Mission Veng Biak Inpui

Kumin January thla khan Vanglaini chanchinbuah (a tahrik ni chiah ka hre ta lo), Upa C. Dorema, Kulikawn Vengthlang khan, Mission Veng kohhranten kum 2019-a Synod an thlen chungchanga an in puahchah dan turah thurawn ṭhenkhat a rawn tawk-tarh a. Upa Dorema-te nen hian Mission Venga pianga seilian, Biak Inpuia lawi za, inti Mission Veng tak kan ni ṭhin. Veng dang aṭanga a rawn vei pui pawh kha a mawh love. Hemi chungchang bawk hi ka han tuihnih ve teh ang; tu huat thu kan sawi lovang chu!

Mizoram Synod Presby-terian Kohhra lo pian chhuah dan kawngah hian, Mission Veng Biak Inpui leh Mission Veng hian hmun an luah thuk khawp mai. Tirhkoh hmasa ber te, Kohhran Upa hmasa berte leh Pastor hmasa berte pawh he Biak Inpuia nemngheh vek an ni. Zosaphluia ho khan tuna a dinna Hrianghmun an tih
ṭhinah ngei hian, chutihlaia Biak In ropui bera ngaih, a veranda lam tukverh leh ventilation-ah pawh stained glass vuah chu, 1912 ah sak a ni a. He Biak Inpui hi chu tihlaia Welsh Mission serh leh sang puithuna thil ṭul zawng zawng an lo sawngbawlna hmun a ni a; “Kan kohhranho lungphum chu” tia Pastor Chhuahkhama’n hla a lo siam kha, he Biak Inah hian a burbun theih hial awm e.

Amah Pastor Chhuahkhama ngei pawh kum 1913-a he Biak Ina Pastor tura Zosaphluia nemngheh a ni si. Chutih hunlaia Calvinistic Methodist Welsh Mission Headquarters chu he Biak In te, Bangla Puite, Loch Printing Press (tlaikhawhnua Synod Press kan tih tak rawk) te, Bookroom te leh Bawlhmuntlang British Administraion-ina pek huam chin leh a hnu deuha Mission Veng huap chin ram, Zosaphluia’n Rs 100/- a a lei belhte chu an ni mai. He headquarters-a a pawimawh lai ber, a spiritual centre (sanctum sanctuarium) chu Biak In pui hi a ni kumkhua ṭhin.

Mizoram chhunga mission field a lo darh zau zel a, kohhran a lo pun deuh deuh khan, Dawrpui Kohhran tih loh, chung kohhranhote sak Biak In lo ding zelte chu Mission Veng Biak In 1912-a sak, ‘plan leh design’ ang chiaha duan vek an ni a tih theih ang. A mak lem lo, hmun pui ber Biak In na na na, an copy zel mai loh ten! Dawrpui Biak In thung hi chu kum 1936 a Pu Mena hunlaia sak a ni a, Mission Veng Biak In design ang lova sak a ni. A mawi leh a ropui tehreng nen, Zoram chhung Kohhran dang chuan an copy ve ta lem lo thung. Tunah ropui taka sak ṭhat mek a ni. Ti leh ṭhin ila, he Synod hmunpui, ti Synod-tu ber chu Biak Inpui hi a ni ti ila kan tisual tam lo ta ve ang. Headquarters Kohhran a lo len tak zelah chuan he Biak Inpui hi kum 1954 a ṭhiah a ni a, a ṭhiahnaah pawl 3 naupang niin kei pawh ka tel ve. Doremateho nen hian a dawhsan maicham hunna chhuat hnuaia pawisa lai-awng tla engemawzat kan chhar lehnghal.

Pu Lloyd hova ‘concrete’ a sak Biak In hmasa ber a lo ding leh a. Kohhran member an pun zel avangin kum 2008-ah sak ṭhat a ni leh a; tuna mi hi generation thumna Biak In a ni ta. Pathian khawngaihna zarah he Biak In aia lian leh ropui zawk, Kohhran lo piang zelten an sa ta thluah mai. Mahse he Biak Inpui dinhmun ropui tak hi tuma chhuhsak theih a ni chuang lo. A tira ram pum huap Assembly inkhawmpui, a hnua Synod kan tih tak inkhawmpui liante kha, kum 1937 hma lam kha chuan Mission Veng Biak Inpuiah nghah a ni ziah ṭhin. Chutah Dawrpui Biak In nen kum 30 chhung emaw zet chu an in thlen chhawk ṭhin a nih kha.

Upa Dorema’n Mission Veng Biak In hi Presbyterian Kohhran pumpui tan; ‘Home Church’ a ni e, a tih kha a dik chiah mai. India ram hmun zau zawkah pawh (Sap ram lamah pawh a nih tho ka ring), Biak in ding hmasa ber, Kohhran Headquarters-in a ṭhutchilh nghalte hi chu ‘Mother Church’ an ti ṭhin; a hnua kohhran dang dang lo piang zelte hringtu (mother) a ni miau a. Chuvangin, a hrinate hian a hringtu hi an zawlpuiah an en ṭhin a rinawm loh. Synod Administration ṭhang chho zel kara he Biak Inpui hi Mission Veng Kohhran bil Biak In anga ngaih a nih tak hnu hian Presbyterian Church of India hnuaia members hrang hrangte hian kum za liam ta hma lam aṭanga dinhmun pawimawh ber (pride of place) he Biak Inpuiin a lo luah ṭhin kha an theihnghilh ta deuh a ni maithei.

Tichuan, kum 2019-a Synod Inkhawmpui a thlen dawn vang mai nilovin, Mission Veng Biak Inpui hian Mother Church a nihna dinhmun phu tawk zahawmna leh huhang (prestige and honour) chu a ken zel theih nan a ṭul dan ang zela tihlen (extension) nan ram a mamawh belh a nih pawhin a mamawh zat apiang chu Synod hian a sahthlak zel mai tur ni awm tak a ni. Kan Pioneer Missionaries Zosaphluiateho khan, Biak Inpui ram boundary chin tur leh Mission Veng Kohhran Pastor Quarters ramri chin tur an lo rin lawk sa dim diam hmel loh khawp mai! Bengsika han ngaihtuah pawhin Mother Church-in a mamawh tawk ram pek zel chu Synod thuneitute bat ni zawk awm tak a ni.

Mizoram Presbyterian Kohhran ṭobul, history hi kan duh emaw duh lo emaw kan tidanglam thei tawh lo; chuvangin, ‘PCI of Mizoram’ zahawmna hi he Biak In hian a keng tel ve tlat tawh a ni. Chu chu Synod OM leh SEC te hian an theihnghilh mai tur em ni ang?

- Rin Sanga