2024 PUITLING SUNDAY SCHOOL ZIRLÁI BU THLÌR LÊTNA TAWI
Mizoram Presbyterian Kohhran chuan Isaia bung 40–66 chu kum 2024 Puitling Sunday School Zirlai Bu atan a ruahman a. Zirlaibute hi, a hma kum thum vel aṭanga ziah ṭan ni ṭhin mah se, a zir kum takah hian Mizoram hun tawnin a mamawh êm êm lehkhabu an ni zel hian, Pathianin a Kohhran a kaihhruaizia a tichiang hle àwm e.
Zirna huanga an ṭhen ṭhin dan angin a ziaktu Rev. Vanlalnunmawia Zawngte chuan hmun thumah –
1. Isaia bung 1–39 (Isaia pakhatna),
2. Isaia bung 40–55 (Isaia pahnihna), leh
3. Isaia bung 56–66 (Isaia pathumna)
tea ṭhenin zirlaite tana hriat nuam tak, tawi fel takin zirlai tinte chu a ṭhen a. A Zoṭawng hman dan pawh a ṭha thawkhat khawp mai; punctuation pawh a ṭha e. Zirlaiah hian Mizo ṭawng duhtuite'na an hman ṭhin, 'Vawiin' tih chauh chu a hmanna hmunah hmang tluan ṭhakin vawi khat mah 'vawiinni' (Mizo ṭawng duhtui tena an hman duh loh) a hman loh avang hian Zoṭawng ziah dan tlangpui hi thiam hlea ngaih a ni.
Bung 59.4– 'thil sual tih duhna an pai a, khaw lohna an hring ṭhin' tih sawi fiahna 'felna lam hawia kalte tan dam khaw chhuahna reng a awm lo' tih hi 'sual chu a nih dan ang takin a lo lang chhuak mai a ni' tia dah ni ta se.
Bung 59.15– 'Thil ṭha lo bansantu chu ral lâkah a insiam ṭhin' tih hi lehlin tharah 'sual hawisantu chuan a tuar ta thung a' tiha dah ni mah se, helai cháng hi sawi fiah zuina a awm loh avangin, 'thil sual leh ṭha lo an tih ṭhin bansantu chu ramsa ang maia pêlin a awm a, sual hawisantu chuan a tuar ta hlauh zawk a' tih emawa a hrilh fiahna hi dah ni ta se la, hriat a nuam lehzual maithei e.
Bung 60:12– 'I rawng bawl duh lo hnam leh ram chu a boral dawn si a; a ni, chung hnamte chu tih chhiat hlauhvin an awm ang' tih Cháng hi Mizorama inkhawmpui ilotea thupui lar tak a ni a. Zirlaibu (pp 204)-a sawi fiah dan chu hetiang hi a ni: Pathianin a mite a duatzia sawiin, 'I rawng bawl duh lo hnam leh ram chu a boral dawn si a,' a ti, tiin. Israel hnam hi Lalpan a duat hle; chuvangin, Israel rawng bawl duh lo hnam leh ram chu a ti boral ve dawn a ni ang, tih a ni. He thu vek hi Mizo Bible Zirnaah chuan 'Hei hi zawlnei sawi a ni lo; a ziak chhawngtu thu belh nia ngaih a ni' tih kan hmu bawk a (Mizo Bible Thuthlung Hlui Hrilh fiahna, The SL & PB, pp 165). Hei hi a ziak chhawngtuin a belh mai ni si, Bible-a telh a ni teh tlat hi sawi fiah leh deuh theih a nih chuan zirtute tana hlawk hle tura ngaih a ni; zirtirtute an ṭan deuh a ngai dawn a ni. Helai chang sawi fiahna tho hi Mizo Bible Zirnaah thung chuan 'Pathian mite laka hnam dangte awm dan chu Pathian laka an rilru dik tak tàr lanna a ni (cf Gen 12:3). Pathian rawng bawlna chuan a mite tana rawng bawlna a keng tel tlat a ni, tiin dah a ni thung (Mizo Bible Zirna SL & PB, pp1333). A hmasa zawk hi sawi fiah zui deuh a nih loh chuan, a hnuhnung zawk sawi fiahna hi mi ṭhenkhat tan chuan hriat a nuam deuh zawk maithei.
Chapona hi Lalpa huat zawng tak a ni. Khawvelah Lal ram ropui tak tak a lo ding tawh ṭhin a; kum 250 aia rei hi an ropui hlei thei lo a ni, tiin a ziaktu hian min hrilh a (pp 96). Hei hi a dik tlangpuia ngaih a ni. Assuria lal ram hian kum 300 awhin Babulon-in kum 200 vel, Persia lal ramin kum 228 vel, leh Greek-in kum 100 zet zawt; Mongols' Gengis Khan lal ram, kum 126 chhûng; Rom lal ram erawh hi chuan kum 1000 lai awh anga ngaih a ni thung a. Hetianga rei lal ram dang hi chu hriat theih chinah chuan a la awm lo
Bung 59.4– 'thil sual tih duhna an pai a, khaw lohna an hring ṭhin' tih sawi fiahna - felna lam hawia kalte tan dam khaw chhuahna reng a awm lo' tih hi 'sual chu a nih dan ang takin a lo lang chhuak mai a ni' tia dah ni ta se.
He lehkhabu, phek 270 laia chhah, a káwm design leh colour pawh a bu chhung thu nena inhmeh mawi tak, Rs 120 chauha lei theiha ruahman a ni hi a tihzia hle.
Presbyterian Kohhran mite chauh ni lo, mi zawng zawng tan hetiang (Isaia lehkhabu), hrilhfiahna ṭha, hriat nuam, tawi fel leh mi thiam kut chhuak ni bawk si hi khawvel awm chhung chuan lehkhabu ro tling, a mamawhtute tana reference ṭha leh ṭangkái tak a ni ngei ang.
– Dr J.T.Vanlalngheta