Best Green State a Mizoram thlan chungchang

December 8, 2020-a Best Green State a Mizoram thlan a nih sorkar thuchhuah kha kan lo chhiar ve a, kha kha sorkar thuchhuah nge officer pakhatin ama mimal ngaihdan a ziah aw? tih hi kei ni thingtlang mi chuan kan hre duh khawp mai. 

Kha thuchhuah kha thingtlang khuaa chengte zawng zawng, ramngaw leh lui dungte humhalh a, faina leh thianghlimna kawnga pawisa leh hna ṭhulha vawi tam tak hnatlang ṭhinte hian hre thiam ila chuan kan lawm lo hlawm khawp ang. 

Kha thu kha mi tam zawkin an hre lo a, a hriate pawhin a ngaihna an hre kher lo thei bawk a. Mahse mi vengva chin chuan a awmzia kan hria a, whatsaap ah kan inthawn darh a, kan helh hle a ni tih hi lo chhinchhiah phawt ni se. A thu tlangpui chu hetiang hi a ni. 

Best Green State-ahMizoram thlang

No. 6799/2020-2021

Aizawl, the 8th December 2020:

Tunhnai khan chanchinbu magazine lar tak, Travel & Leisure India and South Asia’s India’s Best Award 2020-ah Mizoram chu Best Green State-ah a puang a ni. 

He Award hi Mizoram Tourism chuan a ngaihluin tun aia nasa zawka zin mite hip tumin ṭan a lain khualzin tam zawk hip luh ngei a besei a ni. He Award hian sum leh pai keng tel lo mah se khawvel zau zawka Mizoram pholangtu a nih avangin social media (page) lamah pawh Mizoram Tourism hian tlawhtu a ngah phah hle a ni. 

Best Green State a Mizoram an thlan chhan hi ram hring mawi tak mai a nih piah lamah Tourism Department in tun hnaia Responsible Tourism Policy tharah hian tunhma a la awm ngai lo, khualzin mite tlawh fo ṭhin hmun hma vawn thianghlim te, ramngaw, thing leh mau chereu tur ven te, ramngaw tichhe thei tur ram dang aṭanga thing leh mau lakluh khap te bakah Mizoram pawna nauban lakchhuah khap te leh thildang tam tak a tel a ni. 

He Policy hnuaiah hian zin mite intiamkamnain a ken tel, ram humhalh tur leh vawng fai tura khualzinte hnena ngenna a chhawpchhuah vangte pawh a ni tel bawk. 

Written by:

Pratap Cheetri, 

MIS, ipro

Dated:8th Dec 20

11.51 AM

He thu ziak aṭanga thingtlang mite zawhna chu hei hi a ni:

1. Responsible Tourism Policy engtikah nge siam a nih? Mipui hnenah puanzar a ni em? 

2. Tun hmaa la awm ngai lo khualzin mite tlawh duh hmun tifai turin Tourism Department  hi vawiin engzatnge a thawhchhuah tawh?

3. Ram dang aṭanga thing leh mau lakluh khap Policy in nei a, Chief Minister berin mau lakluh Policy a nei a, a la lut mek bawk hi engtiangin nge a chungah Tourism Department-in action a lak? 

4. Mizoram nauban ramdanga la chhuak ṭhinte englai pawhin an awm a. Chungte chu Tourism Department-in man leh hrem in nei tawh em?

5. Tourism Policy thar vang hian thing leh maute humhalh niin a lo hring hman ta em ni? 

6. Khualzinte hian ram hring dup an tichereu ṭhin em ni? 

7. Tun hnaia Policy siam vanga Mizoram hi lo hring ta thut a nihna lai fiah takin sawi rawh.