RIMAWI

Sap ṭawnga kan hriat lar tak Music tih hi keini Mizote chuan rimawi tiin kan dahin kan sawi mai ṭhin a ni. Rimawi han tih ringawt mai chu hetiang hian thiam ang tawkin i han sawi fiah dawn teh ang.

A tawi zawngin rimawi tih hi thil ri awmze nei a a rik hian rimawi kan ti mai ṭhin a ni. Rimawi hian mihring mai ni lovin ran leh thlaite nunah pawh awmze neiin nasa takin thu a sawi thui thei ṭhin hle a ni. Hnam fing leh hnam mawl zingah pawh mahni hnam ze milin rimawi hi kan lo nei vek mai a lo ni. Chanchin zirmiten an lo chhui danin hmanlai aṭang tawh khan mihring nunah rimawi hian hmun a lo luah thuk hle tawh a lo ni. Keini Mizo Kristiante ngei pawh hian kan sakhaw biakna hmun biak inah te leh, thil chi hrang hrang atan rimawi kan hmang ṭangkai mek zel a ni.

Rimawi hian mihring nunah nasa takin thil a tithei a, mi a tilawm a, mi a tihlim a, mi a tihlum a, mi a timangang thei a, mi a tithinrim theiin, mi a tilungngai thei bawk a ni. Rimawi hrechiang apiangin an ngaihlu a, a ṭangkaizia an hre tam tawlh tawlh niin a lang. Chutih laiin a hre chiang lo tan erawh chuan ninawmah leh thil ho mai maiah a ngaih theih bawk.

Khawvela Kohhran siam ṭhat hna thawktu hmasa zinga hming langsar tak, Martin Luther chuan rimawi hi Khawvela Pathian thil thlawn pek ṭha leh ropui zinga pakhat a ti a ni. Tunlaia kan ṭhangthar rimawi lama tuite hian rimawi hlutna te, a duhawmna leh, a mawinate hi an la hre tam tawk lo em ni chu aw a tih theih. Chutih mek laiin kan rimawi ngaihthlakte hi sual kawng min zawhtirtu a ni ṭhin em tih erawh kan inzawh fo a ṭha awm e. Rimawi kan ngaihthlak duh aṭang hian mi tinte hi kan ṭanna lam leh kan hawi duh zawng a hriat theih hle a ni tih hi kan chhinchhiah reng dawn nia.

Khawvel a changkang mek zel a,Kohhran pawh a ṭhangin hma a sawn mek zel bawk a, rimawi hian thil a tih theih tawh zia leh hma a sawn tawh zia chu sawi ngai lovin a hretu kan ni ṭheuh awm e. Rimawi hi Pathian fakna leh chawimawina hmanraw pawimawh tak mai niin, Pathian biak inkhawm kan neih ṭhinnaah pawh tun aia uluk leh uar zawk rimawi hi kan hman thiam a ṭul tak zet a ni. Rimawi hian Pathian leh mihringte chu hipkhawmin chung lam ropuina chu lei lam hriat phakin a tichhuak a, chu rimawi avang chuan mihringten kan vela Pathian thil siam ropuina kan lo hmu chhuak ṭhin a lo ni.

Rimawi lama kan ṭan lakna tur leh kan hlamchhiah tlat si chu kan hnamin rimawi chi hrang hrang kan neihte chhawn nun leh, Pathian fak leh chawimawi nan a hi a ni. Tunlai khawvel hmasawn mek leh changkang mek zelah hian, Mizote hi rimawi hman ṭangkai chungchangah zawi zawiin kan ṭhangharh mek niin a lang a, Branch YMA a ni emaw Kohhran ṭhalai ang pawh hian hmalakna atan tlak a nih mekna hi tinung thar zel turin kan inchah ni se. He kan hnam rimawite hi kan chawi nun loh chuan tu nge chawi nung ang le?

- George L.Ralte, Vaivakawn