CJM PAKHAT LAN DÂN KHA!
November ni 20, 2023 zâna Sialsuk khúaa thil thleng, RK hotel leh 'customer' pakhat inkâra buaina thlengah, thil thlen dân tak chu sawi dân hrang hrang awm bawk mah se, thil ti sualtu an awm ngêi a ni chêk ang a, jail bang hial zût ngai an awm tih thawm chuan Zoram khawvel social media a luah rang viau a nih kha!
Ṭum khat chu, vêng danga 'Live Crusade' neihna hmunah hian mite min hmuh dân 'en chhinna' ka'n nei teh ang ka ti a.
A zan khatnaah chuan 'coat suit' ka neih ṭhat ber nên, tie awrh thlapin, Bible iptê nên lam 'smart' thei ang berin ka inthuam a. Hmêl hriat hnaivâi kha chu ka thil 'en chhinna' neih duh avâng khân ka thurualpui duh lêm lova. Mi nãwlpui thlen hmâin biak in kawt ka thleng a, 'usher'-te chuan dawh sâna ṭhutna hmun lam min kawh hmuh thuai a. Chutah chuan lungawi takin ka ṭhu ta vâng a. Rawng bâwltu chin ṭhutna a nih bawk avângin vêng dang aṭanga inkhawm ve ta fam chu kan langsar deuh bawk a niang e, mipui hriatah a din pawh min din tir hial nghe nghe. Inkhâwm bân thlengin chibai ka hlawh a ni.
A zan hnihnaah erawh chuan 'jacket' chul lam deuh tawh ka ha chhûak thung a, 'muffler' bât-in, kekawr pawh thawmhnaw dang nêna in-suit lem lo, Bible pawh a lâwng deuh tawpin, tiang chuan pangngai tâkin hma takah biak in kawt ka thleng leh a. Chutah erawh chuan, mipa pâwl ṭhutna tlara a hmasa lamah chuan ṭhutna tûr min kawh hmuh ta thung a. 'En chhinna' neih duh vâng hrim hrima inthuam danglam lui ka ni kher bawk a, a hma zân lawka ka ṭhutna lam pawh kha la âwl phei vek mah se, lungawi takin chutah chuan ka ṭhu ta a. A zân hmasa nên chuan a boruak a dang ta hlek thung!
'Inthuamna nge pawimawh a, a mihring zâwk hi' tih ngaihtuah zui a awl duh khawp mai. Hmun ṭhenkhat chuan incheina tûra kan beisei hi a awm hrang ve bawk. Biak ina ṭhutna kan inrem dân te hi en nawn deuh chu a ṭha mang e. Indian Constitution dûang tute zinga mi, Dr B.R. Ambedkara leh a hoten mihring inthlìar hranna awm lo sakhua zawm tûr an zawn kual chiam lâi ata tawh kha, tun thleng hian Kristianna huangah pawh inthlìarna hi a awm tam tial tial ni hian a hriat a ni. Kohhran hrang hrang inkhâwmah te hian, rethei leh hausa inkâr, a thuam nei ṭha deuh leh nei ṭha lo deuh te, sawrkar hna sâng thawk tute leh nitina inhlawh chawpa eizawng te nên lam, mihring anga inhmuh ropui tâwnna zâwk hi thleng fo sela, chu chuan inzahtawnna ṭha lehzual hi chu min thlenpui zâwk mai awm mang e.
A châng chuan 'show room' te hi thawmhnaw mawl-mang tak leh 'slipper' bun deuh khera luh luih châng ka nei a. Khatia ka'n tih kher chhan tak chu, tute hian nge kan incheina ni lova, mihring kan nihna zâwka zahawm taka min lo dawngsawng ṭhin tih hi ka chîk duh vâng chauh a ni.
Liandova te unau thawnthûa lal ropui tak, Lersia, khawtlângin an lo mikhùal dân te kha rilruah chuan a thar khawp mai. Tûn hnâia CJM pakhat leh a lo mikhùal tute chungchâng pawh hi (thil thlen dân tak chu engtin pawh lo ni sela) Mizote hian inzir nân, mahni mihringpui kan 'treat' dân kawnga zir lai pawimawh takah hmang hlauh ila a duhawm khawp mai. Kan inthuamna chu eng pawh ni sela, mihring kan nih hona ngawt pawh hi inzahtawnna tham a nihzia hre nawn mawlh mawlh teh ang.
~Samuel Dinté, Chennai