INKHAWM TIH TLEM CHUNGCHANG

Inkhawm tih tlem chungchang hi ngaihdan a inang lo thei hlein a rinawm a, hetiang zawng hian sawi i'n tum ve teh ang:

1. Nu leh pa ten, fate leh inchhungkhur kan uap tlem ta lutuk hi tunlai khawvel ṭhang chak tak leh hmasawn mek, danglam chak tak leh sualna chi hrang hrang karah hian naupang te, tleirawl te, ṭhalai leh chhungkuate hian kan chhiat phah hle niin a lang.Chuvangin, tun aia ṭha zawk a, kan tu leh fate leh kan chhungkuate enkawl a, kan uap ṭhat zawk theih nan Inkhawm tih tlem hi a ṭul tawh niin a lang.

2. Tuna kan ram kohhran dinhmun han thlir hian, a tih tlem theih dan ṭha ber tur nia lang chu - Kohhran Hmeichhe Inkhawm, thawhleh zana kan neih ṭhin leh Kohhran Pavalai Pawl (KPP) Inkhawm, zan lama neih ṭhinte hi Pathianni Chawhnu Inkhawm hunah hian neih ni se. Tualchhung Kohhran tinin an remchan dan angin lo kalpuiin ruahmanna siam ni se. Chutih laiin, pastor bial fan programme leh kohhran mal leh synod special programme-ah erawh chuan, Pathianni chawhnuah Kohhran inkhawm pangngai chu neih ṭhin tho ni thung se.

3. Hetih lai hian, mi ṭhenkhat chuan, Pathianni chawhnu inkhawm hi a pangngai anga kan hman zel loh chuan kohhran ten kan chhiatpui an hlau mai thei. Mahse, he hun hi Kohhran Hmeichhia leh KPP ten inkhawm nan hian hmang zawk se, tunlai kan ram leh kohhran dinhmun thlirin kan ṭhatpui tawh zawkin a rinawm.

4. Tin, kar khat chhungin inkhawm loh zan - zan awl hi, zan khat chiah a awm a ni ta ber a, chuvangin, kohhran committee peng hrang hrang tan pawh zan lama committee ṭum pawhin zan awl a awm lo lutuk ta te hi a ṭha lo, kan inhnawh chep ta lutuk a ni. Chubakah, kohhran committee hrang hrang committee member - te hi, NGO lamah te pawh committee member an lo ni ve fur bawk a, committee hi a insu buai thei viau ṭhin a ni. Chuvangin, Kohhran Hmeichhia leh KPP tal hi chu Pathianni Chawhnuah hian inkhawm thei hram tawh zawk se, a va ṭha dawn em! Tichuan, Kohhran committee peng hrang hrang tan pawh committee nan zan awl a tam thei deuh ang a, a remchang zawkin a rinawm.

5. Tin, Kohhran Hmeichhia leh KPP member-te tan pawh tu leh fate uapin inchhungkhurah hun an hmang tam thei deuh zawk ang a, a va ṭha dawn em! Tichuan, kan tu leh fate sual kawng zawh tur pawh kan vengin an zirna thleng pawhin tun aiin hma an sawn phah thei ngeiin a rinawm bawk a ni.

- Rev. John B.Hmar, Counsellor, FG & CC, Champhai.