KHAWI AH NGE MIZO PANGPAR

Pangparte hian mihring nun an tihlim in an ti hahdam ṭhin. Kan taksa chauh laite,kan rilru hah laite in pangpar vul chuk mai kan bulah a awm chuan chu chuan min ti hahdam huai huai ṭhin. Pangparte hi khawvel pum timawitu an ni.Engkim siamtu in thil siam te tihlim tur leh timawi tura a lo din pangparte chuan rimtui an pek chhuah bakah zu tam tak an siamchhuak a, chungte chu phengphehlep leh khuai ten an tlan a, an zu siamte chu mihring tan chaw leh damdawi ṭha tak an lo ni leh a.

Khawvel ah pangpar sang tam tak awm mahse Mizo pangpar diktak,kan pi leh pute hunlaia an lo chin tawh chuan Mizo leh Mizoram hi an mawi ber mai. Zokhua ah chuan lo lamah thlam bulah an ching ber a. Ni sensa hnuai ah hah hnep in hlo kan thlo a.

Chhunah chawl turin thlam kan pan a,thlam bulah chuan pangpar vul chuk mai te chuan min lo hmuak a,par zu tlan phengphehlep ṭial mawi leh khuai te chu an lo thlawk delh delh a,thlifim in a rawn chhem bu siau siau a. Kan taksa ngei pawh chu thli in a rawn chhem dai ta a.Hah kan hre tawh lo a,chutiang nun chu a lo hahdam ber mai. Nun thlakhlelhawm ber a lo ni. Tunlaia natna lar ber miten an thihpui nasat ber thisen sang leh zunthlum te chu kan umbo chiang ṭhin khawp mai.

Aizawl khawpui ah phei chuan Mizo pangpar te kha hmuh tur an awm ta lo. Mizote hi kan mak khawp mai,thil thar lawm mi kan lo ni a. Kan kawt leh bathlarte chu mi ram pangpar in a luahkhat zo ta. Rual ute mit a la ve lo a,an rilru a tihlim ve thei lo. Han en mai pawh hian lunglen a kaichhuak ve thei lo. Hmanlai mite leh rual ute chuan sawi tur an va ngah dawn em!

Haw u,kan inbul leh kan kawt vela ramdang pangpar kan khawi te hi a remchan chuan Mizo pangpar in i thlak ve tawh ang u. Mizo kan nih chuan kan pangpar neih ve te kha kan ching uar tur ani ang.

Mizote hian hnam dang pangpar kan ngaisang in kan la lut ang hian mi ram ten kan pangparte hi an hlut ve angem le? Pangparte hi an hunbi taka lo par theuh an ni a. Mi ramte tih ang in Mizo Original Flower-te hi ching theuh ila,mi rama thawnchhuah tham khawp kan thar theih chuan sum hmuhna ṭha tak anih a rinawm.

Kan state flower-atan mi ram pangpar kan lakluh hmang lovin kan pi leh pute hunlaia an lo chin tawh kan hman zel hi a inhmeh a ni. Anthurium Festival-tih ai chuan Zamzo Festival tih chuan Mizoram hi a timawi bik a, Mizoram a zofate a ti Mizo bik a ni.

- H. Neihchungnunga, Durtlang North