Kum Tharah Nun Thar Nen

Kan awmna Lei chu 22 June aṭang khan a zinkawng ngaiah chuan a let leh tawh a. Bethlehem-a Chhandamtu pianna champha va hmang turin thil siam zawng zawngte nen Van boruak zau takah khian min kalpui zel a. 24 December zanlaiah a zinkawng tawp chu a va thleng a. A tuk ni 25 December-ah Lal pian champha chu va hmangzo hman loin a rawn kir lehna lam kawngah a rawn vui liam ta a, siamtu thununna hnuaiah a tan second khat pawh chawlh a thiang lo a ni. A va han ropui tak em!

Kum hluiah chuan kan thil tih zawng zawngte chu hunin a liampui zo tawh a, kum tharah chuan a tharin kan nunna chuan bul a rawn ṭan leh dawn a. Hunbi siamtu Ni aṭanga éng lo chhuak chuan kum thar tukah chuan kum thar tuk duhawm tak, Ni eng mawi tak kan tan malsawmna kum inṭanna a rawn herchhuahpui ṭhin a.

Kum hluia kan thiltihte zingah mi tana ṭha lo kan tih ṭhinte bakah, keimahni tan ngei pawha thil ṭha lo kan tih te chu kum tharah chuan kan bansan a ṭul a. Thil ṭha kan tihte erawh chu kan chhawm zel ang a, thil ṭha dang tih tur kan zawn belh zel ang a, chu chuan kan nun a tivul zel dawn a ni.

Thil siam dang zawng zawngte chuan kum tharah chuan Ni chhuak thar avanga malsawmna an dawnte chu an bula awmte hnenah an pechhuak leh ṭhin a. Keini pawhin kan bula mite hnenah malsawmna kan dawnte chu sem chhuak ve zel ila, chu chu min siamtu duhdan a niin min phût tlat chu a ni.

Ni aṭanga meialh hlawm lo chhuak khawvel entu chu a thar zelin Siamtuin a din a, Khawvela thil awm zawng zawngte hi Ni chhuak tharah chuan siamthar zel kan lo ni a. Kan lungphu chuan taksa thar kan neih lehna turin second tin hian thisen ṭha lote chu a rawn siam ṭha a, taksa thar leh chakna thar a rawn indin ṭha leh zel ṭhin. Hun tharah chuan kan rilru leh nun dante pawh a thar zelin, kan la tawn ngai loh hunah chuan kan lut zel a. Thil hluite chu a lo ral a, siamtu zarah a tharin a rawn inthlak zel a ni.

Mupui pawh vanlaizawlah thla zap lovin a taksa rit tak chu a kàn pui char char thei ang hian, kum tharah chuan taksa thar leh rilru thar, tumruhna nen kan natna khum aṭangin tho chhuak ila. Khûp zawi avanga kan tiang hawlte chu dah ila, Lalpa chakna ringin taksa tharin penchhuah i tum ang u. Chu chu kum lo tharin min phut chu a ni.

- H. Neihchungnunga, Durtlang North.