Duhoma'n House-ah TDS a sawi chhuak Sorkarin hma kan la ang - Chief Minister

Sorkar laipuiin State Bank of India-a account nei zawng zawng aṭanga chhiah, income tax a lak tur, Tax Deduction at Source (TDS) chungchangah ZPM group leader Lalduhoma'n nimin khan Assembly session-ah attention motion a pu lut. Hemi chungchangah hian House leader Zoramthanga, chief minister chuan, Mizoram sorkarin an bawhzui tur thu House a hrilh.

Lalduhoma chuan, tun hma zawng chuan tribal-te chu chhiah âwltir an ni tih sawiin, "Tun hnai khan sorkar laipui chuan thupek thar tichhuakin, tribal-te pawh huamin, SBI-a account nei zawng zawng kum khata annual interest Rs. 10,000 leh senior citizen annual interest Rs. 50,000 nei chu an pawisa aṭanga 10% cut vek turin a ti a ni," a ti. 

Income Tax department aṭang­a chhiah âwl phalna nei tih loh SBI-a account nei Mizo mipui zawng zawngin chhiah an chawi a ngai dawn tih sawiin Lalduhoma chuan, "Chhiah âwl phalna nei tur chuan Silchar-a zuk dil a ngai a, chu pawh kum khat chhung bak a nung dawn lo," a ti a; sorkar laipui ruahmanna thar chuan Mizo mipuite tan harsatna nasa tak a siam dawn thu a sawi. 

Lalduhoma chuan, SBI chu mipuiin tlansanin, bank dang an dawr a nih pawhin, bank dangte pawh income tax cut zel tura tih an nih a rinawm thu sawiin, "He thil chungchangah hian Mizoram sorkar hian hmarchhak biala state dangte thawhpuiah sáwmin, ruahmanna hi sût a nih leh theih nana rang takin hma la se ka duh hle a ni," a ti. 

ZPM Leader thu sawi chung­changah hian House leader Zoram­thanga chuan, ngun taka ena thil zir chian a, hmalak a ṭul tih a sawi a, "Sorkar pawhin kan theihtawpin hma kan lo la ang a, kan zir ang a, kan tih tur ṭul ang chu chak takin kan theihtawpin hma kan lo la ang," a ti. 

Mizoram, Arunachal, Nagaland, Tripura leh Jammu & Kashmir-a mi ṭhenkhat, schedule tribe-te chu income tax àwl an ni ṭhin tih sawiin Zoramthanga chuan, "Keimahni ram ni lo, páwn lama kan awm erawh chuan income tax-te kha min la tawh ṭhin. Tunah order/instruc­tion thar emaw a awm a, keini pawhina income tax kan pe tur anga chhawp chhuah ngai chi a ni phawt chuan, hmarchhaka mite hi kan zavaia ṭan tlan a ṭul khawpin ka hria," a ti a; tribal area-a tribal-te'n income tax pek chu NE-a mite'n ṭha lo an ti vek niin a sawi. 



Share this Post

Login to comment
No Comments