Mizo ṭawng hman dan chungchang

Mizo ṭawng hman dan chungchang hi ni tin chanchinbuahte a lo lang leh zauh ṭhin a. Ṭhangthar zelten Mizo ṭawng chungchang an rawn vei tel hi a lawmawm hle. Ṭawng hi hnam tin tipumkhattu a ni a, ngaih pawimawh zel turah pawh ngai ila, mi thiamte sawi dan chuan ṭawng a bo chuan hnam hi a bo a ni an tih hi a dik a ni. Mahni paw'n han insawi ta ila, Mizo ṭawng hi ka ngaih pawimawh a, Middle School leh High School-a ka thawh lai pawhin, Mizo subject hi ka thawhpuite chuan ka kutah an dah deuh zel a. Sikul zirlaibua Mizo Subject zir tur pawh MBSE lam pawhin an buatsaih zingah min telh ve ṭhin a. Mizoramah pawh hian Mizo Subject hi tel ve bawk mah se, Mizo ṭawng hi zir a ngai ve hle bawk a ni.

Mizo Subject zirtirtu nih a harsat dan chu han sawi ila. Mizoramah chuan Mizo vek ni mah ila, Mizo chi peng hrang hrang kan awm ṭeuh va, chumi bakah pawh ram bial bik (Regional Variation) ṭawng hmante a inang vek thei lo va. Mizo ṭawng chu a eng ber nge ni ang tih tur te pawh a awm ve bawk. Chuvangin, Mizo ṭawng dik tehna chu mahni hnam bik leh ram bial bik ṭawng hman dan kha kan tehna a ni fo ṭhin. Chuvangin, kan ṭawng dik chu a eng ber nge tih tur hi a awm nual a ni. Entir nan pakhat chauh han sawi ila. Khaw chhak lam leh hmun tam takah chuan Chimlim tih hi mi ti thawt thawt, bai dai baw harh sawi nan hman a ni a. Khawthlang lamah thung chuan mi fel leh chengvawng tak sawi nan an hmang hlauh thung a. Khawchhak lam chhuak Pastor pakhat pawh Mamitah a awm a, an fak hle a, "Kan Pastor chu mi chimlim tak a ni," an ti a, Pastor chuan a ngaithiam lo hle a ni, an ti.

Mizo hnahthlak chi peng hrang hrang tawng ni entir nan han sawi ila:

Mizo Paihte Lai Hmar Mara Ralte

Kawr Puanak Anglei Zakou Viakou Puanak

Chaw An Re Bu Laoh Chaw

Ruak Vuak Ruah Rouh Vasuah Huah

Hengte hi Mizo hnahthlak vek an ni si. Engpawh ni se, heng chi bil bik ṭawng hi chu dah ṭha ta ila. Mizo ṭawng kan tih Common Language lam hi lo thlir ta ila, hetah pawh hian a ngial a ngana ṭawng hman tum hi a fuh vek lo lai a awm tho. Entir nan, Zunchhuak, Ekchhuak, Luakchhuak kan tih pawh hi a chhuah hmain Chhuak kan ti vek tho. Hmun sawinaah pawh hian Chhuat chu Chhuatthlang, Tap chu Tapchhak kan tih hi ṭawng dik a ni tho. Infiamnaa kan hman Kawibah, inkawihnawkna pawh hi a kawi lo va, a bial vek a ni. Gender lam pawh hi han sawi ila, Chingpirinu, Thaichhawninu, Ketaminu kan tih te pawh hi Common Gender, a nu pawh a pa pawh kan sawina vek a ni, Chingpiripa, Thaichhawnipa, Ketamipa kan ti ngai lo. Chepa pawh Chenu a awm chuang lo.

Modification lam hi han sawi leh ila. A tlangpui thuin Verb leh Adjective hi kan modify ber a, chuti chung chuan Verb zawng zawng leh Adjective zawng zawng kan modify chuang lo. Thumal ṭhenkhat chu kan lam rik dan athuin kan Modify mai a, word khat pawh rising, rilai, rihniam tiin a word tidanglam lovin kan modify a awm ve bawk. A hawrawp tidanglam lova lam rik dana kan Modify ṭhenkhat han sawi ila. Chu'ngte chu Kal, Zai, Lum, Sen, In etc. hi lamrik danin kan modify mai ṭhin.

Entir nan :

1) Kal : Sikulah ka kal thin. (Ri sang)

Sual kawng zawhin kal suh. (Ri Lai)

Ka kal chuan ka hmu ang. (Ri Hniam)

2) Sen : Puan sen chu sin zel suh. (Ri Sang)

I puan chu sen kher suh. (Ri Hniam)

3) Zai : Pathian fakin zai zel rawh. (Ri Sang)

A zai thiam vangin lawmman a hmu. (Ri Hniam)

4) In : Tui thianghlim in thin rawh. (Ri Sang)

Tui in fo hi a tha. (Ri Hniam)

ZIAK LEH TUAR : Ziak leh tuar tih hi tunlaiah inhnialna a awm fo ṭhin a, a bik takin han umzui bik ila. Tun hmaa Mizo ṭawng lama min kaihruaitu berte dinhmun pawh hi han sawi ila. Ziak tih hi Bible pumpuiah pawh vawi 34 a awm a, khawiah mah ziah tihna a awm lo. Ziah tih Modify-na chu Ziat tihah hian a ni. Chuvangin Ziak tih hi Mizo ṭawng min kaihruaitu Kohhranah leh Kohhran loah pawh Ziak chu eng mood-ah pawh Ziak tih ngar ngar a ni. Bible-a an hman chiang tak chu, Isua an khenbeh dawn khan Judaten Pilata hnenah, "Judate Lal ka ni, a ti, tiin ziak rawh," an ti a. Pilata'n, "Ka ziak kha ka ziak zo tawh," a ti a (Joh.19:22 ) Bible bakah hian thu leh hlaa kan mi hmasate, Pu James Dokhuma ṭawng un hrilhfiahnaah te, Mizo Gramar & Composition MBSE 1994-ah te, Lusei Grammar Rochhung Buchhawna, 1975-ah te, Mizo ṭawng Gramar Synod publication Board 1992-ah te, Pastor Challiana'n Pi Pu Nun tih bu a ziakah te, Mizo History Pu History Pu VL. Siama ziakah te, Mizo Pi Pu te leh an Thlahte tih Pu K. Zawla, 1993-ah te, History of Mizoram, Pu Chaltuahkhuma Ex-MDC, 1887-ah te, Mizo Nun Hlui Pu B. Lalthangliana ziak Thuhmaah te etc. kan sawi seng lo, ZIAK hi ZIAH tih an hmang ngai lo. Ziah tih modify-na chu ZIAT tihah hian a ni, Zawngṭah chu ka ziah zawh hnuah kan ei ang tih angah te hian Ziah hmanna chu a ni.

TUAR tih hi han sawi leh ila. Hei hi thenkhatin an Modify-a, TAWRH tih ching an awm ve bawk. “A tawrh nasatzia,” tih ai chuan, “A tuar nasat zia,” tih mai hi a ṭha. Eng Mood-ah pawh TUAR tih vek a ni. Kan hlaah pawh, “A tuar zia ka hriatin, Ka mittui a tla ṭhin,” tih a ni.

Ṭawng dang hman chungchang hi han sawi leh ila. Khawvel hmasawn zelnaah hian ṭawng thar pawh a piang ve zel a, hmana awm lo kha a lo awm ve zel bawk. Mizoramin kan hriat ngai lohte a lo awm thar ve zel a, a hming vuah chawp ai chuan a hmu chhuaktuten an hman kha hman ve mai a ṭha. Kan pi puten Kerosine hi Khawnvartui an lo ti hi a ṭha, hun kal zelah chuan keini'n hming hran vuah ai chuan a hmu chhuaktute hming vuah ṭawm mai hi ṭawng tih hausak nan a ṭha zawk. Petrol te, Diesel te pawh hi ṭawm ve mai a ṭha. Ṭhenkhatin an phuahchhawp ve a, Tuialhtheite an ti kher a, "Mama Tuialhthei kha han la teh,” ti ta se, Khawnvartui nge, Petrol nge, Diesel nge a lak ang? Chuvangin a hming kan hriat hmasak hi hman ve mai a ṭha, hei hi Mizo ṭawng tih hausakna a ni. English-te pawh hian Greek leh Hebrai leh Latin ṭawngte hi an ṭawng angin an hmang ve tho a ni. Keini pawh hian Motor, Electric, Mobile Phone, Choka, Bedroom, Rora, Office, Chairman, etc i hmang hreh lo vang u.

Tunlai hian MLDP hian kan A, AW, B tih danglam a; NG hi N LEH G inkara dah rawtnate a awm a ni awm e. Hei pawh hi a ṭul miah lo. Entir nan, English chuan kan thla tawp hming hi D E C E M B E R an ti a, heta E an hman hi en ila, E hmasa ber hi I an ti a, a dawt leha E hi E tho, a tawp ber E chu A angin an hmang leh mai. Chuvangin, kan A, AW, B kum za chuang kan hman tawh hi khawih danglam a ṭul lo ve. Tunlai hian Ni tin Chanchinbuah intih sap nial nual duh vang nge ni, an article thupuiah sap ṭawng hman an ching a, hei pawh hi a ṭul lo. An thuziak chu Mizo ṭawng vek a ni leh tho si, a thupui kha Mizo ṭawng hman ve mai a ṭha. Ṭhenkhat tan chuan eng tihna nge tih tur hi a awm.

Aw le, heng te hi ṭhangthar lehkha thiamte kaihhruai nan ka thawh ve a ni e.

- Dr. Lalzuia Colney, Ph.No. 9862334371