Thuthlung bawm awmna chu

Zofate zinga Pathian thuthiam leh chhuanvawr Revd Chuauṭhuama'n Vanglaini daily dated 20th February, 2016 issue a 'Thuthlung bawm kha khawiah nge' tih thupui hmanga a rawn ziah kha ka lo chhiar a. A thuziak kha a ngaihnawm khawp mai a, a bengvar thlak hle bawk a ni.

Amaherawhchu, thuthlung bawm awmna tak chu a chhui chhuak ta lo niin ka hria. Thuthlung bawm awmna chu kan Holy Bible ngei maiah hian tawi fel takin hmuh/ chhiar mai theihin a awm a ni lo'm ni?

Zawn buai teh chiam pawh ngai loin tuna kan Holy Bible hman lai mekah hian tawi fel takin a chuang kalh alawm.

Thupuan Bung 11 (sawmpakhat) chang 19 (sawm-pakua) ah ti hian fiah tawk takin a inziak a. "Tin, vana Pathian biak in chu an hawng a. Tichuan a biak inah chuan a thuthlunna bawm chu a lo lang ta a; tin, kawlphe te, aw te, khawpui ri te, lirnghing te, rial nasa tak te a lo awm ta nghal a" Thuthlunna Bawm awmna chu a chiang tawk fek fawk hlein ka hria.

Eng hun laia lak chhoh nge, tute hmanga lak chhoh nge etc. tih erawh chu ziah lan a ni lo. Helaia ziahlan piah lam hi chu kan Pathian ropui tak hian hringfate hriat vek ṭul a ti lem lo a ni ngei ang. Kei chuan helai Bible-a in ziak hi ka ring nghet bur mai a ni.

A hahdam thlak khawp mai. Kan Pathian ropuizia leh thiltihtheihzia a lang chiang hlein ka hria. Tunlai khawvel mihringte'n han zawng eltiang mahsela kan chenna khawvelah hian hmuh tur a awm tawh loh hmel khawp mai.