Zirlaite leh freedom of SPeech

Jawaharlal Nehru University (JNU) Sabar-mati Hostel kawta zirlai tlemte Democratic Students Union (DSU) mi leh sa pungkhawmten poster thuziak leh thlalak hrang hrang kenga “India a tlukchhiat hma chuan, Kashmir tih zalen a nih hma chuan chawl lovin kan bei zel ang” (Bharat ki barbaadi tak, Kashmir ki azadi tak, jung-rahegi jung-rahegi) tia an aurual hian enge awmzia a neih le? Constitution zahlohna a ni em? India phatsanna a ni em? Chu ai mah chuan ‘freedom of speech’ huang a pel em? Heng zawhnate kan chhan hmaa kan in zawh tur chu India ram democracy inchherchhuan ching-chivet tak karah hian tuin nge ‘freedom of speech’ ramri kham ang a, a awmzia hrilhfiah ang? tih hi a ni.

Democracy rama mipuite chanvo pawi-mawh ber pakhat chu mahni ngaihdan leh duhdan sawi thei tura zalenna (right to freedom of speech and expression) hi a ni. He dikna chan-vo hlu tak hi India danpuiin khua leh tuite hnenah Artcle 19(1)(a) kaltlangin a pe a. Article 19(2) chuan he chanvo hman ṭangkai theih chin hi bitukin ramchhung himna khawih pawi tur te, vantlang buaina chawk chhuak tur te, Court thupek palzut nan te leh India inpumkhatna tichhe thei zawnga hman te a khap tlat thung a. Hemi hrul deuh hian British hunlai ata an lo hman tawh Indian Penal Code (IPC) in a chhawm tak zel Sedition law chu Article 124A ah awm ve lehin tu pawhin sawrkar laka hel tur leh tharum thawh turin thusawi/ thuziak emaw thiltih dang hmangin midangte fuihpawrh sela, he dan hmang hian kum thum aṭanga damchhung lungin tang tura hrem theih a ni.

He dan hi a lehlam zawng taka ngaihtuah chuan a firfiak hle. British rorelna hnuaia zalenna sualtute sawisakna dan
ṭihbaiawm tak hi India a lo zalen hnu leh democracy ram a lo nih hnua hman zui zel a ni hian zawhna a ti tam hle. He dan tehna aṭang hi chuan JNU zirlaite hi an thiam lo hulhual a, na taka hrem theih an ni. He dan tehna aṭang hi chuan Hyderabad University Ph.D zirlai mahni intihlum ta, Rohith Vemula khan thiam channa reng a nei lova. Hnam (caste) hnuaihnung zawkten zirna sang zawkah pawh endawng an tuar reng duh lova pawl an indin Ambedkar’s Student Association (ASA) kaltlanga an thiltih hrang hrangte chuan ram hmelma (anti-national) nihna a beltir ta zawk a. He dan tehna aṭang hi chuan hmarchhak mipui tam zawk zinga bawngsa ei, vaiṭawng thiam lo, Hindu sakhaw hnung zui bawk si lote phei hi chu India dodaltu (anti-India) hmuha hmuh kan lo ni reng dawn a ni.

Hmansual a nih loh nan ‘freedom of speech’ hian ramri a neih chu a ngai ngei mai. Mahse JNU case bik hi en ta ila. Sawrkar laipui suma chawm zirlaiten duhtawka ram kalsiam an sel a, ram hruaitute an dem a, an rorel danah thil felhlel emaw dik lo awm nia an hriat an auchhuahpui hian eng pawi mah an sawi lova. Freedom of speech chuan mathei lovin freedom to dissent (kalh), disagree (pawm lo), argue (hnial), debate (ṭan lam neia sawiho) te pawh a keng tel nghal vek a ni. Chuvangin, a lo kal filawr deuh leh duh rum pawl an awm chang pawh a awm fo ṭhin a ni. Tu pawhin ṭanhmun hran leh thlirna hran an neih miau avangin Afzal Guru emaw Yakub Memon te thlavang hauh duh tan pawh a thiang a, Kashmir issue a ni emaw Maoist chungchang a ni emaw sawichhuak a, chai ho turin zalenna an nei a ni. Chu chuan India ṭhen darh duhna emaw helna chawh chhuah lam a kawk lo a, zir thiamna (academics) huangah phei chuan chutiang sawiho chu thil ṭul leh tih makmawh, zirlaite ‘intellectual empowerment’ petu a ni zawk.

JNU zirlaiten kum tam dana an lo neih tawh - huai tak, ualau leh zalen taka eng chungchang pawh an lo auchhuahpui ṭhinna - hi Hindutva politics rumra lutuk
aṭang chuan ngaihhnathiam theih chi a ni lova. A chunga kan sawi tak auhla chham te pawh khi campus chhung pilril, tu khawkha hriatlohna hmuna thleng satliah, dan naranin khawilam buaina mah cho chhuak lo tura ngaih a nih laiin Sangh Parivar uisathiam ṭhenkhat a chhaih kawlh ta miau a. An sangawi zawnpui media ṭhenkhat lahin ‘khual thuthang leh ar pan chuk’ tih hre ranin ram mipuite sahuatah tak an dek a. Zankhat thil thuah zirlai pawisawi lo tam takte chu ‘ram hmelma’ leh ‘terrorist rilru pu’ ang hialah chhuah an lo ni ta reng mai a ni.

Hetiang a nih chuan India ramah Dalit emaw Muslim nih te, Kristian leh tribal nih te, ‘Bharat Mata Ki Jai’ tia au ve duh lo zirlai nih te, RSS saffron puanzar hnuaia kun ve duh lo nih te chu ala thawipik thlak telh telh maithei a. Politics kan ngaihven emaw ngaihven lo emaw hei hi Modi-a sawrkar hnuaia India kawng zawh mek a nih miau avangin hmasawnna tam tak karah nekchepin kan awm hret hret reng a ni tih kan hriat a ṭul. Constitution hnuaia ‘Freedom of speech and expression’ kan neih pawh hi lalna leh thuneihna changtuten rawhtuina meipuiah min paihsak lo chauh chu a nih tawh hi.

- C.V.Lalmalsawmi