Sai Ip Puan

Mizo tawng Bible-ah hian Sai Ip puan tih kan hmu fo a, Israel-ten an lungngaihnate entir nana an inbel thin a ni. Tunlaiah hian Mizoten Sai Ip puan kan tih chuan Jute pil (kâwr) atanga siam, Bua-ra kan tih bawk hi kan kawhtir ber a, hei bak, a anpui tur lam chi kan lo nei lo bawk nen.

Sackcloth tia dah, Hebrai-a 'Saq', keini bua-ra/sai ip kan tih mai hi, Israel mite khan kêl hmul atanga an siam a ni a, tunlaia mi nen chuan a inang chiah loh hmel. Hasting Bible Dictionary chuan Haircloth tia saphoin an sawi nen a siam dan phung pawh a inan hmelin a sawi a, Haircloth chu sakawr mei emaw camel hmul sei deuh atanga siam a ni.

A Dictionary of Biblical Tradition in English Literature-ah chuan, "Sai ip hi kêl dum hmul atanga siam a ni a, Israel leh an chhehvel hnam ten lungngaih niah leh punkhawm (social protest) ah te an inbel thin a ni," a ti.

Bible-in sai ip puan a sawi hi keini sai ip puan nena a danglamna chu kêl dum hmul atanga siam a nih avangin a rawng hi a dum a ni. Sa hmul atanga siam a ni a, keini neih, Jute pil atanga siam ai chuan vun lâwng/taksa depa a awm pawhin a nuam zawk deuh ngei ang.

A inbel dan chungchangah, hmanlaia kawrfual an hak thin ang hian an ha thin niin an ngai deuh. Ni tin khawsakah engtiangin nge an hman tih erawh hriat a har tawh hle. Keinin buhfai ip atan tea kan hman ang hian an hmang ve lo mai thei thung (corn bag or burlap te nen ngaih pawlh loh tur an ti).

A thawmhnaw pianphung emaw, a inbel nawm leh nawm loh emaw, a siam dan emaw lam ai mahin a entir hi a pawimawh zawk awm e. Lungngaih, inchhir entir nana hman a ni a, chu chu tunlai thlenga kan tih ve fona chhan pawh a ni ang. Jute-a siam a ni emaw, sa hmul atanga siam emaw, a inbel nawm leh nawm loh leh a fai leh fai loh ai mah chuan kan inbel chhan leh kan rilru puthmang kha a pawimawh zawk chu a ni.

- Rochungnunga