MIZOTE LEH SOCIAL WORK

‘Social Work’ tih hming hrim hrim hi chu hre lova bar pawh kan awm lo hial awm e. Amaherawhchu, a ṭangkaina leh a nihna tak va hria erawh kan vang ve pharh mai thei. Subject tharlam a nih piah lamah, naupan laia kan subject zir ngai loh a ni miau a, tu mah indem thei kan awm lo vang.

KHAWVEL ṬHANG CHHO ZELAH SOCIAL WORK

Kan pi leh pute hunlai kha chuan lal leh a khawnbawlten ro an rel a, Val Upate thu ngaichang tel bawkin khawtlang a kal mai ṭhin. Kristianna rawn luh hnuah kan inrelbawl dan a danglam leh deuh a, Sorkar rorelna a rawn ni chho ta bawk. Amaherawhchu, kan kalphung hmasa leh Sorkar dan a inep ta zeuh zeuh a. Social media-ah pawh NGO/CBO mualpho kan hre ta nual reng a ni. Social Work erawh kan dan dinglai palzut si lova Mizo nun kengkawh tel tlattu a ni a. He subject rinchhan hian harsatna tam tak kan sukiang thei ngeiin a rinawm.

KRISTIANNA LEH MIZO NUN NEN

Zonun zemawi leh Kristianna hi Social Work nen a inhnerem em em a. He subject-ina a tum ṭhenkhat te chu – dikna ngainat, thiamna pek chhuah, rinawmna nunpui, felfai leh hnehsawh taka hnathawh, dinhmun tleu laklawhte ṭanpui, mihring hlutna hriat leh an dinhmuna indintir, khawtlang ṭhatna ngaihtuah, mihring inlaichinna ngaihhlut, thutlukna dik siam tura midang ṭanpui, hriatthiamna neih, midang lo teh ngawt loh, a hun azira thuruk zep, mi hnuaihnung zawkte aiawha din, inremna siam, lei rem rap thei tura midangte ṭanpui, etc. te hi a ni thei ang a. Tin, kum lama upa zawkte, hmeichhia, naupang leh chanhai, vohbik leh pianphunga rualbanlo te, rethei bakberh leh ruihhlo ngaite hi a thlurbingin a ngai pawimawh em em bawk a ni.

RAM CHANGKANG ZAWKAH AN HLUT

Khawvel zau zawk kan thlir chuan Social Worker te hian ngaihhlut an hlawh thei khawp mai a. An ṭangkainate hre chiangin Mizorama kan hmuh ngai loh hna tam tak an thawk tel fo a ni. Damdawi inah te Social Worker an chhawr a, damlote counselling pein an rilru sukthlek a ṭha zawngin an kawihhersak a. Tisa, rilru leh thlarau lamah kawng dik an kawhhmuh ṭhin. Zirna inah pawh Social Worker an chhawr nasa hle a, zirlaite dinhmun hrethiam tak chungin an harsatna laiah an lo pui ṭhin a ni. Zirlaite'n zirna an bansan mai tur lakah nasa takin a pui a, tumruhna leh harhtharna an lo tuhsak ṭhin. Khawtlang leh sorkar inrelbawlnaah pawh a fawng chelhtu atan an hmang fo a. Dik tak leh fel taka rorelna kalpui a nih theih nan hma an la ṭhin a ni.

KAN HRIAT SUAL HLEK ṬHIN A

Social Work hi thiamna hmanga thil tih (practice-based profession) a ni a. Mi mal, chhungkua, pawl hrang hrang, khawtlang leh ram ina harsatna a tawh te sut kian a, hmasawn zawnga kaltir zel hi a tum ber a ni. Damdawi chawhtu nazawng hi Doctor an ni kher lo va, chutiang chiah chuan khawtlang tana ṭhahnemngai taka hnathawkte hi ‘Social Worker’ ni lovin, ‘Social Activist’ tih a dik zawk ang. Hnatlang pawh ‘Social Work’ ti mai lovin, ‘Social Activity/Community Work/Communal Labour’ tih a mawi zawk awm e. Social Worker ni tur chuan hemi subject ah hian degree (BSW/MSW) neih a ngai a. Tin, Social Work subject hian chanvo/mawhphurhna (ethics), thurin (principles), thiamna (skills), hmanrua (tools) leh tih dan hmang (techniques) bik a nei hran thlap a ni.

SOCIAL WORK ZIRNA

Mizoramah hian Social Work zirna a tam lem lo va. Master of Social Work (MSW) hi Mizoram University, Aizawl leh ICFAI University, Aizawlah a zir theih a. Tin, Bachelor of Social Work (BSW) zirna hi ICFAI University, Aizawl, HATIM, Lunglei leh Divine Mercy College, Aizawl ah te a awm bawk a ni.

- Daniel Lalrinfela, Assistant Professor, Department of Social Work, ICFAI University, Mizoram