WAYNE COLE - I By : Joe Ngurdawla

Kum 1970 hnu hret chhoa Mizo rawlthar, nutling patling chena lungrualna hrui khata min phuartu, kan awm mai mai leh kan ṭhut thluan lai pawha puakruk paipawn reng anga min ngaihtirtu, suangtuahna mitthlaa rang lutuka min phawitir a, ri hauh loa kan duh duh target min kahtirtu, Texas khawpui lama kan lung min lentu, ṭhianzahoa khawilo han niha kawrchung buang dik tak nena laitual min lentirtu chu - Wayne Cole-a thawnthu hi a ni.

Hetih hun laia thawnthubu kan chhiar tlanglawn deuh chu sap thawnbu lehlin, romantic novel - M & B te, Photo Romance te leh cowboy thawnthu te, James Bond leh Robin Hood leh a dangte an ni a. Mizopa irawmchhuak thawnthu/lehkhabu kan neihte hian Mizoram chhungah min chenpui deuh ber a. India ram hmun ṭhenkhata min hruai kual pawh an awm a. Eng emaw zatin Israel [Ramthianghlim] min fanpui a, tuifinriat ral min vahpui hi a vang hle a. James Mellory & Harlen Irene, Pu Zokhuma, Mission Veng ziak kha ka hriat chhun chu a ni mai awm e. Hetia khawpkham lo taka heng kan thawnthubu ban phakho nena kan inawih tlei lai hian, rin phak loh leh beisei phak loh takin, 'Hnunglama sabarh' an sawi ang maiin Pu Joe Ngurdawla hian ruahṭham loh, spy thawnthu ngaihnawm tak, changkang bawk si, a rawn puahfel hlauh mai a, Zofate tan vanneihthlak tak a ni. Thawnthubu; visa min pe pha chin hi a vang hle a, phal taka visa min petu chu amah Joe Ngurdawla leh a fachuam Wayne Cole-a thawnthu hi a ni.

Zofate thu leh hla tuipuia kan zuan luh hian kan hleuh thuk poh leh ziakmi ṭha khaichhuah tur kan hmu hnem a. Lithuk lama kan luh chuan tuikeplung hlu bik kan hmu ang. Chu'ng zingah chuan Joe Ngurdawla hi a mitla leh a langsar ber zinga mi a ni reng tawh bawk ang.

Wayne Cole thawnthu hi bu sarih zet a ni a, chu'ngte chu a indawt danin -Meet Me in Texas Moonlight, Meet Me in Hawaii, Berlin’s Calling, High Time in Paris, Dirty Broadway, Home in Texas, Okinawa Conspiracy te an ni a. Hemi chhunzawmna ‘Diabolic Cave Episode’ hi a puitlin hman ta lo a ni mai thei.

He thawnthu hian a ziaktu suangtuahna khawvel vah kikawi zauhzia leh khawhawi zauzia a pholang a. A duh thala a suangtuahna leh thu leh hlaa a themthiamna chu suihkawpin, chhiartute tana a ngaihnawm thei ang berin a duang a. A thawnthu hi In [building] ah chan ta ila, a ruangam leh in sakna hmanrua atan foreign materials, tuipui ràl chàk a hmang a. A ṭhen chu Far-East-a mite, America khawmualpui leh Europe ram leh ram danga mite an ni a. Chung chàk hmanga a sak ‘American Home’ chu Mizopa tualzawlah lenluh nuam takin a rawn hung a. A in lengte chu keini Mizo paho, tleirawl, nula leh tlangval, a ṭhen phei chu nutling patlingte kan ni a. Khual ṭha chhawn takin min lo chhawn a, thingpuisenhang leh kurtai min lo chhawp a, he In, Wayne Cole-a mansion hi keini’n ni tumtawi nan leh zan tumbum nan kan lo hmang ta ṭhin a ni.

A ziaktuin inspiration a neihna, a chàk lakna niawmte chu amah Wayne Cole-a ka aṭangin kan hre thei a. Ani bakah hian Matt Helm [spy thriller novel] ziaktu, Donald Bengtsson Hamilton leh Web of Spies ziaktu [a ziaktu tak erawh hriat a ni lo] Nick Carter-a leh khawvela detective/spy thawnthu lar berte zinga mi, 007 James Bond ziaktu, Ian Fleming-a hmingte a lam ri a. Hengte hi Wayne-a character din kawngah hian lungthu pawimawh eltiang an ni a tih theih awm e.

Wayne Cole thawnthu hi Indopui II-na tawp hnu deuh, khawvel histoty-a Cold War, Indona Vawt, tia kan hriat [1950-1970] chho vel, khawvel ram ropui pahnih, America leh Russia [Soviet Union] inchemhar lai, an inkara khawdur chhah lai, vansang lam thiamna, khawmual, tuipui chung leh hnuai, ralthuam neih ṭhat - Atom Bomb, Neuclear leh mihring khawsak kawng leh, infiamna lama chungnung zawk nih tuma an inel leh iner lai, chumi kawnga an hmatheh an pasalṭha [enthlatute] sapel taka an inpel a, an invehtawn dan chanchin ngaihnawm taka tarlanna a ni. He thawnthuah pawh hian CBW 70 FORMULA, chemical weapon hlauhawm tak hmuchhuaktu, German mi, Dr FL Hann-a rûk chhuah tumin an East Berlin lamah an inpel reng thu kan hre thei a. Hetah hian kan tunlai khawvel thleng pawha ram inkaihhruai nana pawimawh tak, democracy leh a leido communist idealogy a rawn khaikhin ber a. He thawnthu hmang hian Joe Ngurdawla hian world politics tuifawnin khawvel ram rang hrang a nghawng dan ngaihnawm tak chu chik takin min thlirtir a, min titipui pah a ni pawh kan ti thei ang. A chettlat hrep tawhna ni mai awmin ram hrang hrang geography, topography, mihring khawsazia leh hmunhmate a hre em em a. Joe Ngurdawla nihna [quality] sawifiah nan hian Khuswant Singh-a’n Indian writer, Nirad C. Chaudhury a fakna ṭawngkam hi han hawh ta ila, ‘His knowledge is encyclopaedic’ kan ti thei awm e.

Wayne Cole-a thawnthu hi a international a ni ka’n ti teh ang. A ziaktu hian a huapzo leh zau thei ang berin he spy novel hi a ziak a. Khawvel ram hrang hrang leh khawpui hrang hranga hotel,club leh ramhnuai, tuipui leh luidung leh mi hming thlengin ṭhahnem tak a tarlang a. Texas,Hawaii, New York, Berlin, Tokyo, Moscow, Cuba, Honolulu, Waikiki, Soul Silo, Escambray etc. Hotel leh Club hming - West Brook & Parker Hotel, Nordic Nightmare Hotel, West Ocean Club, Chefoo Hotel, Elkin Lodge, Otsu Lake etc. A characters hming - Wayne Cole, Sam [Kiddy], Rex, Dalton, Patty, Rosalyn Haywood, Dr Caroline, Strenapova etc. leh hmelma lam -David Wolf, Fugger, Lee Chou, Breadly, Zuhosky, Iron Face, Jarry, Nina Flemming, Kinkichi etc. an ni nuk mai.

Hmun ṭhenkhatah phei chuan chhiartute min hruai kualin min hrilhfiah bawk a. Hawaii thliarkar mawizia te, an khawpui Honululu nawmzia leh Waikiki tuipui kam ngat phei chu khawvel ram tin aṭanga milian leh neinungte tlawh nasat leh fuankhawmna ber, nula leh tlangval inngaizawngte honeymoon hman nana thlan nahawm ber a nih thute min hrilh bawk. Chu mai ni loin, an rimawi, Hawaii Guitar mawizia leh an hnam lam - Hula Dance te thlengin min hrilh a. A hmun hming leh kawtthlerte hi a thawnthu nena ngaihnawm taka suihfinin a sawi zau ta ṭhin a, hei ngawt pawh hi hriatna tizau tham a ni.

(Issue dangah chhunzawm a ni ang)

Review : Robert Laltinchhawna