MSSSB-in chunglam aw an hria a, MPSC-in an hre ve lo!

Ziak leh phawt mai ang aw, a ṭul lehpek a ni ang e. Kan la hriat loh, mak roh si chu RTI-a ka zawhna aṭanga MSSSB-a thawktuten chunglam aw an hriat ṭhin thu hi a ni! Heng thu ngai tho hmang hian MPSC pawh RTI online-in kan luhchilh a, anni chuan, chunglam aw an hre ngai lo!

I hriat tawh angin, sorkar liamta MNF sorkara Cabinet Meeting chuan June ni 10, 2019-ah Mizoram Subordinate Service Selection Board (MSSSB) a din a nih kha. RTI Act-a kan tawnhriat ve tawhte aṭangin thil zawh châk a lo piang a, MSSSB hian sorkar hna an lâk ṭhinah hian sorkar hotu lian Minister, MLA leh official inrawlh an awm em? ziakin emaw, ṭawngkain emaw tiin December ni 21, 2023 khan online-in zawhna ka thehlut leh a, January ni 12, 2024 khan chhanna ka dawng a, thawktuten min rawn be thlap bawk a, RTI zawhna leh chhanna an ngai pawimawh hlein ka hria a, hma kan sawnin kan danglam ta zel a, a lawmawm hle.

MSSSB-ah meuh hetiang zawhna thehluh hi thil ṭul lo tura ngaih a ni a, ziak leh ṭawngkaa sawipuina lam hi awm miah lo tura ngaihsa a ni bawk. Mahse, hriat ve châk riauna a awm avângin zawhna hi ka thehlut ta a, chunglam aw chu kan hre ta a nih hi!

MSSSB-a thawktute hian sorkar hnathawk tur an lâk dawnah, chung lam aṭanga ṭawngkaa sawisakna thu an dawng ṭhin a lo ni a, mahse, tling lo tur tihtlin erawh an awm phah lo, tih hi RTI hmanga zawhna an chhan dan a ni (MSSSB din a nih hnuah, sawrkar hnathawk tur Group ‘B’ [Non Gazette] lak a nihin thuneitu sâng aṭanga ṭawngkaa sawipui châng a awm ve ṭhin a, nimahsela, sawisak avânga tling lo tur tihtlin tu mah an awm ngai lo. Hei hi enfiah theih reng a ni – RTI)

He RTI zawhna chhanna hi mi tam takin mak in ti nghal mai thei, ‘chutiang engmah kan dawng ngai lo’ ti se, keini tan, ‘in dawng ngei alawm, kha u,’ tia finfiahna neih hi har deuh tur a ni. Ṭawngkaa sawisaktu an awm miau a, thudik an puang mai ngam a, nghawng erawh a nei lo an ti mai hi a tlang hrek hrawk hle! Chung lam aw (Minister, MLA leh official) an hriat ve ṭhin thu an sawi mai leh tling lo tur tihtlin phah an ni ngai lo tia an sawi hi, “Kan fair tawk e,” an tihnaah ni maiah ka ngai a. Chutih rualin, hotu sang aṭanga zu sawisakte hi lâk an nih leh nih loh chu, “...sawisak avanga tling lo tur tihtlin tu mah an awm ngai lo. Hei hi enfiah theih reng a ni,” titute hi a hre chiang bertute an ni dawn a. RTI chhanna a nih miau avangin, a rintlakah kan ngai mai turah ngaih a ni. Kan hotute pawh hian, khawi lai kilah emaw, mamawhna avanga an duhsak zawng an lo chhawr ve ṭhin a nih pawhin, MSSSB te ang meuhah hi chuan fair taka thawktute pawh an awm zel theih nan, zu tibuai lo ila, an zahawmna hum hmasatu turte pawh an ni tih an inhriat hi a ṭul.

MSSSB hi fair tura ngaih, hnathawktute pawh Chairman leh member bâk chu sorkar department hrang hranga mi pawhkhawm an ni. Ṭhalai lehkhathiam rual, exam leh interview hmachhawnna hmuna, "MSSSB-ah meuh hi chuan..." tia mahni leh mahni hmui inphuar ngam tura ngaih kan hotu sângte zinga hetiang thu lo zu sawi ṭalh duh an awm hi a dik lo deuh hú tlat a ni, a ngaihnawm lo riau. An sawi ang hian, awmzia an lo neihtir duh bik hmel si lo.

Hetiang thu han hriat tâkah chuan, Mizoram Public Service Commission (MPSC) pawh hian thuneitu sang an inrawlh em tih hriat duhin January ni 16, 2024 (Thawhlehni) khan RTI online hmangin thu ngai chiah, thuneitu sâng Minister MLA leh official aṭanga an duhsak zawng la tura tihna ziak emaw, ṭawngka emaw an dawngin an nei em tih chu ka zawt ve leh nghal a. Mahse, anni chuan, sorkar hnathawk tur lâk dawnah sorkar thuneitu sâng aṭanga sawisaktu an dawng ngai lo tih an rawn sawi thuai a, “Sorkar thuneitu sang Minister, MLA leh sorkar official aṭangin an duhsak zawng la tura ziahsak emaw, ṭawngka emawa sawipuina thu thlen thu hriat a ni lo,” tiin ni 3 hnu January ni 9, 20224 (Thawhlehni) khan zawhna hi an rawn chhang thuai thung a ni.

ZPM sorkar a lo piang a, MSSSB chu ṭhiah tum mek a ni a, ṭhalai leh mipui zingah an ṭha tâwk tia ṭhiat lo se ti an awm ṭeuh mek. MZP pawhin an zir chiang mek niin an sawi bawk. RTI hmanga zawhna an chhanna dang erawh remchang dangah kan la ziak leh dawn nia.

- Lalnunṭawma Fanai