TOURISM THAILAND-AH

Kumin a Mizoram sawrkar Budget Session-a an thusawi pakhat Mizoram sawkarin Tourism Industry lam uar zawka hmalak leh kan State Income pakhat tling ve ngei se an tih thu kha ka lo thlir ve a, a lawmawm hle in ka hria. Khawvel sawrkar hrang hrang Tourism lama hlawhtling leh an ram sum leh pai lak luhna kawnga Capital Income nei ṭha tam tak zingah pahnih khat han sawi lan ka duh a, chumi zinga pakhat chu Singapore sawrkar khi a ni. Kan hriat ṭheuh angin Singapore sawrkar khi khawpui lian tak pakhat chauh a ni kan ti thei ang. A Area sqkm 6.39 a ni a. Mihring maktaduai 5.5 lek an cheng. An lawngchawlhna International Free Sea Ports leh Airport-te chu a lun em em reng a, khualzin tourist-te chu nitin hian a sang tel an lutin an chhuak reng tluk a ni. Five Star Hotel ringawt pawh hi 850 lai a awm a, three star hotel engemaw zat a awm bawk. Singapore Airport-ah hian thlawhna lut leh chhuak hi minute 5 danah inthlak reng ang a ni. An sawrkar sum hmuhna Capital Income lian ber chu Tourism hi a ni, an Per Capita chu 71% a nih laiin keini chu 7-8% vel chauh kan ni a, khawvel ram intodelh zingah pathuma lai an tling pha an tih chu.

Khawthlang lam Qatar sawrkar pawh hi sawrkar lian leh ram lian a ni lem lo a, mahse, sawrkar intodelh tak kan ti thei ang. Anni hi khawvel khuazin phur thlawhna Airline an ngah a, tlawm thei ang leh tam thei ang ber in Airways an nei a. Chungte chuan khawvel pum hi vet chhuakin Passangers an phur kual zung zung ṭhin. An khawpui chu Doha a ni. Tourism Indutries-ah an hlawhtling hle a ni.

Thailand Tour: Kan sawi tum tak Thailand tlawh thu han sawi tawh ila. Thailand ram hi Mizoram chhim khawchhak Burma ram chhakah a awm a, Mizoram aṭangin hnaite a ni. An khawpui chu Bangkok a ni a. An infiamna chi khat Muay thai hi khawvel deng chhuak khawpa lar a ni tawh bawk. A ram chu sqkm 513115 laia zau a ni a, mihring maktaduai sawmsarih lai awmna a ni a. Myanmar ram aiin a te hret a, mihring erawh chu an tam zawk thung a ni. Hmasang an pipute lo chhuahna chu Chhinlung chhuak an inti ve tlat mai hi a makna chu a ni. Amaherawh chu chhinlung he laia “l’ ri hi an ni chuan ‘l’ leh ‘r’ ri pawlhin an lama, Mizoin ‘l’ ri hlawm ang hian a ni ve lo. A tlangpuiin keinni aiin an ngo deuh hlek a, an Complex a nalh deuh zawk mai thei. Mizo nen pawh kan inang viau mai.

Ni. 12.03.2024-ah chuan Thailand Pattaya Coral Island kan tlawh, motor boat-in tuifinriatah kan tlan kual vel a, a nuam hle mai. Tuipui chungah inpui pakhat platform zau nuam tak aṭang chuan Parachute-a uaiin van sang takah thlawk chhoin,tah chuan kan han leng vel a, a thlawh man pawh kan ram pawisa chuan 1800 dawn lai a ni a, van boruak sang takah Paragliding-in kan han thawk ta a, tlem chuan vanram kan hnaih hmel hle a, nuam delh delh tak a ni. He tuipuiah hian tuihnuai luhna form-a inthuamin tuipui luhna a awm bawk. Tin, tuipui kamah hian Tourist an tam hle a. Europe, China, Russia leh ramdang khulzinte nen vaukamah chuan kan cheng sup sup mai a ni. Kan rama Tuirial Electric Power khuah liah pawh hian Paragliding hi a tih theih ngeiin a rinawm a.

Sawrkar hian Tourism hip nan han buatsaih se, khualzinte hip nan a ṭhat hle a rinawm bawk. Chawhnu lamah chuan Germs Gallery hmunah lunghlu laihchhuahna kan tlawh a, rel (train) te chiin kan fang. Tlang kang leh lirhnghingin a vawrh chhuah lunghlu chi hrang hrang laih chhuahna hmun kan fang a, mihring lema siam a laitu leh lo sawngbawltute a lem nen kan hmu, a tak ni chiah lo mah se, thil awm dan tur chu a hriat theih hle. Chung lunghlu engmawi a var, a dum, a sen leh rawng chi hrang hrang a chei, zungbun, bengbeh, ṭhi leh Ornament chi hrang hrang an siam mek leh an zawrh chu kan han dawr vel a, a man a tam em em hlawm mai a, keinni han lei rual a ni lo.

Ni. 13.03.2024-ah chuan Noong Nooch Village kan tlawh- he hmunah zet hi chuan thilmak chhui sen loh khawvel hi a va lo ni tehreng em!

An huan (Graden) thlai chi hrang hrang an enkawl ringawt mai pawh ennawm tham a ni. Huan ṭhenkhata an thil chin chu a lem, siam chawp a ni, pangpar huante pawh a lem siam chawp zau tak tak a awm bawk. He lai Noong Nooch Village hi a zau hle a. Lung khawkrawk hmunte, lungpui hmunte, lung lianpui pui awm khupte pawh chu an siam chawp a ni. Mizoram hmar chhaka lungphunlian khua a lungphun 8 laite hi ennawm kan ti a, an ni chuan hetiang hi tam tak la khawmin an dintir a, engkim mai hi a ennawmin mit a tlai tak zet a ni ber mai. Buddist Temple hmunte, Sai, Sanghawngsei, Bawng leh a dang siam chawp ni si, tam tak nalh tak tak sawi sen a ni lo. He hmun hi khawvel ennawm zingah pawh pakhatna a ni an tihial a. Sawifiah zawh a ni lova a makzia sawi sen a ni lo bawk. En ve ila a fiah ber ang.

He mi hnu hian Noong Nooch Pattaya Elephant Theater- (Sai khawifin ennawm) ah kan lut a. Saite hi an lo fing thei hle a. Mihringte lawm zawng turin an han in Show a, an lam a, ball an pet a, Ball an vawm a, entute lawm zawngin an pute nen an han lam vel chu mit a tlai thei hle. Sai hi sawmhnih aiin an tam awm e.

Ni 13.03.2024 tlai zan–Zanah chuan Pattaya Walking Street-ah lamlianah kalin “Lady boy street-an tih bawk” kawtthlerah kan kal a, a sual zawnga ngaihtuah chuan Sadom leh Gomora khua ang deuh kha a ni mai thei. Lamlian sir tawn tawnah chuan Rock Music a ri bulh bulh hlawm a, a chhunga lam tawk pawh an awm. Varandha tawn tawnah chuan nula tleirawl malmum nalh tak tak an lo inpho chhuak a, engnge an tih kan hre lem lo, kawtthler aṭanga thlir ve mai mai, ennawm thlira thlir Tour-ho midangte nen kan kal dul dul a, he hmun hi khawvel huap pawha lar tak a tling. Sawi vek sen a ni lo, sawi thiam vek a harsa, he khawvel hi a zaua thil mak hi a lova tam tehreng em! Heng hmeichhia tleirawlte hi mipa hmeichhe lema insiam Transgender an ni deuh berin an sawi a, insiam lem lo hmeichhia ve hrim hrim pawh an awm bawk. Khawthlang lam, China, Russia, Thailand mite in inpawlh viauin an sawi.

Ni 14.03.2024-ah chuan Safari world leh Marine walk pawh kan tlawh a. Chu mi hmunah chuan dila Kanghlai leh tui sava chi hrang hrang chhiar sen rual loh hmun hrang hrangah an lo awm a. Mihringte hlaua tlanchhia reng reng an awm lo a, awma hnekin chaw an pe a, an ngam em em vek a. Vanlamah lah chuan sang tak takah an thlawk a, dil kamah an lo tum leh ṭhin. A kiang thing buk leh thlak kawlhna kak bawrah bu an chhep lek luk mai a ni. Ram Bawngte, Sazuk chi hrang hrang, Sanghal, Savawm, Sakeite leh ramsa chi hrang hrang an tam mai.

Chumi hnuah chuan Spy war indona rawlrala inbeihna tuipui chungah kan en leh a a hmuhnawm hle. Indo lem a ni na a, a tak a ang hle, an silai, Laipui, Bomb leh an Helicopter han che velte chu a tak nen a dang chuang lo. Chumi hnuah Sangha Dolphin an khawi fing an han show tir leh mihringte nen hlim takin an infiam a. Mipui lawm zawng tur hlirin an han chhaih kual vela, an lam tir thei a ni ber mai. Mipui mit tling takin an in show a ni ber mai.

Ni 15.03.2024- Rel kal vel enin kan kal leh a. Tin, tuipui li-tengsawlah Taikuang lawngin kan vak vel leh ta a, Kan haw hnuah chuan Bangkok in chhawngsang ber chhawng 78-naah kan lawna, mi an lo tam khawp mai a. Bangkok khawpui chu in sang aṭangin kan thlir vel a, engkim hi kan zu chhuk ena a ropuiin, a hmuhnawm hle.

Ni 16.03.2024 chuan Bangkok aṭangin Kolkatta Airport-ah kan thlawk hawng ta a. Darkar 2:30 vel kan kal hnu chuan kan thleng thei ta a ni.

He laia ka han sawiduh

pawimawh ber chu:-

1. Kan Mizoram sawrkar hian Tourism kan hip duh a nih chuan, mite en tham tur thil hmuhnawm kan din a ngai ber mai. Entirnan: Kan Tuirial Electric lipui khu Marboat, Lawngleng leh Paragliding-te nen han cheibawl se. Sakawrhmuituai or Durtlang aṭanga Ropeway-a kalna leh nuam tawla chhuanate nen siam ni se.

Mimal emaw Company-in emaw Torism attactive thil din nise. Heti lama khawvel fang ṭhin ram hrang hrangte tlawh ho hian a din tur ṭha sawi khawm ila, chutiang chuan tihhlawhtlin tur a tam hle ang.

2. An tuifinriat kam vel a fai a. Nylon Tuium ruakte, Polythene sarang, lehkha chhia leh bawlhhlawh khawiah mah hmuh tur a awm lo. An dil leh luikawr reng reng a thianghlim vek bawk.

3. Zial zu an tlem a, zial zu khu vut vut mipui tam karah an awm ve lo. Zial bung paih hmuh tur a awm lo va. Kuhva thial sen tak tak an tam lo, chinai tah var ka hmu lo bawk.

4. Nepnawi zuar an awm zeuh zeuh a, kan duh lo chung min hnawn ngar ngar lo bawk.

5. Buddhist sakhaw bia an tam ber a, an sakhua hian mihirng nun dan a zirtir nasa nge? Mi an rinawmin, an chalak lo.

6. An zingah an chhuahna chu Chhinlung chhuak an inti ve tlat bawk hi mak ka ti.

7. Traditional Culture lam an entira Cheraw bu leh khawn dan an rawn show ve tlat bawk.

8. An thil ti reng reng an hneh a, a kar hun awl awm loin an hnawh khat zung zung ṭhin.

9. Sakei khawitute pawhin Sakei chu an chulin an kuah mai mai thei a, an hlau viau lo tih a hriat.

10. Kawng chhawng Sky Over Bridge sei tak tak km 40 leh a aitam, eng emaw zat kan zawh a. Anni chuan Fly Over Bridge an ngah mai a, an siam belh mek bawk. Kan Lengpui Airport Building attach Over Bridge tawite vaibelchhe tel a kan siam kan zo hlei thei si lo, a man lah a tam uchhuak si. Thailand khian engtin nge kawngchhawng seipui pui an neih ṭeuh bik tih min ngaihtuah tira, rilru a thui duh hle.

- C. Lalaudinga

9862769948