Tuihna humhalh
Internet khawvelah cheng tawh mah ila, tui kan mamawhna a tlahniam chuang loa, tlakhiam a hnekin nitin-in kan mamawhna a sang tulh tulh zawk.
Mithiamten kan chenna khawvel hmun thuma ṭhena hmun hnih (2/3) lai chu tuiin a khuh timahse, tui thianghlim mihring tana hman tlak erawh a tlem hle thung. Khawvela tui awm zawng zawng za-a pakhat aia tlem mah chu tuithiang mihring tan hman tlak a ni.
A tlem sa teh lul nen, heng tuithianghlim zinga thenkhat chu vur leh mihring khawsak theih lohna hmun a awmte ala ni ta cheu mai! Chuti khawpa vang leh hlu chu kan humhalh ava tul tak em.
Mizoram chu ruah-tui tamna ram a ni a, chu chuan nasa takin tuihna a siam a, thing leh mau chereu mai turte nasa takin a hum a ni. Khua a khen rei deuh chuan harsatna kan tawk nghal mai thin, chu chuan chiang takin kan nunah nghawng a neih nasat zia a tichiang mai awm e. Khua a thal chho leh tan mek a, tui a harsa chho leh tulh tulh dawn. Tui renchem nachang kan hriat a pawimawh rualin, kan tuihna te humhalh a
ṭul zia kan inhrilnawn fo a ngai.
Tui kan hmuhna hi chi hnihah an then a, chungte chu - Lei hnuai aṭanga kan hmuh (Ground Water) leh Ruahtui, lui leh dil tui (Surface Water) te a ni. Heng te hi tui thinghlim kan hmuh theihna hnar te an ni a, mihringten kan humhalh leh kan venhim thiam dan a zirin a thianghlimin a thianghlim lo thin. Kan chenna a bolhlawh tawh em avangin, ruahtui kan dawn ṭthen khat chu hman tlak loh khawpin a bolhlawh tawh. Heng hi engdang vang a nilo a, mihringten boruak kan tihbawlhhlawh chak em vang a ni.
A kum telin tuihna a tlem tial tial a, thang thar lo awm leh zel turte tan chenna tlak lohah kan chhuah mai ang tih a hlauhawm hle. Thing leh mau nasa takin kan tichereu a, tuihna siamtu ber an nih avangin mihring ten kan tuar lo thei lo. Kan hriat ve phak chinah pawh thing leh mau kan suat nasat zia chu hmuh thein a awm. Khua/veng chhunga, mipuiten tlan bera kan hman thin Tuikhur then khat chuan hna mumal an neih tawh loh avangin a ro rem rum mai. Chu chuanharsatna tam tak min thena, man to tak taka tui kan lei a ngaih pha fo. Kan khawpuiah ngei pawh hi en ila, tlem a rualu deuh chuan kan sawi tak ang khi sawi tur tam tak an hre ngei ang. Mipui kan pung zela, kan mamawh pawh a sang zel.
Amaherawh chu kan mamawh tui thianghlim erawh a pung ve si lo, ngaihtuah ava tithui tak em! Kan la neih chhun angte hi kan hlut thiam a, kan vawn that a ngai tak zet. Thingphun, thing leh mau humhalh leh tuihna a pun theih nana kan tih ngaite chu midang tihah khek loa, kan chet chhuah nghal a ngai tawh a ni. Ram kang te, kan bawlhlawh paih te leh khawpui thli te hian kan tuithianghlim neih chhun te a tibawlhlawh zel si a, kan fimkhur tlan a hun tawh tak zet a ni.
- Matea Pa