Lengpui Airport - Congress sorkar kutchhuak - Congress Ṭhalai

Congress party ṭhalai, Mizoram Pradesh Youth Congress Committee (MPYCC) chuan thuchhuah siamin, Lengpui Airport chu Congress sorkar kutchhuak a nih thu an tarlang a; 'Aizawl Traffic Jam Free' sawitu MNF party-te'n Aizawlah traffic jam an siam nasa hle ṭhin niin an sawi bawk.

MPYCC chuan, March 11, 2019-a Mizo Hnam Rûna inkhawmah MNF adviser J Lalhmingliana'n, Lengpui Airport chu MNF kutchhuak anga a sawi chu dâwt muhlûm leh mipui zah lohna a nih thu an sawi a, "Lengpui Airport hi Mizorama Congress sorkar laia siam, Congress sorkar lai veka hawn tura peihfel a nih thu hi J Lalhmingliana hian a la theihnghilh kan ring lo. Airport hi September 22, 1998-ah prime minister AB Vajpayee hawn tura ruahman a ni a, inthlanpui puan hnan a nih avang chauha hawng thei ta lo an ni," an ti.

Lengpui Airport chu Congress president leh a hun laia chief minister Lal Thanhawla kaihhruai hmalakna rah liau liaua din a nih thu sawiin MPYCC chuan, "J Lalhmingliana'n CM Zoramthanga thusawi kalh zawnga statement a neih avanga Lengpui Airport MNF kutchhuak anga thu dik lo a sawi ta mai hi a pawi kan ti," an ti a; Lengpui Airport chu mini-international airport atan MNF sorkarin siam a tum tih J Lalhmingliana'n a sawi leh ta thut chu MNF President tihlâwm a tumna maia an ngaih thu an sawi.

Congress ṭhalaite chuan, nikuma Assembly inthlan dawnah MNF president Zoramthanga'n, 'Aizawl hi India ram khawpui zinga traffic jam awm lohna khawpui awmchhun­ah kan siam ang,' tiin sawi mah se, tunah chuan MNF party chu Aizawl traffic ti-jam-tu lian ber an nih mek thu an sawi a, "Mipui harsatna an siam nasa hle. MNF office Mizo Hnam Runa MNF intawhkhawmna hian kawngpui pawimawh an dangchat fo a, Aizawl khawpui chhung traffic kal­phung a buai nileng ṭhin a ni," an ti.



Share this Post

Login to comment
No Comments