Mimkut thla - September
Mim-kut thla chu Septem-ber a ni a, I & PR directorate hian kum tam an Calender siama an chuantir hi a dik e. Kum 1927 hma lama Mizo lal 54 rawna a lehkhabu ziakah N.E.Party, chutih laia Mizoram Bawrsap chuan a lehkhabu 'a monograph on Lushai customs and ceremonies 1928' phek 91-ah chuan tihian a ziak “Mimkut Thla - The Mimkut is really a feast in honour of those persons who have died during the past year. It takes place in the month of September and lasts at the most two days. Fresh vegitables, maize, bread, and clothes are placed on the memorials of the dead. In houses in which some one has died during the year Zu is drunk and on the second day every body eats bread. At the end of this feast there is one day’s hrilh.”
“Dictionery of the Lushai Language” “Pu Buanga dictionary” tia kan sawi ṭhin 1935 kuma peih fel, phek 315-naah chuan “ Mim kut thla, the moon or lunar month approximating to September” tiin a inziak a. Hemi hnuai chiahah hian “Mim kut thla naupang, the moon or lunar month approximating to August” tiin a inziak. Heng hi Mizo ṭawnga lehlin kher ngaiin ka hre lo.
N.E. Parry-a hian thu hmahruaia a ziak dan chuan, Sailo lal an hming leh an khua nena ziak thlapin 46 a rawn thu leh, hnamchawm lal 8 a rawn thu a sawi a. N.E.Parry hian, ama rin danin a ziak lova; Mim kut an la hman lai ngeia lal, mimkut hman hun an khuaa tlang au va puang tu ngei te a rawn a ni. Pakhat chauh ni lovin 46 a rawn nghe nghe. He a thil ziak hi a dik ngei ang. Rin tlak a ni.
Pahnihnaah chuan, “Pu Buanga” tia Mizovin kan sawi huai huai-in a dictionary-a a ziak pawh hi, a dik ngei ang. Dik lova ziak hi a tan hlawkna a awm lo.
A pathumnaah chuan, ka nu leh ka pate min hrilh dan leh, Parry-a leh Pu Buanga sawi dan hi a inang. Ka pa chu Dohleia Sailo a ni a, Khamliana Sailo Lungleng lal fapa upa ber a ni. Mizo lehkha zir hmasa zingah a tel ve hman a, kut ni vangthla te pawh hmang ve tawh a ni. Ka nu chu Thanseii Sailo, Hranga Sailo, Rolura thlah, Phulpui lal fanu a ni. Ka naupan laiin thil hi min hrilh peih hle ṭhin. Kut an hman dan te pawh min hrilh ṭhin. Amah tak chuan chai ho chu zu a tulh ve ngai lo va, khawi zu a tulh thu te min hrilh.
Tichuan, ka nu leh pate min hrilh dan chuan Mim kut chu September thlaah an hmang ṭhin. Rolura erawh chuan August thlaah Mim kut a hmang ṭhin tih pawh ka nu leh pa te chuan min hrilh. Chuvang chuan a ni mai thei, Pu Buanga’n August thla hi “Mim kut thla naupang” a tih ni. Chuvang bawk chu a ni maithei e, tun hnaia ziaktu ṭhenkhatin August thla hi Mimkut thla nia an hriat chhan.
Mim kut hmang tawhte leh a hman hun laia mi satliah lo, tam tak lo rawntute sawi hi dikah i pawm tlang mai ang u. Information Director pawhin kum tam tak Calender a an chuantir hi, an tih sual loh hmel a ni. An ni pawh hian, upa leh lehkhabu rawn a ziak a ni ngei awm si a. Tun hnai hian thu dik zawk ziak chhuah tuma dik lo zawk sawi vung vak hi an awm zeuh zeuh. Thil ṭha ni maw le! Lo ring tawk an lo awm ve lehnghal!
Ṭhangthar-ten dik taka thil an hriat nan (research based) innghahchhan bulbal dik tak leh rintlak ngeia innghat lo hi chu, thil hi sawi loh hram i ching ang u. Khual thu thang leh bawm ak thu-ah zawng i innghat lovang u.
- Lalthangfala Sailo