MI DANG TANA TLûKNA NGE MALSAWMNA?

Kan Bible chuan Tluknate hi awm lo thei a ni lo; nimahsela, tlukna awmtirtu chung a pik e! (Luka l7:l) tiin a lo sawi a. Helai Bible chang kan hmuhah hian Lal Isua hian ringtu ni tawh, tluk palh theih a nihzia a sawi chiang hle a. Tlukna chu a awm ngei a ni tih pawh a sawi chiang a; nimahsela, mi dang titlutu nih erawh a hlauhawmzia a sawi thung a ni. Mi dangte tana tlukna siamtu, mi dangte tana harsatna siamtu nih hi a hlauhawm a ni tih min hrilh a ni. Hei hian thil a huapzau hle awm e. Mi dangte tana tlukna siamtu kan lo ni ve thei reng mai a lo ni a, engtin nge kan nih theih tih hi zir chiang dawn teh ang.

Ringtu i ni a, Biakinah pawh i inkhawm fo ṭhin a, a làmte pawh i lam ṭhin a ni mai thei. Tin, lenkhawmna leh Biak inah te chuan Pathian thu awih ber ber anga lang pawh i ni mahna. Nimahsela, i pawn lam nun leh Biak in pawn lama i nun danah chuan mi rel hràt tak, mi sawichhiat hreh miah lo, mi hmuh lem lovah chuan han in zeuhte emaw hreh chuang lo i lo nih chuan, i nun dan khan mi dang tan tlukna a siam thei a ni. Kohhrana hruaitu i ni a, Biak inahte pawh thu ṭha tak tak i sawi ṭhin; nimahsela, i hlawh leh in khawsakna chu a inthlau em em, sum leh paiah duham chintawk i nei lo va, ṭhiante nena han awmkhawm deuh leh thiltih pui nikhuaiin han lem zeuh i hreh chuang bawk lo va, chu chuan mi dang tan tlukna a siam thei . Ṭhalai hruaitu i ni a, Biakin leh ṭhalai thiltih nikhuaa oi khawsak dan leh, ni tin eizawnna leh pawn lama i awm dan a inthlau em em a, mi te leh ṭhalaiten an enthla reng che, nangmah avang khan ṭhalai tam takin an tluk phah thei bawk.

Biakin leh zaikhawm nikhuaa a lam peih peih, a hallelui ring ring ni si, ram kal nikhuaa mi lova thlai leh ilo ruk hreh miah lo, inhauh peih reng mai i nih chuan, i nun dan khan mi dang tlukna a siam ṭhin a ni. Biak ina inhmuam up tak leh kohhrana a kûla tái ni si, dawt sawi hreh map lo; dàwt pawh thudik sawi par par thei i nih chuan, mi dang tan tlukna leh harsatna i siam ngei dawn a ni. Kan ramah hian mi hetiang hi kan awm nawk ni hian a lang a, hetianga ringtu nun leh Kristianna kan la làp a nih chuan ringlo mite leh piangthar lote hnenah engtin nge Chanchinṭha kan hril theih tehlul ang? Kohhrana a kula taia inhmang ni si, thawhchhuah phu lohva khawsa; thla tina an hlawh lak zat pawh kan hriat reu ruau ni si, an in chhung khawsak dana che sang em em, in leh ropui leh car man to tak tak nena khawsa sang em em lawi site kan awm nawk. Hengte hian kan kristianna leh ringtu nun hi a tidal em em a ni. Kan chhehvel leh kan ram chhunga ringlo mite leh piangthar lote hian min enthla reng a, kan nun danah hian ringtu nih leh pianthar chàkna tur hi an hmu hlawl lo.

Daniala-te ṭhian zaho kha chu mi dangte aiin an danglam ngam a, Pathian thuawih leh ringtu nun dan tur kha an zahpui ve reng reng lo. Babulon lal ina thil tui tak tak ei lo ngam kha, an lo hmelṭha zawka an hrisel zawk bawk a nih kha. He khawvel Babulon hausakna leh ropuina chentute ai chuan, Babulon hausakna hnawl ngam leh chàn ngam Daniala-te kha an hmelṭhain an duhawm zawk. Keini pawh babulon hausakna hnawl ngama an eitur ṭhate kan chàn ngam chuan, mi dang tan kan lang mawiin kan hmelṭha zawk ang. Kristian ringtu kan nih chuan kan danglam ngam a ngai; kalsanna leh chan ngamna nun kan neih loh chuan mi dang titlutu kan ni thei.

Kan ram ringtute hi AWHNA SUAL hian mi tibuai em em mai a, dik taka nun hi kan hlau zawk emaw tih tur a ni. Dikna hi chu a tlo chu kan han ti ṭhin tak na a, a tlo lo zawk dik lohna hi kan thlang leh lawi si. Thalai zingah Drugs addict, zu ngawlveite kan tam em emna chhan leh mahni intihlum leh rilru buai kan tam em emna chhan pakhat chu – kan chhungkuaa sum lakluh a thianghlim loh vang a ni fo. Dik lo taka sum lalut chhungkua tam tak hi an chhungkua belhchian dawl lem lo an tam. Khehpuam vanga hausa thur thurte, smuggling avanga hausa thut te, mahni hlawh baka sum lalut ṭeuh ṭeuhte hi chhungkaw awhawm tak sawi tur an tam kher lo vang.

Tunlaiah pawh Internet leh social media aṭanga mi bum tum leh bum ṭhin mizo zingah ngei pawh kan lo tam ta! Heng ang mite hi an nawmsak rei ring reng reng suh u. Mi dangte tana harsatna siam a, titlutute hi he khawvelah pawh hremna an hmu ang a, an sim loh phei chuan vanah chatuana hremna an la hmu dawn a ni. Mi dangte tana malsawmna nih hi a va hlu zawk em! Pathianin Abrahama hnenah, "Nang malsawmna ni ang che,” (Gen.l2;2) tia a lo sawi ang khan, mi dangte tana tlukna ni lo va, malsawmna kan nih hian kan tan pawh malsawmna a ni. Lal Isua’n, “Heng mi téte zinga pakhat pawh tihtluk ai chuan, a titlutu tur ngháwngah chuan buh rawt sawmna lung awrhtirin, tuifinriatah thlak se la, a tan a ṭha zawk ang,”(Luka l7:2) ah a ti hial a nih kha. Mi dangte tana chhiatna thlentu, titlutu nih hlauhawmzia hi kan Pathian thu aṭang hian zir nawn leh teh ang u.

Ringlo mite chu eng ang pawhin lo awm rawh se, keini ringtu erawh hi chuan i thik lo vang u. Daniala-te ṭhian zaho ang khan he khawvel Babulon bawlhhlawh tak lak aṭang hian inthiarfihlim teh ang. Ram hruaitute pawh hi mi dang tana tlukna ni lo va, malsawmna ni turin ṭan an lak an ngai.

Kan vullai nite, kan damchhungte hi a rei lo èm mai si a, chhuan thar an lo chhuak zung zung a, hmani lawka lal te kha an lo chuai a, mi dangin an lo thlak leh a, ni tin hian thlanmual lam pan hian kan liam mek a ni. Damchhung rei lo tea nawmsakna thlahlel lo hian, vana kan lawmna tur zawk thlir hian nung ila, tichuan mi dangte tan pawh malsawmna kan ni ngei ang. Mi tam tak thlanmual lam pana an liam mek laia keini kan la dam chhan leh mi nunga kan lo la awm chhan chu, mi dangte tana malsawmna ni turin a ni si a.

- Reuben Lalnunthara Hnamte