MSSSB hi hna pek belh an ngai zawk e
Sawrkar a din chhung chuan hna lak hi a awm reng dawn a. Sawrkarin policy a duante tihlawhtling turin hna thawk mi eng emaw zat rawih an ngai reng a. Chutiang a nih avang chuan hna latu bik tur commission emaw, board emaw, committee emaw din a ni ṭhin a ni. Mizoramah chuan Group A hna leh a chunglam leh Group B Gazette hnate la turin sawrkarin MPSC a ruat a. Group B hna la turin MSSSB te ruat an ni bawk a. Group C leh D hna la turin department tin tan Departmental Screening Committee an awm leh bawk a ni.
Tuna kan sawrkar thar hian an sawrkar ni aṭanga ni 100 chhunga tih hlawhtlin tur ṭha tak tak ruahmanna an siam a. Amaherawhchu, chu'ng an tihhlawhtlin tur zinga pakhat chu Group B hna latu MSSSB ṭhiah a ni tlat mai a. Mi a barakhaih hle! Hna zawngtute hriat danah leh hmuh danah fair leh thianghlim taka hna lak kalpui ṭhin a ni tia hriat an nih laiin, ṭhiah tur a lo ni dawn ta mai hi mi tam zawk mak tih a tling a. A phena thuruk inthup a lo awm a nih chuan mipuite hian hriat kan chak hle a ni.
Hna lak dan a muan hian a tuartu chu mipui te, department te leh hna zawngtu leh diltute an ni a. MSSSB hna hi MPSC kutah dah lo ni dawn ta se, hna lakin a khawmuan phah leh hlein a rinawm a. MPSC tih len a ngai ngei ang a, hnathawktu thar an lak a ṭul ang a, thawktute room tur siam belh a ngai dawn bawk a. Mipui sum tam tak a kal ral ngei dawn a. A ngai angin MSSSB hi awm chhunzawm se kan ṭhatpui zawkin a rinawm.
Group C leh D hna lak hi department tinin a hran ṭheuha an buaipui hian hun leh tha leh sum a hek phah hle. Group C hna lak bikah hian written exam neih phawt hnuah chuta tiṭha zualte chu personal interview tura koh ṭhin an ni. Tunlaiah hna avanga hna diltu an tam ṭhin si a, hna pakhat chauh lak tur leh hna sawm chuang lak tur buaipuina atana sum leh tha senso hi a inzat deuh reng ang. Department-in hna a lak hian insawipui theihna remchang a tam hlein a lang. Sawipuitu nei ve lo hi a tam zawk kan nih ṭhin avangin fair leh thianghlim taka hna lak a nih theih nan, Group C hna lak pawh hi MSSSB kutah hian pek belh ni zawk se.
Group D hna lak hi hun eng emaw chen kha chu written exam leh personal interview hmanga felfai taka kalpui ṭhin a ni a. Ni 28.4.2020 aṭang khan hei hi rawn tidanglamin, personal interview hmang chauha hna lak hi kalpui a ni ta a. Interview hian mark 100 a pu a, sawipuitu ṭha inrawlh theihna remchang a sang em em mai a. A tuartu chu mi rethei, chhung leh khat nei ṭha lote bawk an ni a. Hetiang thil fel lo pumpelh nan hian Group D hna lak pawh hi a hmaa lo tih ṭhin dan angin written leh personal interview hmanga kalpui leh ni se. Hna lak hi MSSSB kutah bawk dah ni se, a felfai berin a rinawm.
- Fela Khiangte