Mi hlawhchhamte hlawhtlinna

Hlawhchhamna lian tham tak, beidawng ngawih ngawih khawpa min siamtu kan la tawng lo a nih chuan–khawvela mi vannei ber emaw thil tum sang tak nei lo emaw kan ni tihna a ni ang. Chutih laiin vanduaina avang te, pumpelh theih loh harsatna avangte leh kan kawng zawh loh tur a nih avanga hlawhtlinna chang ta lo pawh kan awm thei ang. Tun tu mah hian mi hlawhchham, mi nuihzat leh hmuhsit hial tawk tawhte zinkawng ngaihnawm ṭhenkhat chauh kan tarlang dawn a ni.

Clint Eastwood

Vawiin khawvela kum 30 leh a aia tama upate zingah Clint Eastwood hre lo kan awm awm lo e. A hming kan sawi rualin Cowboy lukhumparh kan mitthla a; nu tam takin vawiin thlenga hmelṭha an tih a ni bawk. Hetianga mipa leh hmeichhiain hmelṭha kan tih kawp theih hi an tam lo khawp mai. 'The Good, the Bad and the Ugly' cowboy film avang chauh pawha mi ngaihzawn rawn; Clint Eastwood hi tunah hian kum 93 mi niin min la dampui a. Kum 1959–ah khan America rama film siamtu hlawhtling Universal Pictures chuan Clint Eastwood a hnenah hian lemchan khawvelah hian a ring rawlh ve lo turin an lo ti a. "I hrawkbawk (Adam's apple) hi a lian a, i ṭawng dante lah hi a muang ban churh mai a. Chu achhapah, i ha hi a la khem zui a! Chuvangin lemchan lamah chuan talent i nei lo a ni," an lo ti thlawt mai!

Mahse, khawvela lemchan thiamte lawmman hlu bera ngaih, Oscar/Academy Awards panga ngawt a dawng zui ta a nih hi.

Leonardo DiCaprio

Titanic film avanga khawvela mipa hmelṭha tia hriat leh mi zawng zawng hriat a nih hma khan, Leonardo DiCaprio hian lemchan khawvelah sulhnu ropui tak a nei hran lo a; mi hriat a hlawh em em lo. Naupang té a nih lai aṭangin lemchan lamah a inhmang chho ve a; hlawhtlinna ropui tak erawh a nei lem lo. Kum 1995 a tihchhuah 'The Quick and the Dead,' Sharon Stone leh Russel Crowe te channah khan Leonardo hi he film siamtute hian an ruai duh lo! Mahse hetih hun laia khawvel hriat hlawh khawpa lemchan thiam ni tawh Sharon Stone hian, he an film-ah hian Leonardo hi chang ve se a duh avangin Leonardo hlawh zawng zawng a tumsak a ni!

"Sharon Stone chungah hian ka lawmzia hi ka sawi bang thei lo. Ka lawmzia entirna atan engmah thil pek tur ka nei lo a; mahse ka lawmzia hi ka sawi zo thei ngai lo ang," tiin Leonardo hian a sawi a nih kha. Vawiinah chuan lemchan thiam leh environmentalist Leonardo hi kan hre vek awm e.

Amitab Bachan

Khawvelah leh India rama ngaihsan leh zah rawn, lemchan thiam Amitab Bachan hi hre lo kan awm awm lo e. Pa cher sang tak a nih avangin film siamtute chuan an ruai duh lo a; a aw ring tak avang hian All India Radio chuan Radio Jokey/RJ ni turin an ruai duh lo bawk! Lemchan khawvel hi bansan mai tur em ni? tia a inngaihtuah rum rum laiin kum 1969 khan 'Saat Hindustani' tih film a channa chuan hawlhtlinna pein tun hi a thleng ta a ni.

"Hlawhchhamna leh vanduainate hi nangmah tichhe vektu an ni thei a; chutih rual chiah chuan tu nge i nih tak tak lantirtu a ni bawk," tiin chona hmachhawn turin min fuih a ni.

Lalduhoma

Mizoram State Chief Minsiter parukna ni tura thlantlin, Lalduhoma chanchin hi India ram leh khawvela politics chanchina chuang reng tawh tur a ni. A hun hmasa lam leh tuna Mizoram a hruai dan zel turte chu sawi ngai loah ruat ila. Tun hun thleng tura a beihna hi a ngaihnawm lai leh chhinchhiah tlak lai chu a ni. "Zuang lawr, lal chaka tuihal, hotu ber a nih loh chuan awmna ngaia awm thei lo. adt..." tih te hi amah an sawichhiatna a ni. Chu'ng zawng zawng chu a tak nge a nihna tak tak tih lama buai loin, kum 30 aia tam politics khawvela a vahvaihna chu tunah hian hlawhtlinna a chang ta a. A duh ang leh a sawi ang tak taka ram hi a kaihruai a nih phei chuan a chanchin hi a ropui belh zel ang. Mi hmuhsitna leh sawi zuina zawng zawngte tuarchhuaka a hlawhtlinna lai hi a ngaihnawm lai a ni.

Pro. Pastor pathumte

Mizoram Presbyterian Kohhran, Mizoram Synod hnuaia Probationary Pastor rawngbawlna hna zahawm tak thawk tur hian mi pathumte chuan vawi riat an dil a; kum sarih an hlawhchhamna hi a hrehawm dan tur kan hriatthiampui vek lo ang. Kohhran leh khawtlang, Presbytery–Pastor bial pathum emaw pali emaw aia tam infinkhawmin an hlawhchhamna hi an hriatpui vek a; a té chhe lem lo. A ruka hnung lama sawizuina leh ngaihnepna te pawh lo tawk ta se la, an tawrh chhuah vek a ngai. Chuti chung chuan nemngheh rawngbawlna hna zahawm tak thawk tura beidawng duh miah loa an beihna chu Pathianin a hre reng a, a tawpah chuan mal a sawm a ni.

Heng kan sawi bakte pawh hi sawi tur tam tak a awm a, kan tarlan tlemte aṭang pawh hian beiseina kan nei thei awm e. Vawiina kan kawng zawh laiah hian hlawhchham mah ila, zawh zawm zel thei tura hun ṭha leh damna kan la nei a nih chuan, Pathian rinchhan chungin kan hlawhtlin hma chuan i bei zel ang u.

- Rinfela Zadeng