KRISMAS THLAMUANNA

Thuthlung Hlui Hebrai ṭawnga Shalom tih leh Thuthlung Thar Grik ṭawnga Eirene tih thumalte hi Sap ṭawng (English) Bible-ah chuan Peace tiin lehlin a nih tlangpui a, Mizo Bible-ah pawh "Rem, Remna" tiin lehlin a ni tlangpui. Sap ṭawnga Peace tih thumal hi Mizo ṭawnga remna leh thlamuanna sawina atan hman ve ve thei a nih a. Chutih laiin Mizo Bible-ah chuan "Thlamuanna" tia dah zawk awma a lanna laiah te pawh "Remna" tiin dah an ni deuh vek a ni. Shalom leh Eirene te Remna tia dah deuh vek a nih hian a awmzia a ṭhelhna hmun leh hunte a awm ṭhin. Shalom leh Eirene te hi indona awm lohna remna sawina chauha hman a ni lo a, a hmanna hmun tam takah chuan remna aiin thlamuanna a kawk zawk a ni. Remna rah chu thlamuanna a ni a, remna chu thlamuanna a awm theihna tura thil pawimawh tam tak zinga pakhat chauh a ni.

Krismas hunpui laia kan chhiar leh zai tam êm êm ṭhin Luka 2.14-naa Eirene pawh hi remna aiin thlamuanna lam a kawk zawk awm e. A hmalam chang 9-naah, retheihna avanga zan tai rek thlenga inhlawhin mahni in lumah pawh thlamuang taka mu thei lo, beram vengtute chu Lalpa ropuina êngin a rawn chhun ên avangin an hlau hle tih thu kan hmu a. Chang 10-naah, vantirhkoh chuan beram vengtute hnenah chuan an tana Chanchin Ṭha lawmawm êm êm a rawn thlen a nih zawk avangin hlau lo turin a hrilh a, chang 11-naah, chu Chanchin Ṭha chu an tana Chhandamtu lo pianna Chanchin Ṭha a nihzia a puang a, chang 14-naah, van zaipawl chuan, "Chungnung berah khian Pathian chu ropui takin awm se la, leiah hian a lawm êm êm mihringte hnenah thlamuanna awm rawh se,” (ziaktu lehlin dan) tiin beram vengtute tan thlamuanna hla an rawn remsak ta a ni.

Sawi tawh angin, Thuthlung Hlui Shalom leh Thuthlung Thar Eirene te hi indona awm lohna remna dinhmun sawina a nihna awm ve ṭhin mah se, a hmanna tam zawk chu, mimal nunah engkim a ṭha lam hlir a nih avanga lawmna leh thlamuanna nun an neih theihna a kawk zawk a ni. Indona a awm lo pawhin, retheihna te, rahbehna te, damlohna te, fanau neih theih lohna te, leiba tamtak neihna te, beidawnna te, lusunna leh lungngaihna te, roreltu ṭha loh leh rorelna dik lo hnuaia awmna te, ruihtheihthil ngawlveinate leh sual sala tanna te avangin mi tam tak leh ram tam tak te chuan thlamuanna an nei thei ṭhin lo a ni. Tunlai Mizoramah pawh hian silai nena indona hmachhawn mek lo mah ila, a chunga kan sawi takte avang khian thlamuanna neih thei lo tam tak kan awm ngei ang.

Thlamuanna kan neih theihna turin Lalpa Isua Krista chu kan mimal Lal leh Chhandamtu atana kan pawm leh kan neih a pawimawh hmasa ber a, a duh dan anga kan nun kan hman a ṭul a ni. Khawvela kan awm chhung zawng chuan tisa leh thlarau ṭhen hran theih a nih loh avangin, thlamuanna kan neih theihna turin kan ni tin khawsak tundinaah intodelhin kan hrisel ṭhat a pawimawh hle. Chutianga mimal, chhungkua, khawtlang leh ram kan intodelh theihna turin khawtlang, ram leh kohhran hruaitute kokiah mawhphurhna a innghat lian hle.

Tun ṭum Krismas pawh hi thlamuang taka hmang thei lo mi tam tak an awm leh mai thei. Kan sawrkar thar nena Krismas kan hman hmasak ber ṭum a ni a, Krismas hmasa ber ṭuma van zaipawl ina thlamuanna hla an rem kha Mizoram atana kan sawrkar thar hla rem ni ve se, tih kan duh tak meuh a ni. Kohhrante pawh kan member-te tana thlamuanna thlentu ni turin kan incho thar leh a ni. Mimal leh chhungkuate pawhin thlamuang taka kan awm zel theihna turin kan tana Chhandamtu lo kal chu, kan Lalpa leh Chhandamtu atana pawmin a duh dan anga awm zel a, a lawm êm êm nih turin kan inhlan thar zel a pawimawh hle.

Mi dik an lalin mi an hlim a,

Mi sualin ro an rêlin mi an rûm ṭhîn.

(Thufingte 29.2)

Dik taka lalin ro a rêl chuan ram a ding chhuak a,

Thamna ngawt a ngaihtuah chuan ram chu a tluchhe ṭhîn.

(Thufingte 29.4)

Krismas thlamuanna in hnenah awm rawh se.

- Laiu Fachhai