Sande Sikul zirlai hi Kan commentary ni nghal a ni mai

Kan Bible bu hrang hrang hi chhui zau tumin lehkhabu rawn tur zawng ta ila, sapṭawng thiam lo tan chuan a ngaihna a awmlo hle mai. Sapṭawng hrilfiahna “Bible Commentary” an tih hi chu Bible bu pumin book room hrang hrangah hmuh tur a awm a. Mizo ṭawnga hrilfiahna hranpa (commentary) kan tih hi chu duhthusam a awm mang lo a ni. Hei vang hian puitling lam sande sikula bible bu chhung thu kan zir thinte hi chhui zauna anga hman mai a ṭha ṭhin.

Mizoram Baptist kohhran leh Mizoram Presbyterian kohhran siam sande sikul zirlaite hi hmaih loin kan la khawm ṭhin a. Synod Book room lehkhabu discount naa special package an siamah te, BCM book room discount ṭhinah te a ngaihven te chuan man tlawmtein a hmuh theih ṭhin. Heng zirlaibu te hi a ṭangkai khawp mai. Kan bible commentary Mizo ṭawnga kan neih angah ngai ila, a hlu hle a ni. Mimal ṭhahnemngaia siam a awm bawk ṭhin a, hengte pawh hi an rawn tlak ṭhin hle bawk.

Kan sawi tak ang khian Bible chhui-zauna duhthusam kan neih loh avang leh a buatsaih te a hautak avang hian sande sikul zirlai siam lamah tal ṭan kan lak a pawimawh hle mai. A buatsaihtute hian zirlaibu hi chhah lutuk hlau lo se, a chhah an hlauh avanga duhthusama an siam loh hi a hlauhawm zawk mah mai. Sande sikul zirlai siamtute hian chang tin hi fiah takin hrilhfiah sela. Hrilhfiah ngai lo nia an hriatte pawh a lo chhiartu tam tak tan chuan enge a sawi tum ni ang aw tih rilrua awm reng ani thei a. Eng chang mah kal kan lo se a ṭha a ni. Taima taka an buatsaih hi zirlai buatsaih tlaka ruat an nihnaah an mawhphurhna a ni ve reng bawk.

Kumin zirlaibu han thlir ila BCM zirlaibu hi phek 248 a ni a, Presbyterian zirlaibu hi phek 257 ani a, a chhah zawng pawh a inang viau mai. BCM zirlaibuah hian an hawrawp hman a hraw deuh a, Presbyterian zirlaibu anga hawrawp sin hi hmang ta se, thu tam tak a la chhut belh thei ngei ang.

Zirlaibu siam hi thil hautak leh hun heh tak, hna dang tam tak kara buatsaih ṭhin a nih pawh a rinawm. Hei vang hian a buatsaihtute pawh hian fak an phu ngawih ngawih a, an fakawm thlawt a ni. Presbyterian kohhrana MSSU hruaitute leh BCM Christian Education Deptartment hruaitute aṭanga hriat danin, Sande Sikul zirlaibu buatsaih tur hian chawpchilha in ruat a ni lo va, kum 3 hma lamin hun tam tawk nei tura hriattir lawk an ni ṭhin. Hei vang hian hnuhma phuailuai awma chhuanlam an siam hi thil thiang lo tluk chu a ni ve tho. Hetiang a nih vang hi a ni ang zirlaibu siamtu tam zawkte siam hi a belhchianawm em em a, duhthu sam lo tih tur te pawh a awm ve tho bawk.

Kuminah Mizoram Baptist Kohhranin “Kohhran leh Mission” tih Rev Dr K. Lalrinthanga ziak an zir a Presbyterian kohhranin “Thlarau Thianghlim” tih Rev Dr Tlanghmingthanga ziak an zir. Mi thiam ve ve ziak a ni a, belhchian a dawl dun hle mai. Thil ṭha ve ve a nih laiin Bible bu ngei zir loh hian khua a ti har deuh ṭhin. Nakum lamah chuan Pathianin hun ṭha min pe a nih chuan, BCM-in Chanchin Ṭha Marka ziak leh Presbyterian kohhranin Thu Puan an zir dawn a ni. Heng zirlaibute hi chhuanawm tak ve ve a an siam kan duhsak em em a, kum lehlama zir tur siamtute pawhin theihtawp chhuah se.

Sawi tak ang khan kohhran pahnihte zirlaibu siamtute hi kan pastor chhuan-vawrte an ni ṭhin a, an kut chhuak aṭangin an theihna te kan hmu ṭhin a, a lawmawm tak meuh. Kum 2001, 2002 leh 2003 a zirlai bik lo thlir ila. Kum 2003 zirlai Roreltute Revd Chuauthuama buatsaih te, kum 2002 zirlai Rev Dr Zaihmingthanga buatsaih Tirhkohte thiltih bu te; kum 2001 Rev Dr F Hrangkhuma buatsaih Chanchin Ṭha Matthaia ziak te kha an ṭha tlangpui. Heng lehkhabute hi kum sawm ral hnuah pawh kan la hmang ṭangkai khawp mai.

Roreltute bu thu hi Revd Chuauthuama hian engtin em em nge a lo hriat zau tih hi mi naran tan chuan chhut thiam pui ngaihna pawh a awm lo hial mai. Rev F Hrangkhuman a lehkhabu buatsaih kha, “Chanchin Ṭha Matthaia” tiin a dah a, mi thiam kut chhuak lehkhabu hming atan chuan a pawi. “Chanchin Ṭha Matthaia ziak” ti kher loin, Bible a inziak ang hian “Matthaia” tih mai te hi a felfai zawk awm e. A bu hming ziak danah hian a bu ziaktu duhdan ni ngawt lo deuh hian kohhran hian kalphung fel deuh nei sela a ṭha. Presbyterian kohhran hi chuan kalphung fel tak an neiin a lang a, hetiang hi a ṭha khawp mai.

A lo chhiartute aṭang chuan duhthu han sam zel ila. Sande sikul zirlaibu buatsaihnaah hian phek khatah bung khat thu sawi zawh hman a ni lo tlang pui. Phek lehlamah hian a chang zawm zel an hrilhfiah hian, a chang number chauh dah loin, a bung number nen dah dun thlap thlap ṭhin ni se. Chutiang zelin paragraph tinah pawh chang hrilhfiah tur tihlan apiang hi a bung nen dah duh zel ni se tihna a ni bawk. A hnua en leh ṭhin duh tan pawh a awlsam. Entir nan an hrilh fiah tur kha Luka 13:11 ni ta se. ‘11’ ti ringawta tihlan a nih chuan, bung tinah chang 11 a awm vek si a, kan duh lai kha keu chhuah mai a buaithlak ṭhin. Chuvangin, zirlaibu buatsaihtute hian, zirlaibute hi tun kum atan chauha kan siam a ni lo tih hriain nakin hun lo la kal zel tur atan kohhrante la hman ṭangkai zel tur a ni tih hriain, taimak an chhuah a pawimawh hle mai. Zirlaibuah hian bung (zirlai) tina Bible bung leh chang a tluan parh zela chhut lan ṭhin hian zirlaite leh zirtirtu inbuatsaihtute tan thil a tiawlsam a, a ṭha hle.

Kan kohhran hruaitute hian hmana kan zir tawhte pawh kha, zir nawn leh turin han rawt zel se la. Nakuma BCM zir tur Marka pawh hi kum 1991 a an zir tawh a ni a, Presbyterian kohhranin nakuma an zir tur Thu Puan pawh hi kum 1978 a an lo zir tawh a ni bawk. Mi thar thiam zawkte kan pastor zingah an rawn chhuak zel a. Changtlung zawk leh chipchiar zawka kan bible bu chhung thute hi zir thar zel a chakawm ṭhin.

Kohhran hrang hrangte pawh sande sikul zirlaibu an siamnaah inelna thianghlimin intihsiak rilru puin, hrilhfiahna kan tih mai, zirlaibu hi chumi rilru pu chuan siam ṭhin sela. Kohhran website ah kohhrante rawn theih turin sande sikula kan zir tawhte hi a chhep theih ang em? A theih phei chuan Bible dictionary leh concordance te, theih ni se Mizo Study Bible te nen kohhran website ah awm thei se.

Kohhran web tlawh ṭhinte tan, khawi hmunah pawh inbuatsaih nan a remchang ang a, a bengvar thlak ngawt bawk ang le.

- RC Zosangzuala (Zualmama), Venghlui