana kan sum senso chawi tlem ṭhin si zia chu a hriat theih mai awm e. Chuvang chuan, PHE Deptt. Lam pawh hi inthlahrung hauh lovin tui man hi chu an pump chhuahna ang tal hi chu mipui lam hi min chawitir ve ta se, mipui lam hian na kan tih ka rin loh mai bakah tui man hi sang ta se, tui renna changte pawh hi kan hriat phah zawk mahna le!

Aizawla cheng chhungkaw tinte hian tui hi I ren ṭheuh teh ang u, tiin kan inngen ni se. Chutihrual erawh chuan, Tui lam enkawltu PHE Deptt. pawh hian harsa tak leh Sum tam tak senga Tlawng lui aṭanga Tuikhuahtlang thlenga kan Tui pump chhoh, Aizawl veng hrang hranga an sem darh leh ṭhin hi ren nachang hre hmasa ve phawt se. Chakai nufa kal inzirtir ang chauh mai kha ni lovin bul han ṭan hmasa ta se! Tui ren rawh u, min ti a, a Deptt. lam hian han ren hmasa ve phawt se a ṭha lo'm ni? Kan vengah hian mimalin tui kan lakna T.Cluster an tih ang hi 89 a awm thu kan veng lam bialtu PHE lam hotuten min hrilh a, heng Cluster kan tihah hian tui sem a nih a tui a lo haw apiang hian a dir tur tur ṭhin, tih phui vek a harsa a nih pawhin hetiang ang em ema harsa tak leh, sum tam tak senga kan pump chhuah a liam zur zur ṭhin mai hi tih tawp ni se, kan ziaawm phah zawk ka ring deuh tlat nia maw le.

Kan venga cluster pakhat aṭang hian tui an sem apiangin tui litres 100 lo luang ral ta ang se, cluster 89 aṭang chuan tui litres 8900 a luangral dawn tihna a ni a. Aizawl veng hrang hrangah cluster eng zat nge awm ang a, tui hi eng zat tak luangral ṭhin ang maw le? Chuvang chuan, PHE Deptt. hian harsa tak leh sum tam tak senga kan tui pump chhuahsa hi a riral mai mai loh nan, humhalh hmasain cluster leh tui pipe aṭanga tui put ṭhinte hi titawp turin hma han la hmasa phawt mai teh se. A zavai leh a pumpuia kan tireh thei ta lo a nih pawhin a chanve pawh tireh ila, kan va han hlep hnem dawn tehreng em! Chakai nufa inzirtir ang ni lo deuhin kan sawrkar Kalphung thar duhtute hian hma han la hmasa thei se, a va ṭha dawn em ve le.

Mi tinin tui I renchen ṭheuh ang u.

- Diktea : 9436146933 (M)