Thak Satliah Damdawi

Vun thak, pang thak satliah, tangseh; uithak, thosi/uihli/khumfa/Saiphaw/Vaihmite seh etc. vang ni lem si lova taksa, hmai leh kapkar emaw, taksa nem laia bawlsen tereuhte thak sep sep, reh hlei thei lo i vei chuan heng a hnuaia tarlante hi hmang la a ṭha a, mahse, dam hlenna tak tak chu Pathianah chauh a ni tih hre rengin Pathian rinchhanin inenkawl ṭhin la, i dam zel ang. Chungte chu:-

1. Baking soda tui thianghlim nen uluk takin chawk ban hnang thlarh la, a thak bawl lai apiangah khan hnawih ang che.

2. Thakthing powder leh khawizu inzatin uluk takin chawhpawlh la a thak bawl laiah hnawih ang che. Thakthing hi Zokhaw lamah leh khawpui daifemahte pawh hmuh tur a la awm nual.

3. Neem oil siamsa (Ready made) hnawih a ṭha a, neem hnah den sawm tui hnawih a ṭha bawk. Neem hnah chhum tuia inbual a ṭha bawk.

4. Sandalwood powder leh Chinai tui (lime juice) chawhpawlh ban hnang thlarh hnawih a ṭha.

5. Hnim rimna tak a hnah eng chi (yellow dock) an tih ṭhin hi chhum la a tuiin inbual a ṭha.

6. Mangai chithlum (Peppermint) thisensang leh zunthlumho thingpui thlum nana an hman ṭhin hi tuiah tlem pawlhin inbual a ṭha.

7. Puanthem thianghlim tui vawta tih huh emaw, vur fun (ice pack) hmangin i vun thak laiah khan minute 5-10 chhung ni tin vawi hnih tal dep ṭhin ang che.

8. Chhangphut buh (oatmeal) inbualna tur tuiah thirfiante 1-2 telhin, uluk deuha chawhpawlh hnuah inbual nan hmang ṭhin la, thak tihrehna ṭha tak a ni thei.

9. Vaseline® Jelly uluk deuhin I vun thak laiah ni tin vawi hnih hnawihin nuai ṭhin la, thak tihrehna ṭha tak a ni thei.

10. Aloe Vera hnah kheh la, a chhunga a gel la chhuakin rawtsawm la, i vun thak laiah ni tin vawi hnih tal hnawih a ṭha hle.

Heng zinga mite hi i tana awlsam ber tur hmang mai rawh. A engapawh khi hmang la, ni tin khel lovin a hun tak zelah ti ṭhin la, a reh hma chuan hmang zãwm zel ang che.

-Dr. C. Lalrampana