BIBLE THU LEH NGHAWNG ṬHENKHAT

Revd. Chuauṭhuama nena kan inhmuh hnuhnun ber ni chu December 17, 2023 kha a ni a. Kha kha he leia kan inhmuh ni hnuhnung ber tur a ni tih hre lovin kan titi luam a, thla kan la dûn a. GIG Motors in Family Connect programme an hmanah Resource person pakhat a ni a, kei erawh chu ka fapa a thawh ve avanga tel ve ka ni. Function zawh, chaw ei hmain inkawmna hun tawi te kan nei a. Vei inang tih takah Bible translation chungchangah kan lût nghal chat a. A thusawiah Bible lehlin pakhat ‘Felna’ tih thu a sawi lan zara titi zui kan ni. Mizo Bible lehlin lai mekah a letlingtu zinga hotu a ni a, hmun tam taka ‘Felna’ tih chu ‘Dikna’ tia dah a duh thute a sawi a. He lai thu hi Vanglaini chanchinbuah te pawh ka lo ziah ve tawh, kan Mizo nun leh rilru kaihruai sual thei, ka vei em em a nih avangin kan phûl hlut a. Tunlaiah chuan tu mahin thil an tih fel loh duh tawh lohzia te, mahse a fel zawng zawng hi a dik vek lohziate kan sawi luam a. Hemi thu hi Mizo Bible lehlin thar lo chhuak leh tur min tinghakhleltu pakhat a ni.

Pu K.L. Liana’n a vei leh a ziah fo, Mizote thuhretua kan ṭan duh loh thute hi, a sawitu ber a awm tawh si lo va, heng thute hi thu pawimawh tak mai a ni. Kan Bible hriat dan hmasa lamah Ten Commandments zinga kan hriat lar tak pakhat ‘I vengte hék suh’ tih vang te kha ni tak ang maw, thudik hriatpuitua ṭan kan duh lo deuh tlat mai te, thil dik lo hmu reng chung sia dan kuta kan hlan duh hauh lo mai te hi a veiawm khawp mai. ‘Neither shalt thou bear false witness against thy neighbour’ tih hi ‘I vengte hek suh’ kan han tih taka chu a ni a. Lehlin tharah ‘I vengte dawtin hek suh’ tih te, ‘I ṭhenawm khawvengte hek zawngin hretu derah i tang tur a ni lo’ tih tea dah a lo ni ta. He thu hian ṭhenawm khawveng te thiam loh chantir duh avanga dawta hek emaw, thudik lo hriatpuitua ṭang lo turin min fuih a ni deuh ber a. Hetih rual hian, thudik hriatpui (witness) ngam tura min fuihnaah pawm thei ila a duhawm lehzual ang.

Mizote kan vannei a, Pathian thu hian kan nun a hruai thui khawp mai. I Korinth bung 11 thua hmeichhe lukhum kan tih tak mai te pawh hi, lukhum (noun) ni lo hian, lu khuh (verb-covering) a nihna hian lehlin lo ni se la chuan, Pathian thu a nihnaa kan pawm dan hi chu a danglam deuh maithei. Pawl tih dan bik leh a huhova inthuam dan mawi tak (Uniform) a nihna lam erawh chu thuhran ni se la. UPC hmeichhiaten inkhawmnaa lukhum var kan han khum ṭhin hi a mawiin a ṭha hle mai. Isua Krista hnungzuitu kan nihnaah hian keimahniah hian kan put ve tur Kraws kan insiamchawp fo te, kan paltlang ve tur zahna kawn kan din chawp ve fote hi a ṭul hle mai. Biak ina kalna tur thuam bik, a man to lam emaw, a mawi lam emaw aṭanga teh lem lo va, Krista chhinchhiahna siam ve hi thil ṭha tak a ni.

Kolasib pa lar Pu Bawngleia titi ka hre reng ṭhin: Electric pawh rûk ṭha a tih loh thu kha a ni a. Meter Box pawh kaltlang hauh lova Electric pawh rûk a, electric heater hman rûk hi; rûkrûka kan ngaih hauh loh hun lai kha a ni. ‘Hetiang ti kan hriatte hi report zung zung ila, a ṭha mai maw le’ a ti vang vang ṭhin. A ni tak a, sual hi kan haw nep deuh tlat ṭhin niin a lang. Vengte laka kan rilru puthmang leh fel kan tum dan hi, a sual hum zawng a la ni deuh tlat hian a lang a ni. Vengte awm ṭha hle hle lai va tihbuai ngawt emaw, rinthua va report ngawt emaw chu a dik hauh lo vang a. Amaherawhchu, thil dik lo, khawtlang leh ram tana pawi thei tur chi te hi chu in-report zung zung mai te pawh kan ṭhatpui zawk ngeiin a rinawm.

A langa mawi, a langa felah hian kan lungawi a, chu chu kan target lian ber a nih chuan a dik leh a ṭha ber kan tlin ngai dawn lo va. Kan ram, kan khawtlang leh sakhua hi a lemin kan nung dawn tihna a ni thei ang. Ram inenkawlna, sakhuana leh khawtlang nun hi film ang maia a chana kan chan chuan a ṭha hauh dawn lo va. Kan nihna dik tak lan chhuah ni apiangin kan nain kan beidawng mai dawn a ni. Ram hruaitu aṭanga mipui nawlpui hian eng ang nungchang nge kan thiam ber a, kan byheart chian ber tih hi ngun taka kan inchhût a pawimawh hle mai. Mi te hmuh theih china fel, a langa fel mai ni lo, ‘A dik’ hi kan ban ṭàlh ṭàlh a ṭul khawp mai a. Ram hruaitu leh Sawrkar lam thuneitute thawhpui a, kan ṭhenawm khawvenga thil dik lo leh mi dik lo chu Dan rorelna hnuaia hruai zung zung tura kan inbuatsaih a ṭul khawp mai.

- Rev. Jh. Za Hluna (Pazula Pè)