AMERICAN FASCISM LEH MIZOTE

TV-ah Donald Trump-a pawlte leh amah duh lotute an innawr luih luih mai a, a hmuh nawm phian. America ram khuan buaina a hlat lo a ni tiin a ram chhung ngeia awm mi thiamten an lo sawi tawh ṭhin a. A la thleng dik tak tak mai awm mang e.

Fascism han tih hi chuan Hitler-a hnuaia Germany leh Mussolini hnuaia Italy ramte rilruah a lo lang a. Amaherawhchu, tunlaia America ram kal phung hian Fascism a hlat lo hle niin zir miten an sawi.

Ram kal phung dik loh vang leh chhan chi hrang hrang avangin mipuite dinhmun a hniam hle thei a, a ram leilung fate ngei pawh ei tur dap chawpin harsa takin an awm thei. Chutianga beidawnga an awm lai tak chuan chhan-chhuaktu an mamawh a, dinhmun ṭha zawka hlang kai theitu nia an hriat hruaitu thar lo chhuakte chu an zui ruak ruak mai ṭhin a ni. Germany ram tlak chhiat lai leh rilru hniam lai chu remchangah lain Hitler-a chuan a duhna lam lamah a hnuk kal a nih kha.

Mipui rilru chawk tho turin thil an ngainat sa leh an hriat ṭhan sa chu hmanruaah hmangin mipui rilru hneh an tum a. Germany-ah chuan Nordic Mythology an chawi vul thar leh a. Italy-ah chuan Rom lal ram ropui lai an ngaisang thar leh a ni.

America ramah pawh khuan a ram mi ngei, harsa taka awm tam tak an awm a. An phu ang hamṭhatna an dawng lo va, an bei a dawng a, politics-ah lah beisei tur awmin an hre lo a, president atan pawh 'a ṭha lo nep ber' thlan mai bak chu beisei tur an hre bik lo niin a lang. Mipui vantlang chunga leng - zirna lama mi thiam te, scientist-te leh mi lianten awm dan tur leh ngaihtuah dan tur thlenga an hrilh a, an thunun hi an ning tawh a ni.

Chutih lai tak chuan Donald Trump a rawn lang ta thut a. Ani chuan Fascist-ho tih dan dik takin, mipui zinga a mi rethei leh rilru beidawng ber berte rilru hneh tumin a rawn bei ta! An rama hnam dang mi awmte huatna thu a rawn chhak chhuak a ni ber a, Muslim a ngainat lohzia a thup lo va, Kristianna a humhalh tur thu a puang chhuak bawk a; Fascist chet dan dik tak a ni ta. Chutih laiin amah chu billionaire a ni bawk si. America hi hnam dang tan chep tak ni turin, fascist state ni turin boruak a inmung mek a ni.

An harsatna lian ber chu Islam a ni lo va, an rama hnam dang awmte an ni lo va, mi hausa duham chin tawk hre loho khu an ni. Chungho chuan media an control a, mipui rilru an control bawk si a.

Mizoram pawh hi kan political system-ah hian kan beidawng a ni. Tu party pawh tling sela a hmaa mi ang tho an ni dawn tih kan chiang tawh a, 'a ṭha lo nep ber' thlan bak chu tih theih kan nei meuh tawh lo. Amaherawhchu, election hun a lo her chhuak leh ang a, political party-ho chuan mi rethei leh mi beidawngte rilru chawh thawh tumin nasa takin ṭan an la leh ang a, an hma lak dan tur chu a chiang sa reng mai.

Fascist-ho ang bawkin ram leh hnam an rawn hmangaih thar leh ang a, Kristianna leh Pathian nung a ri zing leh hle ang a, kan chhehvela hnam dang awmte huatna leh hnawh chhuah thu pawh a ri tel leh nawk ngei ang. Chutiang thu an rawn sawi leh a nih chuan lo awih reng reng suh ang che. Inbumna hlauhawm tak a ni.

Chu ai chuan kan state hi dan anga kan kal theih nan huai-sen kan chhuah a, kal phung dik lo kan kalsan ngam a ngai a ni. Kan ram dinhmun hi magic hmanga siam fel chi a ni lo.

- Asangtea