HUN VAWN DIK
Tunlai hian sawrkar hnathawkte ah HUN VAWN DIK inzirtir tharna hriat tur a awm ṭan leh ta hi a lawm awm tak zet a ni. Hun vawn dik hi mi tin te hian ni tina kan hun hman hrang hrangah hian kan mamawhin thil pawimawh zing pakhat a ni awm e. Hun vawn dik inzirtirna hi chhungkuaah hmasa ber se la, hei hian Kohhranah leh khawtlang mai bakah, sawrkar hnathawkahte nasa takin HUN VAWN DIKah hmasawnna leh changkanna hmel min hmuhtir ngei ang.
Hun hi Pathian min pek niin hman ṭhat fo a ṭul rualin, mi dangteah harsatna a thleng ve thei tho tih hi kan hriat tel erawh a ṭul awm e. Nu leh pa ṭhenkhatten ṭhalaite min veina leh min selna ṭhin chu - HUN VAWN DIK hi kan ngai pawimawh tawk lo ṭhin hi a ni. Ṭhalaite hi nu leh pate aia Kohhran leh khawtlanga inmang nasa, kum tina pawl hrang hranga chanvo nei ziah ṭhinte kan ni hlawm a, heng pawl hrang hranga kan telnaah hian a tam zawk chu Committee sanga tel phate kan nih hlawm avangin Committee ni khuaah te, a hun taka Committee ṭan theih loh chang a awm ṭhinte hi pawl hrang hranga hruaitu (OB) leh Committee Member te inenfiah a, kan insiamṭhat ṭhin a ngai tak zet a ni. Kohhran rawngbawltu leh khawtlang rawngbawltu inti si, Kohhran Committee hnuaia Committee peng hrang hrangte Committee neih ṭhinnaah te, khawtlang huap a bikin YMA Committee peng hrang hrang Committee neih ṭhinnaah te, Kohhran pum huap leh khawtlang huapa thil tih pawimawh neihna ṭhinnaah te a hun takah kan ṭan thei ṭhin lo hi chu, chapona tlang chhipah ṭhuin engmah zah tur leh hlauh tur kan la hmu rih lo tihna a ni berin ka hria.
Kan khawsak ho laih laih chhung chuan kan mamawh leh mamawh loh te hi chu a pangngai reng fo ṭhin. Kristian te tana kan tih tur pawimawh zinga pakhat chu, in awm dan leh Krista chanchinṭha hi in mawi phawt a, chumi ti thei tur chuan HUN VAWN DIK hi a pawimawh hmasa ber a ni.
Mahni hnathawhna hmun hrang hranga HUN VAWNG DIK THEI LO ṭhinte hi a Pathian thu lo a ni. Pathian biak inkhawm tura ṭan hun hmaa thleng hman lo an awm fo ṭhin te leh, mahni hnathawhna hmuna tlai an awm fo ṭhin te inthlahdah vang ni berin a lang.
Cable Tv hrang hrangah te leh chanchinbu hrang hrangah mi ṭhenkhatten HUN VAWN DIK chungchangah ṭan lak thar a ngaih zia an ziah leh an sawi ṭhinah te hian i tel ve em? Mahni ṭheuh kan inchhut chian a va ṭul em.
Hun kan vawn dik theih lohna leh chumi atana harsatna min thlen ṭhintu bul ber nia an sawi ṭhin chu, CHAPO vang a ni an ti ṭhin. Mahni hna ngaihsak loh hi sual lian tak mai niin miin ama hna a ngaih pawimawh ngat chuan a hun takah engkim a tiin, a hun takah engkim a dah ṭhin a ni.
He thu hi i chhiar zawh hian a hun taka i tih theih loh ṭhin nachhante han inzawtin i hun hman tawhte han thlir kir la, tun aṭanga a hun taka i tih turte i tih theihna turin i rilru han siam teh le. Tichuan i harsatna chu a kiam duak mai ang.
- George L.Ralte, Vaivakawn