TV channel tharMizo TV channel thar, Mizoram Media Evangelical Ministries channel chu zanin atang hian Aizawla cable TV pathumah tihchhuah a ni dawn a; a hawnna inkhawm hi zanin dar 7 hian Vanapa Hall-ah neih a ni ang. He channel-ah hian hian sermon, zai, interview, testimony sawi leh Kristiante rawngbawlna chanchin tihchhuah thin a ni dawn a ni.

Hminga'n hawng
Rajya Sabha MP, Pu Lalhmingliana chuan nimin zing khan Ramhlun North leh Chaltlang inkalpawhna step, Rs. 3,23,000/- senga siam chu a hawng. He step hi Baptist Kohhran Biak In bula awm a ni a, MP Local Area Fund hmanga siam, metre 158-a sei a ni.

UDA-in sawm
Zoram Kuthnathawktu Pawl, Aizawl district chuan UDA-in sorkar siam a tumna kawnga tha thawh duh zawng zawngte tel turin an sawm a; inthlan lo awm turah UDA-in sorkar-na a chan ngei an rin tlat thu an tarlang bawk.

Judo medal 9
October 2-6 chhunga Sub-Junior National Judo Championship, Haridwar,  Uttarankhand-a neih zawh takah, Mizoram Judo Association chuan medal pakua a la a, Zairemthanga, SAI chuan silver medal laiin, mi dang pariatin bronze medal an la bawk a ni.

Gandhi pian cham':
Vawiin hi India Hnam Pa, Mahatma Gandhi pian cham' a ni a, tukin zing dar 6:45 hian AR Lammual bula a lim dinna hmunah Governor, Chief Minister, Ministers leh sorkar hotu liante'n zahna pangpar an dah dawn a ni.

Thlang nawn:
ZIDCO Managing Director, Dr Zohmangaiha chu a term hnihna atan COSIDICI Vice President atan New Delhi-ah thlan leh a ni. COSIDICI hi India ram puma Industrial Finance Corporation insuihkhawmna pawl  a ni.

College thianfai:
Hrangbana College chuan nimin khan faina ni hmangin, zirlai leh thawktute chuan college leh a compound-te an thianfai. Vawiin atang hian  college campus-ah meizuk leh zawrh an khap dawn a; October 7 ah blood donation camp an nei dawn bawk.

Addl. Dist Judge ruat:
Gauhati High Court chuan Mizoram tan Additional District & Session Judge pathum, Pu KL Liana, Pu Saingura Sailo leh Pu Vanlalmawia te a ruat thar. Pu KL Liana hi Aizawlah awmin, Special Court under ND&PS Act khawih tel tura tih a ni a; Pu Vanlalmawia hi Lungleia awm tur leh Pu Saingura Sailo hi Aizawla awm tura tih an ni.

MULCO zuar dawn lo:
MULCO Bawnghnute Zuar Association chuan, an thil phutte MULCO Board of Directors meeting-in a tihhlawhtlinsak loh avangin, vawiin atang hian MULCO bawnghnute an zuar dawn lo. An lungawi lohna lantir nan naktuk zan dar 7-ah MULCO office gate bulah kalkhawm an tum tih an tarlang. MULCO bawnghnute hi litre 1 Re.1/- hlawhin an zuar thin a, Rs. 2/- a tisang turin an lo ngen tawh a, BoD chuan Re.1.25/- a zuar tura tih chu pawm lovin an nuar dawn ta a ni.

Zirlaite lawm:
Aizawl City College Joint Students' Union leh Mizoram University Students' Union chuan thuchhuah intawm siamin, October 27-31 chhunga University Sports neih phalsak an nih avangin MZU thuneitute chungah leh, Larsap, college principal zawng zawng leh MZP chungah lawmthu an sawi. Zirlaite chuan sports neih chhunga buaina a awm chuan, na taka action lak a ni ang a, zirlaite paw'n rilru thar nen sports hun hi hmang se an duh thu an tarlang a ni.

MLA hlui bâng:
MLA hlui leh MPC Sub-Headquarters, Lunglei Vice President, Pu J. Lawmzuala chuan nimin khan MPC atanga a banna a thehlut a, Congress a zawm tih Lunglei District Congress Committee a hriattir nghal nia thu dawn a ni.

YMA thisen pe:
Chanmari Branch YMA chuan an Branch kum 50 tlin, Golden Jubilee lawmna'n nimin khan Aizawl Civil Hospital-a damlote tan thisen unit 21 an pe a, veng chhung mipuite tan Free Clinic an buatsaih bawk. Free Clinic-ah hian doctor 3-in damlo 107 an en a, damdawi an pe nghal bawk a ni.

Chawlh titawp:
Mizoram sorkar hnuaia hnathawktu tam ber, Ministerial Service leh Secretariat Service Association te chuan nimin thlenga a huhova chawlh an lâk hnuin, vawiin atangin office an kai leh tawh dawn.

PUC thanksgiving:
Pachhunga University College chuan, Golden Jubilee an lawmna kal zelah, Pathianin kum 100 lai an college a hruaina tawhna avanga lawmthu sawina hun (thanksgiving) vawiin hian College Veng Presbyterian Kohhran Biak Inah an hmang dawn a; Synod Moderator leh Aizawl Bishop te'n an hmanpui ang.