KAN ELECTRIC BAN HI KAWTTHLER ZAU ZAWNG HUMTU A NI / A NI LO THEI BAWK
Mizoram chu tlangram a nih ang ngeiin hmun zawl a awm lo va, kan kawtthler hi a zim em em tlangpui ti ila a sual awm lo ve. Kan khawpui Aizawl veng tinah Electric ban (Post) a ding vek a, a tlangpuiin kawngpui kam; kawng thlang lamah electric ban chu a ding tlangpui kan ti thei ang. Tun hma C.P Road deuh hlir a nih lai khan Assam Electric Department chuan, kan kawngpui lian deuh kamah Electric ban chu phun a ni deuh vek a. An ban phun pawh In (house) leh Electric ban inkar pawh metre hnih khata inhnaih loin an phun ṭhin.
Khua a lo rei a, in kan han sa ṭha a, in hlui a nih laia Electric ban leh In inkar ram kha zah loin Electric ban dai deuh chétin kan han sa leh ta. Vantlang ram chu kan han eisak ta phawt a. Zah taka ruangin, in thar kan han lawm a, “Aw Lalpa i malsawmna hlu kan engkim chungah a lang,” kan han ti a. Vantlang ram ru chunga hla sak a ni mial awm e.
Chua chhapah, kawng chhak lama tuihawk luan kawr ruah sur laiin kan rít zau ru hlek hlek a, chhak lam lei chu tlem tlemin a min tla a, chu chuan lei min tenau pawh a siam thei ṭhin a. Mi compound ruk tumna a ni ta zel a ni. Kei pawh 1978 khan Aizawl veng pakhatah in hmun ka lei ve a, kawng thlang lama ka ṭhenawmte’n in an han sa thar a, kawng lam nek rànin an sa ta a. Kan inkar kawngpui kawng chhak lam tuihawk luanna chu zau hret hretin ka hmun chu a te tawlh tawlh a, a tawpah chuan ka hralh phah ta a ni.
Ka sawi tum tak pahnihna chu: Tunlai hian kan kawngpui pawimawh ber Bawngkawn to Chanmari Road leh adangte kawng hrulah Electric ban an phun tlar mek a, ban hlui dinna taka phun loin Footpath hrulah an phun a, a ṭhen chu Footpath aia lamlian hnaiha phun tur ni awm takin a lang. Ban hlui hian In ṭhenkhat chu a rawn ngheng ṭep a, a ṭhen food path laiah a ding a, ban hlui dinna ngaia phun ni leh mai se chuan kan lamlian hi kan hum tihna zel a ni ang. Ban hlui si/dai ṭepa in tam tak hi chu tun hma ban phun lai kha chuan in aṭanga tlema indip lo deuh a ni ngei ang. Chuvangin, electric ban hlui khan kan vantlang kawngpui kha mite nèk chep tur a veng hle tih chu lang reng a ni. Tunah pawh hian Footpath siam thar hi mi ṭhenkhat chuan an compound chhung ang maia cheiin mipui kal kawng tibuai zawng (an private thil) in an chei ta emaw tih mai theihin hmuh tur a awm zauh ṭhin. Tun hma electric ban hlui ṭhiah a nih hnuah Footpath tih hek leh thlak danglam pawh sawi tur ting chuan a awm.
Kan khawpui kawng motor jam vangin sawrkar, mipui leh lirthei kal vel ṭhinte buai dan leh manganthlak dan thlirin kawngpui hi a zau zawngin i chhan zel ang u. Thingtlang Village Council dinnaah chuan, an kawtthler leh lamlian nek chep zawnga in leh a compound zauh chu YMA leh VC te’n an um zui ṭhin. A ṭhente phei chuan kawng zauh nan mi Compound an dil a, tlawmngaiin an lo pe thei mai bawk. I rilruin Thingtlang village-ah chuan in hmun a tam a, a tlawm bawk a, humhalh pawh a awl ang i ti mai thei. Thingtlang kawngpui kamte phei chu khaw tam takah chuan cheng nuai eng emaw zat man a ni ve tho mai. Khawpui nen a inthlau chuang lo.
Kum 1963 – 1968 vela, School leh College ka kaina Churachanpur Lamka-ah kumin 2024 January thla khan ka han kal leh a, mihring an lo tam tawh hle a, kawmkar deuh veng tam takah kawngte an lo nei. “Engtin nge heng kalkawngte hi mi compound a zu su ang a, engtin nge intih theih?" tiin ka zawt a. Local Authority (Council hote) ten an dil a, a thlawnin an pe ve mai an lo ti a.
Ka khaw tlawh pakhat Hnahlanah chuan lamlian kawng chhak leh thlangah Nala (Tuiluanna) cement concrete –in an siam a. Kawtthler chhuk zawngah a tawn tawnin mimalin compound an zauh theih loh nan cement concrete-in tui luankawr an siam deuh vek a. Hei hi Village Council leh YMA ten hma an la a. Chuvangin, Mizorama khua ka hmuh tawh zingah Hnahlan khua hian kawtthler zau zawng hi an humhalh ṭha ber leh zau ber a nih loh pawhin, pathumna chu a nih ka ring lo. I ringhlel mai thei; a àwm e. Mahse, han tlawh ve la, dik i tih ngei ka ring. Chuvangin, chhuk zawng, chho zawng, phei zawngin kawtthler tinah i motor chuan i tlan tlang zung zung thei ngei ang.
Aizawlah erawh hi chuan kawtthler humhalhtu hi Local Council nge, Municipal Council hote nge hriat mai a harsa a, tha thawha han che vak ka hre bawk si lo. Ka mawl vang pawh a ni ang! Municipal Council hi ni berin ka han ngai a, Municipal Council hian mawh lian ber an put pawhin che chhuakin, khawlai hi han fang ṭhin se tih ka beisei tlat a ni.
- C. Lalaudinga
9862769948