LPS leh Zonet - Set Top Box
Tunhnai aṭang khan sorkar lai-puia ministry of in-for-mation and broadcasting chuan ruahmana thar a duang a, cable TV-te chu in tinah Set Top Box (STB) vuah turin a ti a, kan Aizawl khawpuiah pawh kan cable TV operators pahnih, LPS leh Zonet pawhin hma an la mek a, hmalak erawh duhthusamin a chak lo niin a lang.
STB kan vuah vanga TV channel fiah tak ziate hi a vuah tawh chuan kan hre mai awm e. Mahse a fee kan chawi tur a la chiang lo te, STB vuah duh si, vuah mai theih loa a awmte hi a manganthlak lek lek a, sawisel pawh an hlawh viau reng a ni. Cable TV operators leh sub-operator te'n theihtawp an chhuah chungin harsatna nasa tak an tawk ve mek a, theihtawpa an ṭan a ṭul khawp mai.
Hetiang hunpui inthlak (transitional period) ah hi chuan thil a famkim thlip thlep thei lo ti hriat a ṭha a, a buaipuitute chungah pawh hriatthiamna zau tak kan neih a ṭul khawp mai. Ṭhenkhat an vuahsak tawh pawh fuh loh riau a awm ve thei a, thil thar tehchawk a nih vang-in thawktute paw'n experience an la nei tam lo tih hriat sa a ni.
Social media-ah LPS leh Zonet sawiselna a tam a, mi ṭhenkhat hre zik tlauk si lo a thu varh dak vak vak chhiar tur lah a tam; heng zinga an sawiselna ṭhenkhat chu a dik viau mai thei. Heti chung hian
ṭan erawh an lak zel beisei i la, sumdawnna piah lamah mipui rawngbawlna a ni tih hre reng thei se a lawmawm ngawt ang.
STB la vuah ve lo tan chuan TV channel a bo ta ṭeuh mai si a, a STB lah phai aṭanga chah ngai chi a ni si a, a duh apiangin an la vuah thei si lo a, a chah thlen chungchangah pawh theihtawp chhuah se, a fee chungchangah pawh mipui phurrit lutuk lo thei ang bera ruahman ni thei se; LPS leh Zonet hian rualkhai takin a fee hi khawn thei bawk se a ṭha hle ang.
- Lianzuala