Zawh khap
Mamit SP Shashank Jaiswal chuan thupek chhuakin, Bairabi-Zamuang kawnga Teirei lei chu fûr ruahtui vanga a chak ṭhat tâwk tawh loh thu a tarlang a, "Tui chîm chin a la san avang leh chhan hrang hrang vangin siam ṭhat theih a ni rih lo a, lirthei zawng zawngte'n an zawh/kaltlang atan a him tâwk tawh loin hriat a ni. Lirthei LMV chung lam tan zawh/kaltlang khap a ni," a ti.
Zira bânna pawm
Home minister hlui R Lalzirliana'n MLA aṭanga bânna a thehluh chu nimin khan speaker Hipheia'n a pawm. Tarlan tawh angin, R Lalzirliana hian MLA aṭanga bànna hi August 12, 2018 khan a thehlut a, Speaker a awm loh avangin a aiawhin Assembly secretary SR Zokhuma'n a dawng a ni.
Thisen pe
Kanan Veng Branch YMA, Aizawl chuan an din champha vawi 45-na pualin nimin khan an kohhran hall-ah blood donation camp an huaihawt a, Aizawl Civil Hospital tan thisen unit 29 an pe a, a petute mipa 24 leh hmeichhia panga an ni.
Zirlai lawmpui
Tun hnaia Agartala-a neih zawh tak, India ram hmarchhak state hrang hranga science zirlaite'n science film leh an zirlai hmanga an intihsiakna Sci-Connect Quiz Competition-a pahnihna lawmman dawngtu, Mizoram aiawhtu St. Paul's HSS zirlaite - Simon Lalremsiama, Ankita Barua leh Niyati Basel te lawmpuina hun nimin khan Directorate of Science & Technology Conference Hall-ah buatsaih a ni.
Control room
November 28, 2018-a Mizoram Legislative Assembly inthlanpui neih tur atan Mizoram pum huap leh Aizawl district bik atan thil hriat chian duh, zawhfiah duh leh lungawi lohna thlen duhte tan control room siam a ni a, engtik lai pawhin biakpawh theih a ni. Control room biak theihna number-te chu - Mizoram pum tan State Controll Room no. 1950 (toll free) leh Aizawl district bik thil atan Aizawl DC Office Control Room no. 0389-2417717/2316719 te a ni.
